Manlike pasiënt 'twee keer' besny
'n Forensiese ondersoek na vals eise van die staat se mediese fonds (Psemas) sonder 82 praktyke vir verdere ondersoek uit.
Henriette Lamprecht
Die ministerie van finansies het 'n forensiese ondersoek na die eispatrone van verskaffers van gesondheidsdienste van stapel gestuur om moontlike bedrog by die staat se mediese fonds (Psemas) te ondersoek.
Onder meer is eise vir 'n intra-uteriene apparaat (IUD) en swangerskapverwante eise vir manlike pasiënte ingedien, asook eise vir die behandeling van 'n oorledene en vir twee besnydenisse van dieselfde manlike pasiënt.
Volgens die ministerie se uitvoerende direkteur, me. Erica Shafudah, is meer as N$13 miljoen reeds van verskaffers herwin waar eise verkeerdelik ingedien is.
'n Oorsig van verskaffers se eispatrone het 82 praktyke vir verdere ondersoek uitgesonder.
'n Mediese forensiese ondersoek is vir 'n tydperk van ses maande van 19 Maart verlede jaar af van stapel gestuur en is intussen verleng.
Uit die 82 praktyke wat geïdentifiseer is, is net 29 gevalle ondersoek omdat data-ontleding en -bevestiging tydrowend is.
Strafregtelike bedrogklagte is teen twee mediese praktyke en 'n apteek aanhangig gemaak, en een wat met 'n mediese tegnologie-praktyk verband hou.
By een praktyk is eise ingedien vir dienste wat nie gelewer is nie, en vir voorskrifte wat uitgereik is aan pasiënte wat nie deur 'n dokter ondersoek is nie.
Die tweede praktyk wat strafregtelike klagte in die gesig staar, het onder meer geëis vir die behandeling van 'n pasiënt wat oorlede is, vir twee besnydenisse van dieselfde manlike pasiënt, asook vir behandelings wat nooit ontvang is nie.
In die geval van die apteek het personeel kontantbetalings vir medisyne wanbestee van pasiënte wat nie lid van Psemas is nie en is eise vir Psemas-lede ingedien, wat dié medisyne nooit ontvang het nie.
Wat die mediese tegnologie-praktyk betref, is 'n lisensie van die ministerie van gesondheid en maatskaplike dienste (MoHSS) onder valse voorwendsels verkry.
Dokumente van 'n mediese tegnoloog is ook sonder die betrokke persoon, wat boonop elders werksaam is, se toestemming gebruik om 'n praktyknommer by die Vereniging vir Namibiese Mediese Fondse (Namaf) en 'n ooreenkoms met Psemas te kry.
Mediese tegnoloë wat aan die nuwe Psemas-kontrak verbonde is, het bedank, terwyl die oorblywende mediese tegnoloog se werkspermit verval het.
Voorts voldoen die laboratorium nie aan MoHSS-, Namaf- óf Psemas-vereistes nie.
PRAKTYK opgeskort
Van die bevindinge van die forensiese ondersoek verwys ook na 'n algemene praktyk waar 'n Psemas-ooreenkoms nie toegestaan is nie en die praktyk opgeskort is.
Dít nadat onder meer bevind is die betrokke praktyk het 'n ongewoon hoë voorkoms van eise vir mangeloperasies wat in 'n hospitaal uitgevoer is, maar waarvoor 'n eis ingedien is asof dit by die praktyk self uitgevoer is.
Dié praktyk het ook herhaaldelik eise vir IUD's – selfs vir 'n manlike pasiënt – gehad.
'n Siviele eis is teen 'n tandarts ingedien wat drie praktyke het, maar net een het 'n ooreenkoms met Psemas.
Tandheelkundeterapeute is in diens geneem om die werk van tandartse te doen.
Volgens Shafudah is twee werknemers van die ministerie van finansies vir die oortreding van die teenkorrupsiewet aangekla.
Die een werknemer het glo iemand, wat nie 'n staatsdienswerker is nie, by Psemas geregistreer en sowat N$138 000 se mediese eise ingedien.
Tydens die ouditproses is nog soortgelyke gevalle ontdek wat nou aan die Teenkorrupsiekommissie (ACC) oorhandig is.
Nog twee werknemers het pasiënte by Psemas geregistreer, wat nie vir die staat werk nie, en ook dié gevalle is aan die ACC vir strafregtelike vervolging oorhandig.
Volgens Shafudah sal alle gevalle van diensverskaffers wat in die ondersoek vir bedrog ontbloot is, aan die verwante owerhede oorhandig word.
Sy het verwys na die nuwe Psemas-kontrak wat in Mei 2018 in werking getree het om skuiwergate vir bedrog aan te spreek.
Voorgestelde veranderinge sal nou in die kontrak ingewerk word.
'n Swakplek is volgens Shafudah die gebrek aan 'n klousule vir diskwalifisering.
Dit beteken enige verskaffer wat vroeër vir bedrog ondersoek is of daaraan skuldig bevind is, kan weer 'n ooreenkoms met Psemas aangaan.
Om bedrog verder hok te slaan, is meer as 17 000 afhanklikes, wat die ouderdomsperk vir lidmaatskap oorskry, van die stelsel afgehaal.
Die ministerie van finansies het 'n forensiese ondersoek na die eispatrone van verskaffers van gesondheidsdienste van stapel gestuur om moontlike bedrog by die staat se mediese fonds (Psemas) te ondersoek.
Onder meer is eise vir 'n intra-uteriene apparaat (IUD) en swangerskapverwante eise vir manlike pasiënte ingedien, asook eise vir die behandeling van 'n oorledene en vir twee besnydenisse van dieselfde manlike pasiënt.
Volgens die ministerie se uitvoerende direkteur, me. Erica Shafudah, is meer as N$13 miljoen reeds van verskaffers herwin waar eise verkeerdelik ingedien is.
'n Oorsig van verskaffers se eispatrone het 82 praktyke vir verdere ondersoek uitgesonder.
'n Mediese forensiese ondersoek is vir 'n tydperk van ses maande van 19 Maart verlede jaar af van stapel gestuur en is intussen verleng.
Uit die 82 praktyke wat geïdentifiseer is, is net 29 gevalle ondersoek omdat data-ontleding en -bevestiging tydrowend is.
Strafregtelike bedrogklagte is teen twee mediese praktyke en 'n apteek aanhangig gemaak, en een wat met 'n mediese tegnologie-praktyk verband hou.
By een praktyk is eise ingedien vir dienste wat nie gelewer is nie, en vir voorskrifte wat uitgereik is aan pasiënte wat nie deur 'n dokter ondersoek is nie.
Die tweede praktyk wat strafregtelike klagte in die gesig staar, het onder meer geëis vir die behandeling van 'n pasiënt wat oorlede is, vir twee besnydenisse van dieselfde manlike pasiënt, asook vir behandelings wat nooit ontvang is nie.
In die geval van die apteek het personeel kontantbetalings vir medisyne wanbestee van pasiënte wat nie lid van Psemas is nie en is eise vir Psemas-lede ingedien, wat dié medisyne nooit ontvang het nie.
Wat die mediese tegnologie-praktyk betref, is 'n lisensie van die ministerie van gesondheid en maatskaplike dienste (MoHSS) onder valse voorwendsels verkry.
Dokumente van 'n mediese tegnoloog is ook sonder die betrokke persoon, wat boonop elders werksaam is, se toestemming gebruik om 'n praktyknommer by die Vereniging vir Namibiese Mediese Fondse (Namaf) en 'n ooreenkoms met Psemas te kry.
Mediese tegnoloë wat aan die nuwe Psemas-kontrak verbonde is, het bedank, terwyl die oorblywende mediese tegnoloog se werkspermit verval het.
Voorts voldoen die laboratorium nie aan MoHSS-, Namaf- óf Psemas-vereistes nie.
PRAKTYK opgeskort
Van die bevindinge van die forensiese ondersoek verwys ook na 'n algemene praktyk waar 'n Psemas-ooreenkoms nie toegestaan is nie en die praktyk opgeskort is.
Dít nadat onder meer bevind is die betrokke praktyk het 'n ongewoon hoë voorkoms van eise vir mangeloperasies wat in 'n hospitaal uitgevoer is, maar waarvoor 'n eis ingedien is asof dit by die praktyk self uitgevoer is.
Dié praktyk het ook herhaaldelik eise vir IUD's – selfs vir 'n manlike pasiënt – gehad.
'n Siviele eis is teen 'n tandarts ingedien wat drie praktyke het, maar net een het 'n ooreenkoms met Psemas.
Tandheelkundeterapeute is in diens geneem om die werk van tandartse te doen.
Volgens Shafudah is twee werknemers van die ministerie van finansies vir die oortreding van die teenkorrupsiewet aangekla.
Die een werknemer het glo iemand, wat nie 'n staatsdienswerker is nie, by Psemas geregistreer en sowat N$138 000 se mediese eise ingedien.
Tydens die ouditproses is nog soortgelyke gevalle ontdek wat nou aan die Teenkorrupsiekommissie (ACC) oorhandig is.
Nog twee werknemers het pasiënte by Psemas geregistreer, wat nie vir die staat werk nie, en ook dié gevalle is aan die ACC vir strafregtelike vervolging oorhandig.
Volgens Shafudah sal alle gevalle van diensverskaffers wat in die ondersoek vir bedrog ontbloot is, aan die verwante owerhede oorhandig word.
Sy het verwys na die nuwe Psemas-kontrak wat in Mei 2018 in werking getree het om skuiwergate vir bedrog aan te spreek.
Voorgestelde veranderinge sal nou in die kontrak ingewerk word.
'n Swakplek is volgens Shafudah die gebrek aan 'n klousule vir diskwalifisering.
Dit beteken enige verskaffer wat vroeër vir bedrog ondersoek is of daaraan skuldig bevind is, kan weer 'n ooreenkoms met Psemas aangaan.
Om bedrog verder hok te slaan, is meer as 17 000 afhanklikes, wat die ouderdomsperk vir lidmaatskap oorskry, van die stelsel afgehaal.
Kommentaar
Republikein
Geen kommentaar is op hierdie artikel gelaat nie