Landbou en ekonomiese herskikking

Dr. Kobus Laubscher Namate die ekonomie begin stabiliseer soos die land deur die verskillende vlakke van die inperking beweeg, is daar met reg kommer oor die beplanning van dié herskikking. Landbou se rol in die ekonomiese herskikking is van onbetwisbare belang, trouens, daarsonder sal die pasiënt sonder een van sy krukke moet klaarkom, al is albei sy knieë spreekwoordelik lam! Daar is 'n meesterplan op die tafel, maar dié dreig om vroeg-vroeg te ontspoor omdat belangrike kragte binne die sektor nie volledig genoeg verreken word nie. Die staat kan nie die heropbouing alleen aanpak nie. Daar waar die private sektor wil saamwerk, geld voorskrifte wat hulle laat wegskram. Dit is byvoorbeeld algemene kennis dat die meeste ingrype vanaf regeringskant as gevolg van 'n klomp redes hopeloos gefaal het, maar nogtans bly die betrokke departemente tegnies in die pad van wat redelikerwys gedoen moet word. DIE MAG VAN DIE SWAARDVorige strategiese beplannings se begrotingsbesteding het telkens doelwitte gemis. Die implementering van planne is en was deurspek met onbeholpenheid, maar is afgedwing deur middel van die mag van die swaard – die staat het in vele opsigte deur middel van wette en regulasies uitkomste probeer rig, sonder om die teiken te tref. Vir talle in die ontluikende landboubedryf is hul drome in ellende gedompel. Daardie planne kon in die meeste gevalle nie naastenby die uitdagings oorkom nie. Om onder omstandighede van beperkende fiskale vermoë dieselfde planne te wil afstof vir implementering tydens die pandemie, grens aan kriminaliteit. Ons weet dat die meeste departemente al in die laaste kwartaal van die finansiële jaar nie eers oor genoeg geld beskik het om te reis nie. Noodsaaklike dienste is gewoon ingekort en amptenare was vasgekluister agter hul lessenaars. Om dié toedrag van sake te beskryf, het 'n boer opgemerk dat daardie amptenare wat so moet sit (en dus nie plase kan besoek nie) op “volspoed” is wat hulpverlening betref. Dit is tragies en om van te ween, sou dieselfde boer opmerk wanneer hy telkens met leë hande die pad terug na 'n bankrot plaas moet vat. Bygesê, hy het aanvanklik op die plaas danksy staatshulp beland, maar is sedertdien aan sy eie lot oorgelaat sonder die nodige bedryfskapitaal en voorligting.REËNDANSDie situasie vergelyk met die waarde wat voorgeslagte aan die sogenaamde reëndanse geheg het. Die feit dat dit tydens of ná sulke danse gereën het, was dalk bloot toevallig, maar het die idee geskep dat die dansers van voldoende watervoorsiening in beheer was. Geen reëndans gaan egter dié keer werk nie, want die klem het verskuif. Tot op hede is maatskappye by wyse van beïnvloeding (Engels: lobbying) strategies deur hul leiers gerig met die fokus op die bestuur van die waarskynlike. In so 'n proses word probleme en uitdagings aan die hand van sogenaamde standaardprosedures oorweeg.Nuwe probleme is tegnies en dikwels deur veral goeie finansiële ingenieurswese, afgebreek om die toepassing van vorige oplossings te regverdig. Goeie leierskap is beskou as die vermoë om te weet waarheen die onderneming gelei moet word – bykans soos om heldersiende te wees. Scenario's word ontwikkel aan die hand van al hoe meer komplekse modelle en te midde van baie onsekerheid. Volgens sekere denkskole het dit skynbaar stabiliteit tot gevolg gehad. Aanhangers van dié filosofieë het egter skeppende denke ingeperk en wanneer besluit is op die sogenaamde “regte strategie”, het implementering te dikwels tot verspilde energie gelei. Daar moes baie oorreding gedoen word om almal te laat glo so 'n instansie is op koers.Wat egter nou nodig is, is dat leiers op die moontlike fokus. Om dit te laat werk, moet daar ánderste en méér vrae gevra word. Ons het dikwels by moontlike oplossings verbygekyk omdat alle tersaaklike moontlikhede nie behoorlik beredeneer is nie. Die uitgangspunt was om die probleem te panel beat totdat dit op 'n antwoord uitloop. Wat nou nodig is, is om alternatiewe te ontwikkel. Hieruit moet ons kies sodat ons kan bereik wat dalk tot nou toe as die onmoontlike beskou is.

Landbou en ekonomiese herskikking

Kommentaar

Republikein 2025-07-02

Meld asseblief aan om kommentaar te lewer

Landbou en ekonomiese herskikking

Kommentaar

Republikein 2025-07-02

Meld asseblief aan om kommentaar te lewer

MELD AAN

Advertensie