Kinders brand dood

Tanja Bause - Twee kinders het Saterdag in die Okafitu Kalyokosandi-nedersetting in die Omusatistreek in hul huis doodgebrand. Die vyfjarige Klaudia Matias en die vierjarige Nestory Sheetheni Wilbard was volgens die Namibiese polisie se misdaadverslag alleen by die huis, terwyl hul ouers ’n begrafnis bygewoon het. Die kinders het glo ’n mandjie aan die brand gesteek, waarna hulle in 'n kamer gaan wegkruip het. Die brand het egter deur die huis versprei en albei kinders oorweldig.

’n Twintigjarige man van die Olyavahenge-nedersetting in die Omusatistreek is in hegtenis geneem nadat hy sy 17-jarige broer met ’n mes gesteek het. Die broers was in ’n stryery betrokke toe een ’n mes uitpluk en sy broer steek. Die beseerde is in die Oshikuku-staatshospitaal opgeneem.

Saterdag om 23:00 is ’n 20-jarige man by die Weekend Bar in Katutura in die maag geskiet. Volgens die polisie het die verdagte die kroeg met 'n pistool in sy hand binnegegaan. Hy wou glo iemand anders skiet, maar dié man het weggehardloop. Die verdagte het op hom losgetrek en volgens die polisie die “verkeerde” persoon raakgeskiet. Die verdagte is deur mense in die kroeg aangerand en na die hospitaal geneem. Hy het egter uit die hospitaal ontsnap en is steeds op vrye voet. Die polisie het die ongelisensieerde pistool op die toneel gevind. Die slagoffer is in die Katutura-hospitaal opgeneem.

Mnr. Festus Anongeni (42) is op slag dood toe hy deur ’n minibus op die hoofpad tussen Opuwo en Oshakati van sy fiets af gestamp is. Niemand in al in hegtenis geneem nie.

’n Suid-Afrikaanse burger, mnr. Bennuth Armando Jaar (30), is op slag dood toe hy beheer oor sy voertuig verloor het en dit omgeslaan het. Sy 28-jarige broer, wat ’n passasier in die voertuig was, is lig beseer. Die ongeluk het Saterdag om 14:00 sowat vier kilometer buite Karasburg plaasgevind.

Me. Martha Fillemon (55) is Vrydag om 20:40 op die hoofpad tussen Omuthiya en Ondangwa doodgery terwyl sy probeer het om die pad oor te steek. Sy is op slag dood.

In Uis is ’n 19-jarige meisie na bewering deur drie mans verkrag terwyl sy onder die invloed van alkohol was. Haar vriende het haar glo nege dae later vertel wat gebeur het en sy het die saak by die polisie aangemeld. Die mans, van onderskeidelik 18 en 17, is in hegtenis geneem.

Die polisie ondersoek twee sake van diefstal uit ‘n voertuig op Ondangwa. In die eerste voorval het drie verdagtes Sondag om 00:00 by die Rossini-kroeg ’n pistool ter waarde van N$11 900 uit ’n voertuig gesteel. Saterdag om 20:00 het verdagtes ’n ruit van ’n voertuig by die O’Save-kompleks stukkend geslaan en N$70 000 kontant en ’n pistool gesteel.