Mark toe met speenkalwers

Produsente moet nóú bemark

02 March 2018 | Landbou
Landbouredaksie - Prysonsekerheid en vrese dat die swak reënseisoen tot noodbemarking gaan lei, is redes waarom produsente noudat speenkalfpryse 'n nuwe hoogtepunt bereik het, hul diere moet bemark.

Mnr. Titus Koen, hoofbestuurder van veiling by Agra, het gister in 'n verklaring gesê dit is nou 'n goeie tyd om beeste te bemark. Dit is aangesien veilingpryse uitsonderlik hoog is en daar in Januarie 'n nuwe hoogste prys van N$41,86 per kg op 'n Agra-veiling vir tollies betaal is.

Volgens Koen is dit moeilik om die toekomstige neiging in veilingpryse te voorspel. “Veeprodusente wat beeste het wat markgereed is, moet dit verkieslik so gou as moontlik bemark om gebruik te maak van die goeie pryse. Daar is geen sekerheid oor hoe lank die pryse nog só hoog gaan bly nie,” sê hy.

“Ten spyte daarvan dat hoë pryse nou bykans al 'n jaar lank op veilings vir speenkalwers betaal word, kan ons steeds nie waag om enige vooruitskouings te gee nie,” sê Koen in die verklaring.

Volgens navorsing deur die Namibië Landbou-unie (NLU) het produsente in 2017 altesaam N$3,4 miljard uit die verkoop van beeste verdien. Dié bedrag verteenwoordig 45% van die totale landbouinkomste vir die jaar.

In 2016 het die inkomste uit beesverkope N$2 miljard beloop.

Agra sê in 2016 is 35 892 tollies verkoop teenoor die 53 334 wat in 2017 verhandel het. Verlede jaar is gekenmerk deur 'n ongekende opbloei in die speenkalfmark.


DROOGTE, MIELIEPRYS

Koen sê die hoofrede waarom speenkalfpryse so skerp gestyg het, is die tekort aan beeste in Suid-Afrika as gevolg van droogtes asook die laer mielieprys, wat 'n beduidende kostevoordeel vir voerkrale inhou. Die grootste gedeelte van Namibiese speenkalwers gaan tans na voerkrale in Suid-Afrika.

“Die ander rede is omdat Suid-Afrika, wat voorheen 'n netto invoerder van vleis was, nou 'n netto uitvoerder van vleis geword het nadat die land sy vleis suksesvol oorsee kon bemark,” verduidelik Koen.

“Mielies, oftewel voer, is van 'n voerkraal se grootste uitgawes. Die mielieprys het tot onder N$2 000 'n ton gesak nadat Suid-Afrika verlede jaar 'n rekord mielieoes geproduseer het.

“Die plaaslike prys vir speenkalwers is sterk gekoppel aan die Suid-Afrikaanse mielieprys. As dit stabiel bly, is die kanse goed dat die speenkalfprys ook stabiel sal bly. As dit egter gaan fluktueer of duurder word, sal die speenkalfprys beslis daal,” sê Koen.

Hy sê hoewel 'n noemenswaardige prysstyging in die bedryf te wagte was, is die afgelope jaar se skerp prysstygings beslis hoër as wat verwag is.

“Na afloop van gesprekke tussen Agra en Suid-Afrikaanse voerkrale middel verlede jaar, was die konsensus dat die hoë veilingpryse nie lank op dié vlakke sal bly nie. Die teendeel was die geval, met pryse wat daarna nóg verder gestyg het,” sê Koen.

Intussen het 'n afvaardiging van die Lewendehaweprodusente-­organisasie (LPO) Suid-Afrikaanse voerkrale verlede week besoek om die volhoubaarheid van die pryse te bepaal.

Dit blyk Suid-Afrika se beesvleis­uitvoere het tydens die droogte ongeveer 50 000 ton beloop. As gevolg van die versterking van die rand is uitvoere nie meer mededingend nie, en word verwag dat hierdie uitvoervleis in die SA mark geabsorbeer sal moet word, het die NLU verlede week berig.

“Die verwagting is speenkalwers sal steeds hoog in aanvraag bly as gevolg van 'n verkleining van die buurland se beeskudde,” sê dié unie.

OPWAARTSE NEIGING

Volgens statistiek van veilingpryse wat deur Agra bygehou word, het die gemidelde prys vir tollies in Junie 2016 op 'n laagtepunt van N$15,70 per kg gestaan. Teen Januarie vanjaar het dit tot N$36,94 per kg gestyg – wat beteken meer as dubbeld die prys van Junie 2016 word tans betaal.

Koen sê pryse vir tollies het verlede jaar op Agra-veilings tot by 'n maksimumpunt van N$40,27 per kg geklim.

Dienooreenkomstig toon data, wat deur die Vereniging vir Lewendehawe-agente en –vervoerders (LABTA) bygehou word, dat nasionale gemiddelde veilingpryse van alle Namibiese agentskappe vir beeste sedert Junie 2017 sterk styg.

Nasionale syfers dui aan – met die uitsondering van Augustus 2017 - dat die gemiddelde prys per kilogram sedert September verlede jaar nie een keer onder N$31,23 gedaal nie.

Soortgelyk

 

Plastieksakke uit nasionale parke verban

1 dag gelede | Omgewing

Die minister van die omgewing en toerisme, mnr. Pohamba Shifeta, het plastieksakke uit alle nasionale parke in die land verban. Die minister het gemaan geen...

Nampol-beamptes skuldig aan nalatigheid

1 dag gelede | Misdaad

Twee senior polisiebeamptes wat intern ondersoek is vir hul beweerde nalatigheid om betyds te reageer in ‘n saak waarin ‘n 18-jarige vyf familielede vroeër vanjaar...

Ollies les hul dors

2 dae gelede | In beeld

Namibiërs in die Zambezistreek kan vandag na verspreide donderbuie uitsien, terwyl dié elders in die binneland vir eers nog met enkele tot geïsoleerde buie tevrede...

Ekonomie: Hou sand uit wiele

2 dae gelede | Politiek

Ronelle Rademeyer Dubbele belasting, soos belasting op dividende en belasting op kapitaalwins is immoreel en gaan nié die ekonomie laat groei nie.'n Ekonomie is die...

PS'e binnekort nié permanent

2 dae gelede | Regering

Denver Kisting - As beplande wetgewing deurgevoer word, is PS’e binnekort nie meer “permanent” in die tuig nie.Hiernaas sal dié rekenpligtige beamptes van ministeries ook...

Gróót regshervorming binnekort op pad

2 dae gelede | Ministeries

Denver Kisting – Die werksaamhede van die land se howe word deur verskeie uitdagings gekortwiek.In die lig van hervorming wat die minister van justisie, mnr....

Ongelukke: Namibië 45ste op wêreldranglys

2 dae gelede | Ongelukke

Padongelukke kos Namibië jaarliks N$1,3 miljard en is die oorsaak van 3,76% van die land se totale sterftes.Dié skokkende syfers is Dinsdag namens die minister...

Weer vir 23 November 2018

2 dae gelede | Weer

BINNELAND: Gedeeltelik bewolk en bloe­dig warm in die ||Kharasstreek en die Weste. Elders sal dit gedeeltelik bewolk en baie tot bloedig warm wees met enkele...

Weer, Donderdag 22 November 2018

2 dae gelede | Weer

BINNELAND: Sonnig en baie tot bloedig warm in die //Kharasstreek. Elders sal dit gedeeltelik bewolk en baie tot bloedig warm wees. Enkele donderbuie word in...