Lin-Mari, ons nuwe goue stem
Sy hoop haar nuwe titel as Voice of Namibia kan nuwe geleenthede oor haar pad bring.
Yandi du Plessis – Vanjaar se soektog na die land se beste sangstem het op 9 Oktober tot 'n einde gekom toe die 20-jarige Lin-Mari Coetzee as die wenner van die vierde seisoen van die Voice of Namibia-sangkompetisie aangekondig is.
“Ek het dit regtig glad nie verwag nie! Ek het nog 'n rukkie bly staan, want ek het nie besef hulle het regtig my naam gesê nie. Ek was heel in skok en vol emosie,” vertel die boorling van Swakopmund oor die oomblik toe sy as die nuwe stem van Namibië gekroon is.
Sy vertel sy het nie eens verwag om die topdrie te haal nie.
“Dit was net ongelooflik. Dit het 'n tydjie gevat om in te sink, maar ek sal die oomblik nooit vergeet nie. Almal het so baie talent en soveel passie vir musiek gehad, so niemand kon eens raai wie hulle dínk sou wen nie. Dit was regtig 'n groot verrassing en ongelooflike gevoel!”
Lin-Mari sê sy het haarself nooit as 'n vermaaklikheidspersoonlikheid gesien nie. Maar toe sy vir die eerste keer in 2020 aan Voice of Namibia deelgeneem en tweede geëindig het, het sy 'n nuwe faset van haarself ontdek. “Dit het my uit my dop laat kruip en toe ek begin optree, was ek gaande daaroor.”
'n Definitiewe hoogtepunt in haar sangloopbaan, behalwe natuurlik dié nuwe toekenning, was om haar eerste enkelsnit “The Fool” op 20 Augustus uit te reik. Sy het glo dié liedjie binne tien minute geskryf.
Sy het destyds vertel die snit handel oor die oogklappe van die liefde. “Dis 'n wonderlike gevoel om 'n storie met my musiek te kan vertel en dit dan met die wêreld te deel. Ek is eintlik 'n liedjieskrywer – dít is my groot liefde.
“Ek het baie liedjies wat ek nog wil opneem en vrystel! Dié een was veral spesiaal, want dit is die eerste liedjie wat ek op kitaarklanke geskryf het,” vertel die jong sangeres wat al sedert haar kinderdae klavier speel. “Dit was iets heel nuuts vir my.”
Musiek is nog altyd 'n onvervangbare deel van haar lewe, en sy is in haar element wanneer sy agter die klavier inskuif of besig is om nuwe lirieke neer te pen. Haar ma is 'n kranige pianis wat haar geïnspireer het om haar eie musiektalent te ontwikkel.
Op skool het sy ook baie gedigte geskryf en het een dag besluit om haar passie vir poësie en klavier saam te voeg. Nét daar is die liedjieskrywer in haar gebore.
“Ek dink musiek is so ongelooflik, want jy kan ander mense iets laat voel met die melodie of met die woorde. Musiek is eindeloos – daar is iets vir almal, en dít is wat dit vir my so spesiaal maak. Elke mens het 'n gunstelingliedjie of iets waarmee hulle kan connect. Ek kan nie my lewe sonder musiek indink nie.”
Haar musieksmaak strek oor 'n breë spektrum, vertel sy. “Ek hou van kunstenaars soos Beth Hart, 'n blues-sangeres, The 1975 en van classics soos Bon Jovi. Ek hou van musiek wat my iets laat voel en ek hoop dít is wat my musiek aan ander mense doen.” Sy wil “eerlike” musiek skryf – musiek wat hopelik “praat met dié wat luister”.
NUWE TITEL
Lin-Mari hoop haar nuwe Voice of Namibia-titel kan nuwe, opwindende geleenthede oor haar pad bring. Sy beplan om nuwe musiek op te neem en vanjaar nog twee enkelsnitte uit te reik.
“Ek wil hê my musiek moet by soveel mense as moontlik uitkom en dat hulle my stories kan hoor.”
Die prysgeld wat sy ontvang het, is die kersie op die koek van dié ongelooflike mylpaal, en sy gaan dit in haar musiekloopbaan belê deur al die musiek op te neem wat sy kan en dalk selfs 'n musiekvideo te maak.
Lin-Mari is in Swakopmund gebore en het haar lewe lank daar gebly. Sy was min of meer 'n jaar lank in La Rochelle-meisieskool in die Wes-Kaap, maar het gou weer teruggekeer omdat sy te veel na haar “tuisdorpie” verlang het.
Daarna het sy haar skoolloopbaan by die Duitse privaatskool in Swakopmund voltooi. Sy vertel hoewel sy Afrikaans is, het sy baie Duits grootgeword.
Benewens haar ontluikende sangloopbaan, is Lin-Mari ook tans 'n regstudent aan die Universiteit van Namibië (Unam), wat sy baie geniet.
“Ek dink regte en musiek deel 'n ontmoetingspunt. In albei probeer jy mense van jou siening oortuig,” het sy in Augustus in 'n onderhoud met Erongo gesê.
Musiek is vir haar 'n manier om haar gedagtes 'n blaaskans van al die werk te gee. “Ek het 'n goeie balans gevind.”
Volgens Alinda Lu'Mar, die stigter en eienaar van Voice of Namibia, is die doel van dié sangkompetisie om 'n platform te bied om sangtalent in Namibië op 'n prestige vlak te ontdek. Sy sê dit lewer al sedert die instelling in 2018 verstommende resultate. Die kompetisie gee aan opkomende plaaslike sangers die geleentheid om hul vokale vermoëns ten toon te stel, en groei steeds elke jaar.
– [email protected]
“Ek het dit regtig glad nie verwag nie! Ek het nog 'n rukkie bly staan, want ek het nie besef hulle het regtig my naam gesê nie. Ek was heel in skok en vol emosie,” vertel die boorling van Swakopmund oor die oomblik toe sy as die nuwe stem van Namibië gekroon is.
Sy vertel sy het nie eens verwag om die topdrie te haal nie.
“Dit was net ongelooflik. Dit het 'n tydjie gevat om in te sink, maar ek sal die oomblik nooit vergeet nie. Almal het so baie talent en soveel passie vir musiek gehad, so niemand kon eens raai wie hulle dínk sou wen nie. Dit was regtig 'n groot verrassing en ongelooflike gevoel!”
Lin-Mari sê sy het haarself nooit as 'n vermaaklikheidspersoonlikheid gesien nie. Maar toe sy vir die eerste keer in 2020 aan Voice of Namibia deelgeneem en tweede geëindig het, het sy 'n nuwe faset van haarself ontdek. “Dit het my uit my dop laat kruip en toe ek begin optree, was ek gaande daaroor.”
'n Definitiewe hoogtepunt in haar sangloopbaan, behalwe natuurlik dié nuwe toekenning, was om haar eerste enkelsnit “The Fool” op 20 Augustus uit te reik. Sy het glo dié liedjie binne tien minute geskryf.
Sy het destyds vertel die snit handel oor die oogklappe van die liefde. “Dis 'n wonderlike gevoel om 'n storie met my musiek te kan vertel en dit dan met die wêreld te deel. Ek is eintlik 'n liedjieskrywer – dít is my groot liefde.
“Ek het baie liedjies wat ek nog wil opneem en vrystel! Dié een was veral spesiaal, want dit is die eerste liedjie wat ek op kitaarklanke geskryf het,” vertel die jong sangeres wat al sedert haar kinderdae klavier speel. “Dit was iets heel nuuts vir my.”
Musiek is nog altyd 'n onvervangbare deel van haar lewe, en sy is in haar element wanneer sy agter die klavier inskuif of besig is om nuwe lirieke neer te pen. Haar ma is 'n kranige pianis wat haar geïnspireer het om haar eie musiektalent te ontwikkel.
Op skool het sy ook baie gedigte geskryf en het een dag besluit om haar passie vir poësie en klavier saam te voeg. Nét daar is die liedjieskrywer in haar gebore.
“Ek dink musiek is so ongelooflik, want jy kan ander mense iets laat voel met die melodie of met die woorde. Musiek is eindeloos – daar is iets vir almal, en dít is wat dit vir my so spesiaal maak. Elke mens het 'n gunstelingliedjie of iets waarmee hulle kan connect. Ek kan nie my lewe sonder musiek indink nie.”
Haar musieksmaak strek oor 'n breë spektrum, vertel sy. “Ek hou van kunstenaars soos Beth Hart, 'n blues-sangeres, The 1975 en van classics soos Bon Jovi. Ek hou van musiek wat my iets laat voel en ek hoop dít is wat my musiek aan ander mense doen.” Sy wil “eerlike” musiek skryf – musiek wat hopelik “praat met dié wat luister”.
NUWE TITEL
Lin-Mari hoop haar nuwe Voice of Namibia-titel kan nuwe, opwindende geleenthede oor haar pad bring. Sy beplan om nuwe musiek op te neem en vanjaar nog twee enkelsnitte uit te reik.
“Ek wil hê my musiek moet by soveel mense as moontlik uitkom en dat hulle my stories kan hoor.”
Die prysgeld wat sy ontvang het, is die kersie op die koek van dié ongelooflike mylpaal, en sy gaan dit in haar musiekloopbaan belê deur al die musiek op te neem wat sy kan en dalk selfs 'n musiekvideo te maak.
Lin-Mari is in Swakopmund gebore en het haar lewe lank daar gebly. Sy was min of meer 'n jaar lank in La Rochelle-meisieskool in die Wes-Kaap, maar het gou weer teruggekeer omdat sy te veel na haar “tuisdorpie” verlang het.
Daarna het sy haar skoolloopbaan by die Duitse privaatskool in Swakopmund voltooi. Sy vertel hoewel sy Afrikaans is, het sy baie Duits grootgeword.
Benewens haar ontluikende sangloopbaan, is Lin-Mari ook tans 'n regstudent aan die Universiteit van Namibië (Unam), wat sy baie geniet.
“Ek dink regte en musiek deel 'n ontmoetingspunt. In albei probeer jy mense van jou siening oortuig,” het sy in Augustus in 'n onderhoud met Erongo gesê.
Musiek is vir haar 'n manier om haar gedagtes 'n blaaskans van al die werk te gee. “Ek het 'n goeie balans gevind.”
Volgens Alinda Lu'Mar, die stigter en eienaar van Voice of Namibia, is die doel van dié sangkompetisie om 'n platform te bied om sangtalent in Namibië op 'n prestige vlak te ontdek. Sy sê dit lewer al sedert die instelling in 2018 verstommende resultate. Die kompetisie gee aan opkomende plaaslike sangers die geleentheid om hul vokale vermoëns ten toon te stel, en groei steeds elke jaar.
– [email protected]
Kommentaar
Republikein
Geen kommentaar is op hierdie artikel gelaat nie