Kus bou eie isolasie-eenheid
Die gemeenskap het saamgespan om binne die volgende drie weke 'n noodeenheid vir Covid-19-pasiënte op Walvisbaai op te rig.
Leandrea Louw
'n Sooispitseremonie vir die bou van 'n isolasie-eenheid vir Covid-19-gevalle aan die kus het Donderdag op Walvisbaai plaasgevind.
Die eenheid sal 150 pasiënte kan huisves en sluit ablusiegeriewe, behuising vir werknemers, 'n kombuis en 'n lykshuis in.
Dit sal nie as 'n private óf staatseenheid geklassifiseer word nie en is slegs vir die isolasie van Covid-19-pasiënte.
Volgens mnr. Knowledge Iipinge, raadslid van die Walvisbaai- stedelike kiesafdeling, is die onderskeid tussen privaat of staatseenheid tans nie tersaaklik nie.
“Die private sektor én staatsamptenare is op die ramprisikobestuurkomitee. Ons werk as 'n gemeenskap saam vir ons gemeenskap,” het hy tydens die seremonie gesê.
Die eenheid sal na verwagting binne die volgende drie weke operasioneel wees.
“Bouwerk het reeds begin. Vraghouers is bestel en voorbereiding het reeds begin,” het hy gesê.
Iipinge het mense in die streek aangemoedig om die tolvrye nommer te skakel indien hulle vermoed hulle het die virus.
“Slegs as jy as 'n moontlike risiko beskou word, sal die ministerie 'n ambulans stuur om jou op te laai en na die eenheid te bring. Ons raai mense af om die eenheid op eie inisiatief te besoek.”
Volgens mnr. Matthias Braune, Welwitschia-hospitaal se uitvoerende hoof, is die eenheid deel van die Corona Care-veldtog wat verlede week van stapel gestuur is.
“Die doel is om die gemeenskap te betrek en die nodige befondsing te kry om die staatshospitale op Walvisbaai en Swakopmund te ondersteun. Ons moet gereed wees vir sowat 28 000 pasiënte wat suurstof gaan nodig hê. Hierdie raming is in samewerking met die Universiteit van Bern in Lausanne in Switserland, asook die Namibiese Longkliniek op Walvisbaai gedoen. As ons Walvisbaai, Swakopmund, Arandis en Hentiesbaai in ag neem, is dít die getal pasiënte waarvoor ons gereed moet wees,” sê hy.
Volgens Braune was die reaksie op die veldtog oorweldigend.
Die eenheid gaan in vraghouers gehuisves word.
“'n Maatskappy is tans met die bou van die eenheid besig. Een vraghouer met suurstof- en suiertoerusting kan 75 pasiënte van suurstof verskaf. Ons het twee masjiene bestel, wat beteken ons kan 150 pasiënte help.”
Walvisbaai se staatshospitaal sal dié eenheid later weer kan gebruik.
“Die idee was om die Walvisbaai-staatshospitaal met 'n 20-bedsaal toe te rus, maar dit was nie lewensvatbaar nie. Ons berei vir meer gevalle voor, maar hopelik gebeur dit nie,” sê Braune.
Volgens mnr. Johny Doeseb, voorsitter van die Namibiese Kamer van Handel en Nywerheid (NCCI), het die sakegemeenskap gehelp om hulpbronne vir die oprigting van die eenheid beskikbaar te maak.
“Besighede is gewillig om geld, materiaal en tyd te skenk. Die eenheid is 'n simbool van hoop vir ons gemeenskap. Ons kan nie bekostig om een lewe op Walvisbaai weens die virus te verloor nie. Die virus onderskei nie tussen ryk en arm nie, hy sien geen kleur nie. Ons weet wat dit aan ons ekonomie kan doen. Ons eerste prioriteit is om lewens te red en daarná om op die ekonomie te fokus.”
'n Aanvullende fonds sal ook as deel van die Corona Care-veldtog gestig word.
Mnr. Charles Neidel, administratiewe beampte van die Walvisbaai- stedelike kiesafdeling, het 'n beroep op die gemeenskap gedoen om N$30 per persoon by te dra.
“Die geld sal aangewend word om ontsmetmiddels te koop. Dit sal ook as fonds dien om klein ondernemings ná die hokperiode 'n hupstoot te gee.”
Die Walvisbaai- stedelike kiesafdeling het N$130 000 aan die fonds geskenk.
Die isolasie-eenheid sal ongeveer N$6 miljoen kos.
“Ons het belanghebbendes en besighede genader om met die oprigting van die eenheid te help. Party mense het reeds toerusting en vaardighede bygedra, wat die koste beslis sal raak. Ons is besig om geld in te samel,” sê Iipinge.
Bykomend is twee noodvliegtuie beskikbaar gestel om met die vervoer van personeel en mediese voorraad te help.
“Die eenheid is oop vir enigiemand van ons streek. Die komitee vir ramprisikobestuur het ook 'n reaksieplan opgestel wat met die verskillende belanghebbendes gedeel sal word.”
Iipinge sê daar is tans geen tyd vir burokrasie nie.
“Ons verantwoordelikheid is teenoor die gemeenskap. Ek is nie gepla oor geld of waar dit vandaan kom nie.”
Die gemeenskap kan vaardighede óf geld bydra.
Belangstellendes kan 'n e-pos na [email protected] stuur, of 'n skenking aan First National Bank, rekeningnommer 622 71 71 7286, Walvisbaai-taknommer 282 172 maak.
– [email protected]
'n Sooispitseremonie vir die bou van 'n isolasie-eenheid vir Covid-19-gevalle aan die kus het Donderdag op Walvisbaai plaasgevind.
Die eenheid sal 150 pasiënte kan huisves en sluit ablusiegeriewe, behuising vir werknemers, 'n kombuis en 'n lykshuis in.
Dit sal nie as 'n private óf staatseenheid geklassifiseer word nie en is slegs vir die isolasie van Covid-19-pasiënte.
Volgens mnr. Knowledge Iipinge, raadslid van die Walvisbaai- stedelike kiesafdeling, is die onderskeid tussen privaat of staatseenheid tans nie tersaaklik nie.
“Die private sektor én staatsamptenare is op die ramprisikobestuurkomitee. Ons werk as 'n gemeenskap saam vir ons gemeenskap,” het hy tydens die seremonie gesê.
Die eenheid sal na verwagting binne die volgende drie weke operasioneel wees.
“Bouwerk het reeds begin. Vraghouers is bestel en voorbereiding het reeds begin,” het hy gesê.
Iipinge het mense in die streek aangemoedig om die tolvrye nommer te skakel indien hulle vermoed hulle het die virus.
“Slegs as jy as 'n moontlike risiko beskou word, sal die ministerie 'n ambulans stuur om jou op te laai en na die eenheid te bring. Ons raai mense af om die eenheid op eie inisiatief te besoek.”
Volgens mnr. Matthias Braune, Welwitschia-hospitaal se uitvoerende hoof, is die eenheid deel van die Corona Care-veldtog wat verlede week van stapel gestuur is.
“Die doel is om die gemeenskap te betrek en die nodige befondsing te kry om die staatshospitale op Walvisbaai en Swakopmund te ondersteun. Ons moet gereed wees vir sowat 28 000 pasiënte wat suurstof gaan nodig hê. Hierdie raming is in samewerking met die Universiteit van Bern in Lausanne in Switserland, asook die Namibiese Longkliniek op Walvisbaai gedoen. As ons Walvisbaai, Swakopmund, Arandis en Hentiesbaai in ag neem, is dít die getal pasiënte waarvoor ons gereed moet wees,” sê hy.
Volgens Braune was die reaksie op die veldtog oorweldigend.
Die eenheid gaan in vraghouers gehuisves word.
“'n Maatskappy is tans met die bou van die eenheid besig. Een vraghouer met suurstof- en suiertoerusting kan 75 pasiënte van suurstof verskaf. Ons het twee masjiene bestel, wat beteken ons kan 150 pasiënte help.”
Walvisbaai se staatshospitaal sal dié eenheid later weer kan gebruik.
“Die idee was om die Walvisbaai-staatshospitaal met 'n 20-bedsaal toe te rus, maar dit was nie lewensvatbaar nie. Ons berei vir meer gevalle voor, maar hopelik gebeur dit nie,” sê Braune.
Volgens mnr. Johny Doeseb, voorsitter van die Namibiese Kamer van Handel en Nywerheid (NCCI), het die sakegemeenskap gehelp om hulpbronne vir die oprigting van die eenheid beskikbaar te maak.
“Besighede is gewillig om geld, materiaal en tyd te skenk. Die eenheid is 'n simbool van hoop vir ons gemeenskap. Ons kan nie bekostig om een lewe op Walvisbaai weens die virus te verloor nie. Die virus onderskei nie tussen ryk en arm nie, hy sien geen kleur nie. Ons weet wat dit aan ons ekonomie kan doen. Ons eerste prioriteit is om lewens te red en daarná om op die ekonomie te fokus.”
'n Aanvullende fonds sal ook as deel van die Corona Care-veldtog gestig word.
Mnr. Charles Neidel, administratiewe beampte van die Walvisbaai- stedelike kiesafdeling, het 'n beroep op die gemeenskap gedoen om N$30 per persoon by te dra.
“Die geld sal aangewend word om ontsmetmiddels te koop. Dit sal ook as fonds dien om klein ondernemings ná die hokperiode 'n hupstoot te gee.”
Die Walvisbaai- stedelike kiesafdeling het N$130 000 aan die fonds geskenk.
Die isolasie-eenheid sal ongeveer N$6 miljoen kos.
“Ons het belanghebbendes en besighede genader om met die oprigting van die eenheid te help. Party mense het reeds toerusting en vaardighede bygedra, wat die koste beslis sal raak. Ons is besig om geld in te samel,” sê Iipinge.
Bykomend is twee noodvliegtuie beskikbaar gestel om met die vervoer van personeel en mediese voorraad te help.
“Die eenheid is oop vir enigiemand van ons streek. Die komitee vir ramprisikobestuur het ook 'n reaksieplan opgestel wat met die verskillende belanghebbendes gedeel sal word.”
Iipinge sê daar is tans geen tyd vir burokrasie nie.
“Ons verantwoordelikheid is teenoor die gemeenskap. Ek is nie gepla oor geld of waar dit vandaan kom nie.”
Die gemeenskap kan vaardighede óf geld bydra.
Belangstellendes kan 'n e-pos na [email protected] stuur, of 'n skenking aan First National Bank, rekeningnommer 622 71 71 7286, Walvisbaai-taknommer 282 172 maak.
– [email protected]
Kommentaar
Republikein
Geen kommentaar is op hierdie artikel gelaat nie