Lang rye, kort lonte op Buitepos

Henriette Lamprecht - Teen middernag Saterdag was sowat 'n 100 besoekers aan Namibië in 'n niemandsland gestrand.

Dít nadat die grenspos op Buitepos moes sluit voor hulle geholpe was.

Paspoorte is inderhaas gestempel sonder dat die nuwe roete van foto's en vingerafdrukke gevolg is, wat gesorg het vir ellelange rye en 'n proses wat teen 'n slakkepas verloop het.

Volgens die eienaar van die ­vulstasie en ruskamp op Buitepos wissel die ry van 60 tot 80 voertuie, met 25 vrag­motors wat Sondagaand ook moes toustaan.

'n Doring in die vlees is die nuwe stelsel wat in Desember, “ons besigste maand”, in werking getree het, sê mnr. Deon van Vuuren.

“Personeel is nie gereed hiervoor nie en is so ongeduldig en onverdraagsaam, dis 'n verleentheid vir Namibië.”

Saterdagaand het 'n 100 mense gewag om gehelp te word, en die prosessering van 'n enkele gesin het tot vier ure geduur.

'n Vrou het weens die hitte flou geword, terwyl 'n ander, wat uit die ry beweeg het om toilet toe te gaan, met haar terugkoms amper 'n mini-oorlog veroorsaak het.

“Sy het weer in haar 'ou' plek ingeval, terwyl ander daarop aangedring het dat sy weer agter in die ry inval.”

Veral gesinne met klein kindertjies kry swaar met die ure lange gewag.

“Daar is nie sitplek nie, so hulle moet heeltyd in die kar sit. Oumense word gehelp, maar dan moet hulle in elk geval in die kar saam met die res wag.”

Volgens Van Vuuren is die ruskamp volbespreek en vakansiegangers moet noodgedwonge in die donker na hul volgende bestemming reis.

“Ek hoop iemand skrik iewers wakker, want dis 'n helse verleentheid.”

Intussen berig Des Erasmus op Swakopmund vakansiegangers uit Suid-Afrika op die roete deur Botswana na die kusdorpe Hentiesbaai, Swakopmund en Walvisbaai het Sondagmiddag die pad op die grens by Buitepos versper waar verkeer ure lank vertraag is.

Die omgekrapte gaste het daarop aangedring dat swaar voertuie nie voorrang op die roete moes kry nie.

Me. René Beukes van Polokwane het op Hentiesbaai aan Republikein gesê bestuurders van vakansiegangers se voertuie het saamgespan en 'n versperring by die hek gevorm om gewone voertuie ook deur te laat met grenspersoneel wat net op die lorries ingestel was.

Beukes se geselskap moes langer as drie ure wag om van Botswana op Namibiese grondgebied te kom.

Die vertraging het haar geselskap verplig om in Windhoek te oornag terwyl hulle volgens hul reisplan reeds Sondagaand op Hentiesbaai sou wees.

Van die vakansiegangers op die roete na Namibië het ook by die grenspos omgedraai en teruggegaan huis toe.

“Julle sien ons nie weer nie,” het 'n bestuurder by sy venster uitgeroep.

Op Walvisbaai het nog 'n groep ­vakansiegangers uit Suid-Afrika vertel hoe hul reis met sewe uur vertraag is.

Die eerste drie uur moes hulle by die grenspos Slangnek tussen Suid-Afrika en Botswana wag en daarna nóg vier ure by Buitepos.

Dít terwyl hulle die toilet- en ander geriewe as vuil beskryf het en daar nie eens 'n winkel in sig was vir 'n koeldrank of iets te ete nie.

Die vertragings het 'n onverwagse oplewing in oornagplekke op Gobabis meegebring.

Van die boere in die omgewing wat van die oponthoud verneem het, het oorgery en oornagplek aan van die ­besoekers gebied.

Oor die vertragings het die besoekers op Walvisbaai vertel hoe al 10 vingers van albei hul hande se afdrukke geneem is en hoe die skanderingsprosesse sukkel-sukkel verloop het.

“En net wanneer alles feitlik afgehandel is, was daar 'n onverwagse lynonderbreking en moes alles oor gedoen word,” het een gesê.