Republikein Newspaper

Die Namibiese Amateur Swem­unie (NASU) het sy span aangekondig wat vandeesmaand die res van Suider-Afrika by die 2020 CANA Streek 4-kampioenskap in Gaborone, Botswana gaan uitdaag.

Vier-en-twintig swemmers is gekies wat die land van 20 tot 23 Februarie teen Angola, Botswana, Comore, Lesotho, Madagaskar, Malawi, Mosambiek, Seychelle, Suid-Afrika, Swaziland, Zambië en Zimbabwe sal verteenwoordig.

Die Namibiërs het verlede jaar puik presteer om tweede ná Suid-Afrika op die medaljelys te eindig, toe hierdie kampioenskap by die munisipale swembad in Olympia aangebied was. Die RSA was boaan met 81 medaljes (35 goud) teenoor Namibië se 86 medaljes (28 goud) en Mauritius se 47 medaljes (15 goud).

Namibië se topswemmers het ook met drie van die agt ludorum-toekennings vir die kampioenskap weggestap.

Heleni Stergiadis was die victrix ludorum vir die meisies 15-16 jaar ouderdomsklas, terwyl José Canjulo die victor ludorum-prys vir seuns 13-14 gekry het.

Spankaptein Ronan Wantenaar het selde sy gelyke teëgekom tussen die seuns van 17 jaar en ouer en was as die senior victor ludorum aangewys.

Te danke aan die voordeel as aanbieder op hul tuiswerf, het Namibië verlede jaar 40 swemmers in die veld gestoot.

“Om vir die reis na Botswana in aanmerking te kom, moes al ons swemmers kwalifiserende tye behaal. Ons swemmers het lang ure van harde werk, fokus en toewyding ingesit. Ons weet hulle is goed voorbereid om Namibië met trots te gaan verteenwoordig,” sê NASU se skakelbeampte, me. Nicky McNamara.

Die span word deur Jean-Michael Leitner as afrigter en Theresa Westerduin as spanbestuurder vergesel.

McNamara voeg by: “Die meeste van hierdie kampioen­skappe se koste word deur die swemmers gedra, wat dit duur en moeilik maak om by te woon. NASU spreek dus sy waardering uit teenoor Sanlam Namibië vir hul skenking, asook vir die harde werk van ons spanbestuurder Theresa wat verseker het dat almal se reisdokumente in orde is.”

Die Namibiese toerspan is:

MEISIES: Ariana Naukosho (11-12 jaar), Michaela Ohm (11-12), Reza Westerduin (11-12), Mackenzie Späth (13-14), Maya Stange (13-14), Salomé Rey (13-14), Tiana Esslinger (15-16), Trisha Mutumbulua (15-16), Nicole Redecker (15-16), Vicky Botha (17 en ouer), Heleni Stergiadis (17 en ouer).

SEUNS: Oliver Durand (11-12 jaar), Kgosana Hekandjo (11-12), Nico Esslinger (13-14), Quinn Ellis (13-14), Oliver Ohm (13-14), Brave Magongo (13-14), Mikah Burger (15-16), Keanet-Peter Rathenam (15-16), Friedrich Setz­korn (15-16), Corné le Roux (17 en ouer), Matthew Gertze (17 en ouer), Arkell Wellmann (17 en ouer), Daniel (Dentie) Louw (25 en ouer).

• José Canjulo is waarskynlik die mees opvallende afwesige swemmer in die Namibiese groep. Hy gaan glo tans in Pretoria skool en volg daar 'n oefenprogram by Tuks se sportsentrum vir uitnemendheid. Cajulo berei hom voor om binnekort aan die Suid-Afrikaanse nasionale kampioenskap deel te neem.

• Die 2019 CANA-kampioenskap in Windhoek het ook waterpolo en oopwater­swem (by Oanobdam) as deel van die program gehad, maar hierdie dissiplines sal vanjaar op afsonderlike tye en plekke plaasvind.