Kospakkies uitgedeel

Sowat 6 000 huisgesinne en byna 28 000 behoeftige inwoners gaan baat by ''n inisiatief deur die ministerie van armoede uitwissing en maatskaplike welsyn.

25 July 2016 | Gemeenskap
Augetto Graig - Nuwe hoop vlam op tussen die sinkhuisies en inwoners wat in Ongawastraat in Windhoek se Okuryangava-woonbuurt tou­gestaan het. Geregistreerde inwoners het Vrydag kospakkies van Namibië se eerste voedselbank ontvang, met 6 000 gesinne en ’n totaal van ongeveer 28 000 mense wat by die kospakkies sal baat. Dit sluit mans, vroue, bejaardes en kinders van die Tobias Hainyeko-kiesafdeling in die hoofstad in. Dié inwoners is die eerste begunstigdes van die voedselbank, met inwoners van die Samora Machel-kiesafdeling wat in Augustus húl kospakkies sal ontvang.
Volgens mnr. Simon Muhepa, ’n koördineerder vir die plaaslike straatkomitee verantwoordelik vir die uitdeel van die kospakkies, word van huis tot huis gegaan om vas te stel wat elkeen se inkomste is. Dié wat minder as N$400 per maand verdien, word dan geregistreer. “As iemand in die huis werk, vra ons die salarisstrokie en deel dan dié bedrag deur die aantal mense wat in die huis bly,” sê hy.
Volgens Muhepa is die kospakkies ’n goeie poging om mense te help wat té lank in asdromme vir kos moes krap.
“Nou is hulle gelukkig met die voedselbank en die straatkomiteelede is ook gelukkig om vir die ministerie te werk,” het hy gesê. Vir sy medekomiteelid, mnr. Leonard Haoseb, is die werkgeleentheid iets wat hy graag met meer behoeftiges wil deel.
“Ons registreer steeds baie mense. Mense het dit nie ernstig beskou nie, mense het nie geglo nie, maar nou sien hulle,” het Haoseb gesê.
Me. Hilma Laurence is sedert Mei ’n lid van die straatkomitee. Sy is reeds vir jare ’n lid van die plaaslike netwerk Mans en Vroue teen Misdaad en ’n gemeenskapsleier wat haar met naaldwerk onderhou.
“Ek het so gesukkel, maar nou is ek gelukkig om werk by die nuwe ministerie te kry.”
Die permanente sekretaris van armoede-uitwissing en maatskaplike welsyn, mnr. I-Ben Nashandi, sê lede van die straatkomitees is opgelei om begunstigdes te identifiseer en ’n lys van name en identifikasienommers vir voedselverspreiding saam te stel. Volgens Nashandi hang die hoeveelheid kospakkies af van hoeveel mense in elke huishouding as begunstigdes geïdentifiseer is.
“Die straatkomitee is ’n gemeen­skaporganisasie-konsep, want ons weet almal in die informele nedersettings is nie strate nie. Dit gaan meer oor die maatskaplike werk wat hulle doen,” het hy verduidelik.
Die voedselbankprogram is op 30 Junie amptelik bekend gestel met die uitdeel van kospakkies wat op 12 Julie begin het. Kospakkies sal nog tot 30 Julie in die Tobias Hainyeko-nedersetting voorsien word totdat al die geregistreerde inwoners hul pakkies ontvang het.
“As gevolg van die omvang van die program, is daar ’n paar gesinne wat dalk as begunstigdes kwalifiseer, maar om verskeie redes nog nie op die lys is nie. Enige eis in goeie trou sal egter aandag geniet en as dit aan die voorgeskrewe riglyne voldoen, sál die familie ingesluit word,” het Nashandi gesê.
Die voedselpakkies word met vragmotors na die verskillende afsetpunte in die kiesafdeling vervoer om dit sodoende makliker te maak vir begunstigdes wat om gesondheidsredes, ouderdom of gestremdheid, nie ver van die huis kan stap nie.
“Daar is ’n dringende nood om met die uitdeel van die kospakkies te begin en die organisasieproses is dus nog ver van perfek, maar selfs só sal ons teen einde Julie amper 6 000 gesinne en ’n totaal van 28 000 mense in net één kiesafdeling bereik het,” het Nashandi gesê.
“Die Samora Machel-kiesafdeling is amper volledig geregistreer, danksy die werk van hul eie straatkomitee.”
Die kospakkies bevat onder meer mieliemeel, geblikte beesvleis, geblikte vis, kookolie, bruin suiker, sout, drie soorte bone, sop, broodmeel, gis en seep.

Soortgelyk

 

Regering staan bakhand vir 2% van Namibiërs se jáárlikse...

5 ure gelede | Regering

Denver Kisting – Die verwarring oor of die regering Namibiërs vra om 2% van een maand of een jaar se basiese salaris te skenk, is...

Making employees feel at home at Plastic Packaging

17 ure gelede | Mense

JONELL MALAN Human resource management is a function in organisations designed to maximise employee performance in the service of an employer’s strategic objectives. One empowers...

Duisende registreer vir e-taks

17 ure gelede | Ministeries

Elvira Hattingh - Altesaam 192 225 belastingopgawes is teen Dinsdag via die ministerie van finansies se nuwe aanlyn belastingdiens, die geïntegreerde belastingadministrasiestelsel (Itas), ontvang.Mnr. Tonateni...

Apollo 11-euforie só onthou

17 ure gelede | Tegnologie

Ronelle Rademeyer - Namibië se eie ruimteman, dr. Japie van Zyl, sê ’n getekende foto van die drie Apollo 11-ruimtevaarders, Neil Armstrong, Buzz Aldrin en...

Kalender 12 Julie

17 ure gelede | Kuns en vermaak

Nou aan die gang» Bottomless Coffee Band is ’n instrumentele, alternatiewe duo wat bestaan uit die getroude paartjie Lourens en Esté Rabé van Kaapstad, Suid-Afrika....

Weer vir 19 Julie 2019

17 ure gelede | Weer

BINNELAND: Sonnig en warm tot baie warm in die Noorde.KUS: Sonnig en matig tot warm.GETYE BY WALVISBAAI: H 04:47 L 10:41...

Nuwe begin vir vier wildehonde

17 ure gelede | Omgewing

Francoise Steynberg - Ná die tragiese skietvoorval in Februarie waarin drie wildehonde van die N/a’an ku sê-stigting en -wildreservaat glo deur personeel van die...

Just a click away

17 ure gelede | Gesondheid

Michelline Nawatises Organic Box is an online grocery shop specialising in selling organic vegetables, meat and dairy products, farm produce, and speciality homemade products.It was...

Rundu surveys new extensions

17 ure gelede | Plaaslik

The Rundu town council plans to survey two new extensions in the Tuhingireni informal settlement for N$ 1 million, according to the head of town...