Kawana voor stok oor ­SPP se kontrakte

Fishcor probeer arbitrasie systap

09 February 2021 | Visserye
Ronelle Rademeyer – Die minister van visserye en mariene hulpbronne, dr. Albert Kawana, het “eensydig” en “sonder die mandaat van die kabinet” opgetree toe hy die ooreenkomste gekanselleer het ingevolge waarvan African Selection Trust (AST) en Fishcor in vennootskap saamgewerk het.

Só sê die direksie van die Walvisbaaise maasbankerverwerkingsaanleg, Seaflower Pelagic Processing (SPP).

Dié vismaatskappy is in 2017 gestig nadat die staatsbeheerde Fishcor met African Selection Trust SA Group (AST) ’n ooreenkoms gesluit het om as bedryfsvennoot ’n fabriek te bou en vissersbote aan te skaf in ruil vir ’n jaarlikse kwota van 50 000 ton maasbanker. Fishcor besit 40% van die aandele in SPP en AST 60%.

Laasgenoemde maatskappy het meer as N$700 miljoen in dié projek belê.

Die gewraakte kansellasie waarop die direksie antwoorde soek, het op 21 September verlede jaar plaasgevind.

SPP se direksie sê in ’n openbare verklaring wat vandag in dagblaaie verskyn Kawana se eensydige besluit is geskoei op ‘n “terloopse” opmerking van ’n regter in die hoërhof, sonder dat daar ’n grondige regsbasis daarvoor was”.

SPP het kort voor die kansellering onsuksesvol probeer om ’n dringende hofinterdik teen Kawana, Fishcor en die ministers van finansies en staatsondernemings, mnre. Iipumbu Shimi en Leon Jooste, te kry om die regering se viskwotaveiling te verhoed.

Adjunk-regterpresident Hosea Angula het in sy uitspraak gesê die aansoek was ’n “desperate poging deur Seaflower om sy gesellige, maar parasitiese verhouding met Fishcor te red”.

Kawana het by navraag gesê hy “kan inderdaad bevestig” dat hy in September verlede jaar “die sogenaamde verpligting van Fishcor om ’n 50 000 ton-maasbakerkwota te voorsien, beëindig het”.

“Die redes waarom ek die aansoek teengestaan het, is nou openbare kennis. Ek verwys u na die uitspraak van die hoërhof,” het Kawana gesê en bygevoeg hy “kan niks meer sê nie ingeval daar ’n regsgeding oor die kwessie kom”.

SPP se direksie sê in die verklaring Kawana se besluit het tot “onherstelbare skade” vir die maatskappy en sy werkers gelei.

“As ’n regskenner het minister Kawana, deurdat hy op verkeerde en regs- en feitelike gronde gesteun en volledig sonder die mandaat van die kabinet opgetree het, onherstelbare skade aan die samewerkingsprojek aangerig en verhoed dat 655 werkers permanente aanstellings kon kry”, sê die direksie.

Hulle wys daarop Angula het nie vir die doeleindes van sy uitspraak nodig gehad om oor die wetlikheid van die ooreenkomste, wat deur die regering gepromulgeer en in die Staatskoerant gepubliseer is, te beslis nie.

“Vir die minister van visserye om van hierdie ooreengekome bepalings en voorwaardes af te sien, kom neer op die sabotering van die beleggingsooreenkoms vir die gesamentlike onderneming,” lui die verklaring verder.

Die direksie wys verder daarop Kawana se “aanhoudende weiering” om met SPP in gesprek te tree, laat dié maatskappy en sy hoofaandeelhouer met geen ander keuse as om die pad van arbitrasie met sy minderheidsvennoot, Fishcor, te volg nie.

Fishcor het intussen verlede Dinsdag ’n aansoek by die hoërhof in Windhoek teen AST, SPP, Kawana, asook teen sy lynminister (van staatsondernemings), mnr. Leon Jooste, en adv. George Coleman wat namens die arbiter, ADR Forum, optree, ingedien.

Daarin vra Fishcor vir ’n bevel wat verklaar dat die arbitrasieklousule in die aandeelhouersooreenkoms nie meer van krag is nie, of alternatiewelik, dat dit tersyde gestel word.

Mnr. AJ Louw, voorsitter van SPP se direksie, het by navraag gesê dié maatskappy gaan die aansoek teenstaan.

Louw het verder in reaksie op ’n onderhoud verlede week met Jooste op Republikein se aanlyn geselsprogram, Kletskompas, gesê hy stem saam die situasie kan nog deur ’n gepaste oplossing gered word.

Jooste het in reaksie op ’n vraag oor die SPP-krisis gesê “Namibiërs het die vermoë om om ’n tafel te sit en oor oplossing te gesels”.

Volgens Louw bly AST, as meerderheidsaandeelhouer in SPP, vasbeslote “om ’n vriendskaplike oplossing te vind” wat tot voordeel van die partye, maar ook die werkers en die ekonomie van Walvisbaai sal wees.
[email protected]

Soortgelyk

 

Plaaslike aktrise wen ‘Afrika-Oscar’

6 ure gelede | Kuns en vermaak

Die plaaslike aktrise Hazel Hinda het op 28 November die toekenning vir die beste aktrise in ’n ondersteunende rol by die African Movie Academy Awards...

Skole sluit vroeër ná vraestelle lek

9 ure gelede | Onderwys

Die ministerie van onderwys, kuns en kultuur sê skole gaan vroeër sluit as wat aanvanklik aangekondig is, om streke in staat te stel om voor...

Derde dosis Sinopharm goedgekeur

10 ure gelede | Gesondheid

Die ministerie van gesondheid en maatskaplike dienste het by monde van sy uitvoerende direkteur, mnr. Ben Nangombe, bevestig dat Namibiërs wat reeds twee dosisse van...

Geen sterftes, 11 nuwe gevalle

10 ure gelede | Gesondheid

Die Covid-sterftes bly op 3 573, terwyl 11 nuwe gevalle gister aangeteken is. Dit is 'n positiewe koers van 0,6% en sluit een leerlinge en...

Diplomaat van Namibië toets positief vir Omicron in Japan

11 ure gelede | Gesondheid

Japan se hoofkabinetsekretaris Hirokazu Matsuno het bevestig 'n diplomaat van Namibië in sy dertigs het positief vir die Omicron-variant getoets. Die man het Japan via...

Nog stemme van verset teen inhokking

23 ure gelede | Gesondheid

Henriette LamprechtTerwyl gevalle van die Omicron-variant van Covid-19 in talle oorsese lande bevestig word en midde 'n groot waarskynlikheid dat die variant reeds op eie...

Plaaseienaar aangekla ná raakskoot

23 ure gelede | Misdaad

Elvira HattinghDie vlaag van veediefstal in die Grootfontein-omgewing is die afgelope naweek opnuut tot 'n spits gedryf toe 'n plaaseienaar 'n vermeende veedief met 'n...

Amutse wins 2021 Bank Windhoek Doek Literary Visual Arts...

23 ure gelede | Mense

Monique AdamsBorn in Walvis Bay, Namafu Amutse attended Immanuel Ruiters primary school. She then moved to Swakopmund in 2007 and attended Swakopmund Primary School.Amutse completed...

Veldbrand nog nie in bedwang

23 ure gelede | Ongelukke

Tanja BauseDie veldbrand wat sowat 'n week gelede naby Okahandja begin het, woed steeds voort. Volgens mnr. Corne Kruger het die vlamme aan die einde...