Mangaan jaag weer stof op

Ministerie gee 'tydelike toestemming'

09 January 2019 | Omgewing
Jana-Mari Smith



Inwoners van Lüderitz is van vooraf omgekrap en bekommerd nadat bekend gemaak is Namport het Sondag minstens 240 ton mangaanerts ontvang en in twee skure by die hawe gestoor.

Verlede week het die ministerie van die omgewing en toerisme bevestig mangaanbedrywighede is nie die groen lig gegee nie, aangesien 'n omgewingsklaringsertifikaat nie uitgereik is nie. 'n Ondersoek is gedoen en die polisie het agt trokke gelaai met mangaanerts gekonfiskeer. Die trokke het uit Suid-Afrika gekom as deel van 'n uitvoerooreenkoms om die produk via Lüderitz na China te verskeep. Die drywers is te midde van inwoners se teenkanting beveel om nie die erts by 'n terrein naby die dorp af te laai nie. Inwoners sê dis 'n gevaarlike stof wat erge gesondheids- en veiligheidsrisiko's inhou vir die gemeenskap, die omgewing, die dorp se sakebedrywe en die mariene ekosisteem.

Namport se waarnemende bedryfshoof, mnr. Elias Mwenyo, het Maandag aan Namibian Sun bevestig die omgewingsministerie het “­tydelike toestemming” gegee vir Namport om Sondag die erts af te laai, terwyl die saak ondersoek en die uitreiking van die klaringsertifikaat oorweeg word.

“Die erts is veilig verskuif na die pakhuisgeriewe by die hawe volgens maatreëls en voorwaardes soos deur die ministerie bepaal.

Mwenyo het benadruk Namport het “deeglike risiko-bepaling gedoen . . . voor die aankoms van die produk op die perseel”.

“Gesondheids-, veiligheids- en omgewingskwessies is uitgewys en maatreëls is ingestel vir die veilige aflewering en bewaring van die kommoditeit in 'n geslote omgewing.”

Mwenyo het gesê Namport hou streng by die Internasionale Organisasie vir Standaarde (ISO) se vereistes en veroordeel alle optrede wat negatiewe gevolge vir die mens of omgewing sou hê.

Hy het gesê die besending bly geskut en onder toesig van die haweowerheid. Gereelde inspeksies word deur wetstoepassers gedoen.

Volgens Mwenyo is die tydelike reëling die beste oplossing aangesien die hawe die veiligste bewaringsopsies het.

'n Inwoner wat anoniem wou bly en vertroud is met die hawe se toestand en infrastruktuur, het saamgestem dat dit wel onder omstandighede die beste is, maar dit ook 'n magdom ander kwellinge skep. Hy het gesê die twee Rubb-strukture waarin die mangaan gestoor word, is nie na behore toe­gerus nie. Dit kan nie verseker word dat die water wat die produk klam moet hou, nie besoedelingsgevaar inhou vir die see waarin dié water uitloop nie. Die strukture het nie die vereiste “lussie-dreineringstelsel” wat skadelike stowwe versamel en filtreer nie.

“Namport het nou ander hawe­gebruikers blootgestel. Die hawe is sowat 500 meter lank en alles vind daar plaas: Passasiers gaan aan boord van skepe, bote met voorraad gebruik die hawe en vis word afgelaai. Die mangaan is nou reg in die middel afgelaai.”

Ander inwoners wat net so bekommerd en ook omgekrap is oor die gevare wat dit inhou, het hul tot sosiale media gewend.

In 'n telefoniese onderhoud het Mwenyo benadruk dit is nie die eerste keer dat Namport mangaanerts hanteer en bewaar nie. Derhalwe verseker hy die gemeenskap dat Namport deeglik toegerus is vir die taak.

Wat betref visbedrywe by die hawe, het hy gesê Namport hanteer ook dikwels ander hoërisikoprodukte soos swael en loodkonsentraat. “Dit is potensieel gevaarlike kommoditeite, maar bestaan saam met die visbedryf. Ek kan met trots sê daar was tot nou toe geen gevaarlike voorval wat skadelik vir die visnywerheid was nie.”

Talle Lüderitz-inwoners sê hulle staan nie die ontwikkeling van die dorp teen nie, maar dit kan nie ten koste van gesondheid en die omgewing gebeur nie.

Die mangaanerts is ingebring deur 'n Suid-Afrikaanse maatskappy, TradePort Namibia CC, een van twee wat in onderhandelinge met Namport is vir die hantering en uitvoer daarvan na China. Die ander maatskappy is Pektranam Logistics.

Mwenyo wou nie direk kommentaar lewer oor TradePort Namibia se besluit om die mangaan sonder 'n klaringsertifikaat of bestaande veiligheidsmaatreëls af te laai nie. Hy het wel gesê Namport ondersteun “die sakeonderneming, maar dit moet strook met Namibiese wette. Ons kan nie 'n proses onderhou wat die vereiste prosedures ondermyn nie.”

Wat betref die mangaan wat nog by die stortingsterrein is, het Namport navraag by die owerhede gedoen. Dit sal óf na die Rubb-strukture geskuif word, óf ander oplossings sal gevind word om stofbesoedeling te bekamp.

Soortgelyk

 

Mexikaanse sakeman wil Erindi koop

22nd of May 13:20 | Omgewing

Die internasionale entrepreneur, filantroop en president van die konsortium BAL-groep, mnr. Alberto Baillères, 'n gerespekteerde Mexikaanse sakeleier, is besig om die kooptransaksie met Erindi...

Katrina hoor Maandag 8 Julie

47 minute gelede | Howe

Denver Kisting – Regter Christie Liebenberg het vandag gesê hy sal nie later nie as 8 Julie uitspraak lewer in die verhoor van me. Katrina...

Theo Diergaardt voor vir beweerde bedrog

1 uur gelede | Misdaad

Denver Kisting – Die beheeraanklaer van die landdroshof in Windhoek, mnr. Hans Thourob, het bevestig mnr. Theo Diergaardt, oudminister van grondhervorming, is gister inhegtenis geneem.Volgens...

Windhoek se waterverbruik in die rooi

2 ure gelede | Omgewing

Die Windhoekse munisipaliteit sê oor die afgelope week het Windhoekers 7% meer water gebruik as wat huidige teikens vir waterbesparing toelaat. Die weeklikse teiken is...

Dit moes lankal gebeur het, sê Kanime.

3 ure gelede | Plaaslik

Denver Kisting – Oomblikke nadat hy gisteraand heraangestel is, het mnr. Abraham Kanime aan Republikein gesê dit moes lankal gebeur het.Die Windhoekse stadsraad het gisteraand...

Raad sit oor polisiehoof

13 ure gelede | Regering

Denver Kisting – Die Windhoekse stadsraad (CoW) sou gisteraand vir mnr. Abraham Kanime as hoof van die stadspolisie heraangestel het.Kanime is in Maart verlede jaar...

Windhoek droogste in 90 jaar

13 ure gelede | Weer

Ronelle Rademeyer - Die 2018-’19-reënseisoen sal vir die oorgrote deel van die land in die geskiedenisboeke opgeteken staan as van die droogste in menseheugenis.Die statistiek...

Katrina se lot gou bepaal

13 ure gelede | Howe

Denver Kisting – Onder gewone omstandighede is die staat se verantwoordelikheid om skuld bo redelike twyfel te bewys.In die geval van die oudgoewerneur van die...

Regstelling oor Zenobia Kloppers

13 ure gelede | Kuns en vermaak

Republikein het gister verkeerdelik berig Zenobia Kloppers, die bekende Namibiese aktrise en sanger wat die hoofrol in die rolprent Fiela se kind losgeslaan het, is...