Republikein Newspaper

By die Night Under the Stars (NUTS)-konsert wat op Vrydag 1 Oktober plaasvind, sal die plaaslike musikant Cassidy op die verhoog te sien wees. Dié kunstenaar se nuwe album word more (28 September) uitgereik en hy sal sy nuutste snitte Vrydagaand vir die eerste keer op die verhoog uitvoer.
Cassidy Karon is ’n veelsydige musikant en g’n vreemdeling op die plaaslike musiektoneel nie. Daarbenewens is hy ook ’n mode-ontwerper, liedjieskrywer en vervaardiger. As lid van die hip-hop-duo Paradox het hy sewe Namibiese Jaarlikse Musiektoekennings (NAMAs) ingepalm en hy is verlede jaar weer in vier kategorieë benoem. Hy het ook al op internasionale televisiekanale soos CNN verskyn.
“Ek is 'n elektroniese musikant. Eksperimentering is deel van my identiteit as kunstenaar,” sê Cassidy, wat homself as 'n “student van die lewe” beskou. Hy skryf oor die alledaagse lewe in Katutura en sy persoonlike ervarings “vanuit ’n perspektief van waardering”.
Hy het ’n droom om 'n katalisator vir verandering in sy gemeenskap te wees. “Ek versprei 'n verhaal van hoop en die oorkoming van struikelblokke wat ons in ons gemeenskappe ondervind. Ek het die Namibiese stryd beleef, asook Namibiese oorwinning op die hoogste vlak. Ek is trots om swart en van Katutura te wees,” het hy gesê.
Cassidy is van mening dat diegene op die plaaslike musiektoneel bang is om die grense van kreatiwiteit uit te daag, en moedig die bedryf aan om nié te bekommerd te wees oor tendense in die musiekbedryf nie en eerder op kreatiewe ontwikkeling te fokus.
Besoek www.goethe.de/namibia vir meer inligting oor projekte en dienste wat die Goethe-Institut aanbied.