Kyk saam na finale, waar jy ook al is

21 October 2021 | Sport
Andrew Poolman – Komende Saterdag se drie eindstryde van die Namibië Rugby-unie (NRU) se eerste liga, reserweliga en premierliga sal regstreeks op die Facebook-blad van Republikein gebeeldsend word.

Vir dié produksie deur NMH Events sal soos gebruiklik ’n stewige spannetjie werknemers van Namibia Media Holdings voor én agter die skerms werksaam wees.

Die maatskappy het hom die afgelope jare – selfs voordat die Covid-19-pandemie so ’n groot demper op toeskouers se bywoning van sportgeleenthede geplaas het – reeds op regstreekse beeldsending van sport- en ander geleenthede begin toespits.

Skolesport soos die Momentum-rugbyligas, interhoërbyeenkomste of die Gravity Cup; dekking van die afgelope jare se Nedbank Desert Dash bergfietsritte tussen Windhoek en Swakopmund asook die eindrondes van netbal- en hokkieligas is ook aan kykers gebring, ongeag waar in die wêreld hulle mag wees.

Verdere belegging in opleiding en behoorlike toerusting vir die uitsaaibedryf, asook die opgeboude ondervinding oor die afgelope jare, het NMH in staat gestel om die gehalte van sy produksie algaande te verhoog.

In die proses is ook reise na bestemmings buite die hoofstad aangepak – soos die Woestynfees van skolesport op Walvisbaai, en die klubrugbywedstryde in Rehoboth en Grootfontein vroeër vanjaar.

DIE SPAN

Deeglike beplanning en ’n ware spanpoging voor én agter die kameras is nodig om so ’n produksie vlot te laat verloop en om flaters te vermy wat maklik die kyker se ondervinding kan bederf.

Dani Booysen, die redakteur van Republikein, was in die afgelope weke se uitsendings van die klubrugby meestal ons aanbieder voor die kameras. Die stem van ons kommentator Fanie Cronjé, die bekende afslaer, sal ook bekend wees aan diegene wat tevore na enige van ons uitsendings gekyk het.

Agter die skerms is egter die grootste deel van die span wat die onontbeerlike rolle vervul. Drie lede word toegeken om elkeen ’n kamera te beman wat hopelik die beste moontlike kykershoek kan bied namate die spel oor die veld beweeg.

’n “Geheime wapen” is die hommeltuie (meestal een, soms twee) wat die kamerahoek vanuit die hoogte op die speelveld bied. Hiervoor is uiteraard ook een (of twee) kundige operateurs nodig.

Nog een se taak is om die telbord in die hoek van die kyker se skerm tydig op datum te hou.

Vir die grafiese ontwerper moet die meeste van sy werk reeds voor die wedstryd klaar wees, om seker te maak dat van die voorbereide inligting oor die wedstryd kykbaar aangebied word.

Nog ’n hand is nodig om ons sosialemediabladsye met die nuutste verwikkelinge op datum te hou en ook op gegewe tye van die aksiefoto’s te publiseer wat deurentyd deur die aangewese fotograaf langs die veld geneem word.

Binne-in ons mobiele ateljee – en verskoon maar die gebruik van die meer algemeen bekende Engelse terminologie – werk mense soos die “mixer” en die “boxer”, wat op die regte oomblikke die inkomende beeld van verskillende kameras moet kies wat vertoon moet word, of wat insetsels soos die naam van die persoon in beeld of ander inligting moet invoeg.

Twee tegniese personneellede sal uiteraard ook komende naweek betrokke wees om al die vooraf werk van kabelverbindings te hanteer, te verseker die klankgehalte is na wense en om asook om gedurende die dag enige ander moontlike tegnologiese probleme in die kiem te smoor.

Ons oorhoofse spankoördineerder vir die naweek, Natalie van Wyk, is in beheer om toe te sien dat die trein teen die regte tempo op spoor bly.

KOMENDE NAWEEK

Die NRU-eindstryde sal om 12:00 begin tussen die twee voorste spanne in die eerste liga – Sparta van Walvisbaai teen FNB Unam se derde span.

• Om 14:15 volg die reserweliga se finaal tussen FNB Kudus II (Walvisbaai) en die huidige titelhouer, FNB Wanderers II.

In vorige jare het die Wit Hingste se paaie in die reserweliga-eindstryd meestal met Unam se tweede span gekruis, maar dié het laas naweek op hul tuisveld met ’n enkele punt (16-15) teen Kudus II vasgeval.

Die heelagter Algirnon Kolz het Kudus se enigste drie gedruk, terwyl losskakel Ulriato Lawrence die Walvisbaaiers se skopheld vir die dag was met ’n doelskop en drie strafdoele.

Wanderers II was in die semifinaal op sy tuisveld met rustyd 8-9 agter teen FNB Western Suburbs II, maar het sy voete gevind om danksy drieë deur losskakel Johan Zaayman (2), linkervleuel Allistor Jacobs, senter en kaptein Bredell Wessels en slot Johan Meyer ’n gemaklike oorwinning met 32-17 te behaal.

Die skrumskakel Oela Blaauw het as skopper begin met ’n strafdoel, maar het toe ’n rooi kaart vir ’n boorvat gekry, terwyl die haker Giel Blaauw ook vir tien minute in die koelkas was. Wessels het later met twee doelskoppe geslaag.

• Die hoofwedstryd, bestem vir ’n afskop om 16:30, sal ’n baie kompeterende NRU premierliga-eindstryd tussen FNB Unam en FNB Wanderers wees, wat eerste en tweede op die puntelys geëindig het.

FOTO’s
Anousga Routh (voor) en Gabriela Dawids.
Selvanus Valombola agter die kamera tydens Andrew Poolman se onderhoud met FNB Unam se afrigter, mnr. Johan Diergaardt.

Johan Zaayman Junior van FNB Wanderers se tweede span word deur sy kaptein Bredell Wessels gelukgewens met sy tweede drie in die semifinaal. Foto Andrew Poolman

Richard Botha aan die werskaf tydens die voorbereiding om FNB Grootfontein se tuiswedstryd teen FNB Kudus te beeldsend.

Soortgelyk

 

Gevalle styg met 41%, moontlike aanvang van vierde golf

1 uur gelede | Gesondheid

Die aantal Covid-gevalle in die land het binne 'n dag met 41% gestyg. Volgens die minister van gesondheid en maatskaplike dienste, dr. Kalumbi Shangula, kan...

Chelsi bekoor in unieke kostuum

15 ure gelede | In beeld

Die Mej. Namibië-organisasie het gister die kostuum onthul wat Chelsi Shikongo op 12 Desember sal dra wanneer sy die land by die Mej. Heelal-skoonheidskompetisie in...

Eksamenbedrog: 32 vraestelle kry voete

15 ure gelede | Ministeries

Henriette Lamprecht'n Reuse-terugslag vir die on­skuldige kandidate wat 'n kans gestaan het om die eksamen met vlieënde vaandels te slaag. Dit was die algemene gevoel...

Houtskoolbedryf uit miljoene bedrieg

15 ure gelede | Misdaad

Nuusredaksie‘n Vermeende sindikaat wat glo met die depositogeld van Suid-Afrikaanse kopers vir Namibiese hout- en houtskoolvragte verdwyn, bosboupermitte vervals en na bewering die bedryf met...

LPM neem hoofstad se leisels oor

15 ure gelede | Regering

Sade Gawanas, Windhoek-burgemeester; “Windhoek verdien net die beste van almal.”;

Weer vir 2 Desember 2021

15 ure gelede | Weer

BINNELAND: Gedeeltelik bewolk en warm tot baie warm met enkele donderbuie in die noorde, ooste en suidooste. KUS: Gedeeltelik bewolk en koel tot warm met...

Meer as N$200 m. jaarliks vir ARV’s

15 ure gelede | Gesondheid

Henriette LamprechtSowat 8,3% van die Namibiese bevolking is MIV-positief, met meer as 93% van volwassenes en 81% van kinders wat kwalifiseer om antiretrovirale behandeling te...

Florin soek sy vryheid

15 ure gelede | Howe

Jana-Mari Smith - Die aansoek waarin Thomas Adolf Florin (54), na wie destyds as die slagter van Swakopmund verwys is, poog om ná byna 22...

Mediavakbond ontvang opleiding

15 ure gelede | Arbeid

Augetto Graig Die direkteur van die Internasionale Federasie van Joernaliste (IFJ) se Afrika-kantoor, mnr. Pa Louis Thomasi, het verlede Vrydag en Saterdag ’n slypskool saam...