Meatco sê gou aan produsente
Produsente gaan binnekort oor vordering met Meatco se regrukplan ingelig word.
Ronelle Rademeyer
Meatco het 'n spesiale ledevergadering belê waartydens die vleisverwerker aan produsente terugvoering sal gee oor die besluite wat op 22 Junie tydens die jaarvergadering geneem is.
Produsente het die bestuur en direksie tydens dié vergadering behoorlik geroskam en geëis dat hulle hul sokkies optrek en Meatco binne ses maande regruk.
Me. Rosa Thobias, hoof van kommunikasie by Meatco, het gister die kennisgewing aan Republikein gestuur waarin lede oor die vergadering ingelig word wat op 26 Oktober om 08:00 by Wanderers-sportgronde in Windhoek sal plaasvind.
Mnr. Harry Erasmus het tydens die jaarvergadering 'n sterk bewoorde mosie ingedien waarin aangevoer is Meatco se dalende internasionale mededingendheid en kommerwekkende finansiële posisie moet voor die deur van die direksie gelê word.
“Produsente het alle vertroue in die direksie verloor weens sy ondeursigtige optrede, die ondoeltreffende wyse waarop die raad na produsente se belange omsien, en die gevaar dat Meatco as sake-entiteit besig is om onder te gaan,” het die mosie gelui, wat eenparig aanvaar is.
BEDRYFSKOSTE
Verskeie kwessies voortspruitend uit die vleisverwerker se beroerde finansiële posisie is geopper.
“Die persentasie van Meatco se inkomste wat aan produsente uitbetaal word, neem af, terwyl die bedryfskoste as 'n persentasie van die omset skerp toegeneem het,” het hulle gemaan.
Verder het die verhouding van bates tot skuld, wat aandui hoeveel keer die langtermynskuld deur die maatskappy se bates gedek word, van 8,51 tot 1,63 gedaal.
Meatco het vir die finansiële jaar geëindig 31 Januarie 2018 'n verlies van N$64,3 miljoen voor belasting getoon, teenoor 'n wins van N$22,5 miljoen in 2017.
So ook was daar 'n kontantvloei-tekort uit operasionele aktiwiteite van N$185,5 miljoen vergeleke die surplus van N$139,9 miljoen die vorige jaar.
“Wat ons veral baie bekommer, is dat die ouditeure in hul verslag aandui daar bestaan 'n wesenlike onsekerheid oor die groep se vermoë om as 'n lopende saak te bly voortbestaan,” het die produsente aangevoer.
Teen dié agtergrond het hulle geëis die raad van direkteure moet 'n regrukplan met praktiese stappe in besonderhede aan hulle verskaf.
Produsente het gesê hulle wil in die volgende ses maande gereeld terugvoering hieroor van die direksie kry.
Volgens Meatco sal dít tydens die spesiale ledevergadering, wat van 08:00 tot 11:00 gaan duur, geskied.
Daarná sal kommersiële boere, wat lede van Meatco is, nominasies kan indien vir 'n produsent om hulle op die direksie te verteenwoordig. Vier name kan aan die minister van landbou, water en bosbou, mnr. Alpheus !Naruseb, voorgelê word.
Dít volg nadat mnr. Faan Oosthuizen, die produsente se vorige verteenwoordiger, in Februarie vanjaar bedank het.
Meatco het 'n spesiale ledevergadering belê waartydens die vleisverwerker aan produsente terugvoering sal gee oor die besluite wat op 22 Junie tydens die jaarvergadering geneem is.
Produsente het die bestuur en direksie tydens dié vergadering behoorlik geroskam en geëis dat hulle hul sokkies optrek en Meatco binne ses maande regruk.
Me. Rosa Thobias, hoof van kommunikasie by Meatco, het gister die kennisgewing aan Republikein gestuur waarin lede oor die vergadering ingelig word wat op 26 Oktober om 08:00 by Wanderers-sportgronde in Windhoek sal plaasvind.
Mnr. Harry Erasmus het tydens die jaarvergadering 'n sterk bewoorde mosie ingedien waarin aangevoer is Meatco se dalende internasionale mededingendheid en kommerwekkende finansiële posisie moet voor die deur van die direksie gelê word.
“Produsente het alle vertroue in die direksie verloor weens sy ondeursigtige optrede, die ondoeltreffende wyse waarop die raad na produsente se belange omsien, en die gevaar dat Meatco as sake-entiteit besig is om onder te gaan,” het die mosie gelui, wat eenparig aanvaar is.
BEDRYFSKOSTE
Verskeie kwessies voortspruitend uit die vleisverwerker se beroerde finansiële posisie is geopper.
“Die persentasie van Meatco se inkomste wat aan produsente uitbetaal word, neem af, terwyl die bedryfskoste as 'n persentasie van die omset skerp toegeneem het,” het hulle gemaan.
Verder het die verhouding van bates tot skuld, wat aandui hoeveel keer die langtermynskuld deur die maatskappy se bates gedek word, van 8,51 tot 1,63 gedaal.
Meatco het vir die finansiële jaar geëindig 31 Januarie 2018 'n verlies van N$64,3 miljoen voor belasting getoon, teenoor 'n wins van N$22,5 miljoen in 2017.
So ook was daar 'n kontantvloei-tekort uit operasionele aktiwiteite van N$185,5 miljoen vergeleke die surplus van N$139,9 miljoen die vorige jaar.
“Wat ons veral baie bekommer, is dat die ouditeure in hul verslag aandui daar bestaan 'n wesenlike onsekerheid oor die groep se vermoë om as 'n lopende saak te bly voortbestaan,” het die produsente aangevoer.
Teen dié agtergrond het hulle geëis die raad van direkteure moet 'n regrukplan met praktiese stappe in besonderhede aan hulle verskaf.
Produsente het gesê hulle wil in die volgende ses maande gereeld terugvoering hieroor van die direksie kry.
Volgens Meatco sal dít tydens die spesiale ledevergadering, wat van 08:00 tot 11:00 gaan duur, geskied.
Daarná sal kommersiële boere, wat lede van Meatco is, nominasies kan indien vir 'n produsent om hulle op die direksie te verteenwoordig. Vier name kan aan die minister van landbou, water en bosbou, mnr. Alpheus !Naruseb, voorgelê word.
Dít volg nadat mnr. Faan Oosthuizen, die produsente se vorige verteenwoordiger, in Februarie vanjaar bedank het.
Kommentaar
Republikein
Geen kommentaar is op hierdie artikel gelaat nie