Komplekse hartklepchirurgie in Windhoek gedoen
Henriette Lamprecht - Die harteenheid van die Rooms-Katolieke Hospitaal in Windhoek het hom by een van ses eenhede in Afrika aangesluit wat minimale indringende chirurgie vir koronêre omleidings en die vervanging van die aorta- en mitraalkleppe uitvoer.
Volgens die toraks- en hartchirurg verbonde aan die eenheid, dr. Henning du Toit, word die plaaslike span deur die departement van hartchirurgie van die Grootte Schuur-Hospitaal en die Universiteit van Kaapstad ondersteun. Tot op hede is drie van die prosedures by die plaaslike eenheid in Windhoek uitgevoer. Minimale hartomleidings word al geruime tyd uitgevoer, maar die meer komplekse klepvervangingschirurgie is die laas week van stapel gestuur.
Volgens Du Toit is die hersteltydperk vir pasiënte korter wat bogenoemde prosedures ondergaan en sodoende word kostes besnoei.
“Die pasiënt is met dié prosedure vinniger uit die intensiewesorgeenheid (ICU) en gaan binne twee tot drie dae huis toe. Andersins sou hulle twee tot drie dae in die ICU en sewe tot tien dae in die hospitaal deurbring. Die kostes verbonde aan die hoogs tegniese prosedures en die verwagte komplikasies is ook minder,” het hy in ’n onderhoud met Republikein gesê. Volgens hom gaan die harteenheid volgende jaar ook met transkateter-aortaklepinplantings (TAVI) begin. Dit is ’n verdere stap in die evolusie van minimale indringende hartchirurgie om die ingrypende operasies so veilig en bekostigbaar vir die patiënte en mediese fondse te maak.
“Ons gaan stadig maar seker wegdoen met die tradisionele ‘oop operasie’ wat aan almal bekend is, en beweeg na tegnologie om die klepvervanging deur die lies of kleiner borskaswandinsnydings te doen. Die TAVI- prosedure word die oggend uitgevoer en die pasiënt kan die volgende dag huis toe gaan. Die pasiënt bring dus net ’n dag in die hospitaal deur,” het Du Toit gesê. Volgens hom duur die operasie sowat ’n uur en word elke pasiënt individueel op meriete geëvalueer om vas te stel of die nuwer tipe operasies vir die betrokke patiënt geskik is.
Die harteenheid by die Rooms-Katolieke Hospitaal het in 2009 sy deure amptelik geopen en sy hartspan het sedertdien tussen 7 000 en 8 000 angiogramme en meer as ’n 1 000 opehartoperasies uitgevoer. Die span bestaan uit chirurge, intensiewesorgspesialiste, kardioloë, fisioterapeute en mediese tegnoloë. Die eenheid word ook ondersteun deur bekwame en ervare verplegingspersoneel in die intensiewesorgeenheid, die teater en algemene sale, wat die peri-operatiewe tydperk voor en ná ’n operasie “baie veilig” maak.
“Die meeste van die personeel is al vanaf 2009 by ons.”
Volgens Du Toit vergelyk die sterfte- en komplikasiesyfers by die eenheid met die beste soortgelyke eenhede in die wêreld.
Volgens die toraks- en hartchirurg verbonde aan die eenheid, dr. Henning du Toit, word die plaaslike span deur die departement van hartchirurgie van die Grootte Schuur-Hospitaal en die Universiteit van Kaapstad ondersteun. Tot op hede is drie van die prosedures by die plaaslike eenheid in Windhoek uitgevoer. Minimale hartomleidings word al geruime tyd uitgevoer, maar die meer komplekse klepvervangingschirurgie is die laas week van stapel gestuur.
Volgens Du Toit is die hersteltydperk vir pasiënte korter wat bogenoemde prosedures ondergaan en sodoende word kostes besnoei.
“Die pasiënt is met dié prosedure vinniger uit die intensiewesorgeenheid (ICU) en gaan binne twee tot drie dae huis toe. Andersins sou hulle twee tot drie dae in die ICU en sewe tot tien dae in die hospitaal deurbring. Die kostes verbonde aan die hoogs tegniese prosedures en die verwagte komplikasies is ook minder,” het hy in ’n onderhoud met Republikein gesê. Volgens hom gaan die harteenheid volgende jaar ook met transkateter-aortaklepinplantings (TAVI) begin. Dit is ’n verdere stap in die evolusie van minimale indringende hartchirurgie om die ingrypende operasies so veilig en bekostigbaar vir die patiënte en mediese fondse te maak.
“Ons gaan stadig maar seker wegdoen met die tradisionele ‘oop operasie’ wat aan almal bekend is, en beweeg na tegnologie om die klepvervanging deur die lies of kleiner borskaswandinsnydings te doen. Die TAVI- prosedure word die oggend uitgevoer en die pasiënt kan die volgende dag huis toe gaan. Die pasiënt bring dus net ’n dag in die hospitaal deur,” het Du Toit gesê. Volgens hom duur die operasie sowat ’n uur en word elke pasiënt individueel op meriete geëvalueer om vas te stel of die nuwer tipe operasies vir die betrokke patiënt geskik is.
Die harteenheid by die Rooms-Katolieke Hospitaal het in 2009 sy deure amptelik geopen en sy hartspan het sedertdien tussen 7 000 en 8 000 angiogramme en meer as ’n 1 000 opehartoperasies uitgevoer. Die span bestaan uit chirurge, intensiewesorgspesialiste, kardioloë, fisioterapeute en mediese tegnoloë. Die eenheid word ook ondersteun deur bekwame en ervare verplegingspersoneel in die intensiewesorgeenheid, die teater en algemene sale, wat die peri-operatiewe tydperk voor en ná ’n operasie “baie veilig” maak.
“Die meeste van die personeel is al vanaf 2009 by ons.”
Volgens Du Toit vergelyk die sterfte- en komplikasiesyfers by die eenheid met die beste soortgelyke eenhede in die wêreld.
Kommentaar
Republikein
Geen kommentaar is op hierdie artikel gelaat nie