Katrina se lot gou bepaal

Verhoor in pylvak

22 May 2019 | Howe
Denver Kisting – Onder gewone omstandighede is die staat se verantwoordelikheid om skuld bo redelike twyfel te bewys.

In die geval van die oudgoewerneur van die Hardapstreek, me. Katrina Hanse-Himarwa, het die staat die buitengewone vermag en “sonder enige skaduwee van twyfel” bewys dat sy aan korrupsie skuldig is.

Só het adjunk-aanklaer-generaal Ed Marondedze gisteroggend in hofsaal E in die Windhoekse hoërhof betoog in die verhoor van Himarwa, die huidige minister van onderwys, kuns en kultuur.

Hy het die hof gevra om haar “baie skuldig” te bevind.

As iemand op aanklag van verkragting teregstaan en die staat getuienis lei wat die bewerings bevestig, kan die beskuldigde nie eenvoudig kom beweer hy is onskuldig nie, het Marondedze gister aan regter Christie Liebenberg gesê.

In daardie geval het die hof geen alternatief as om hom skuldig te bevind nie, het die staatsaanklaer gesê toe hy ’n vergelyking getref het met Hanse-Himarwa se verhoor.

Marondedze was van mening dat dié saak baie eenvoudig is. “Dit is eenvoudig omdat ons een weergawe voor die hof het.”

Al wat die beskuldigde aan die hof kom voorhou het, is dat sy dit nie gedoen het nie, het die staatsaanklaer gesê.

Hanse-Himarwa is daarvan beskuldig dat sy haar destydse posisie en invloed as politieke hoof van die Hardapstreek misbruik het om twee name van ’n lys van begunstigdes te verwyder.

Dié name was op ’n lys van begunstigdes van die massabehuisingskema wat einde 2014 huise ontvang het.

Twee van die vuurvreterpolitikus se familielede het in plaas van daardie twee mense huise ontvang nadat sy glo haar familielede wederregtelik op die lys geplaas gekry het.

Marondedze sê die staat het getuienis gelei wat die beweringe teen Hanse-Himarwa staaf.

Hy sê sy het lank voordat sy aangekla is, geweet van die beweringe. Daar was selfs in ’n stadium ’n optog op Mariental oor die hardnekkige gerugte dat daar aan die lys gepeuter is, het hy gesê.

Die minste wat sy kon doen, was om die Mariental-munisipaliteit se uitvoerende hoof, mnr. Paul Nghiwilepo, te nader om ’n ondersoek te gelas. “Die feit dat sy nie ’n bohaai opgeskop het nie, was omdat sy geweet het sy was die een wat dit gedoen het.”

Hoe iemand optree ná ’n beweerde oortreding spreek boekdele, meen Marondedze.

Hy het ontken die staat en die Teenkorrupsiekommissie (ACC) was bevooroordeeld jeens Hanse-Himarwa. “Trouens, in hierdie saak het die staat en die verdediging saamgewerk om seker te maak die beskuldigde kry ’n regverdige verhoor.”

Die staat se hande is skoon en hulle stel net in geregtigheid belang, het hy gesê.

Mnr. Sisa Namandje, Hanse-Himarwa se prokureur, het gesê: “Konteks is alles. Daar is ’n konteks aan die saak, wat behoorlik verstaan moet word.”

Tydens die vorige bedeling is mense ter dood veroordeel omdat jaloerse bure onwaarhede verkondig het, sê hy.

Hoewel oneerlike getuienis nie in hedendaagse Namibië tot die doodstraf kan lei nie, is hy baie teleurgesteld dat die staat in geen stadium erken het daar was ongerymdhede nie.

Volgens hom kan die hof nie ’n kultuur duld waarvolgens getuies saamspan met byvoorbeeld die ACC wat kragtens die Grondwet onafhanklik behoort te wees nie. “Mense moet met waardigheid behandel word. Mense moet ’n regverdige verhoor kry. Diegene wat die ondersoeke behartig, kan nie standaarde vir rykes en standaarde vir armes hê nie.”

As dít gebeur en die saak is ernstiger, soos moord of verkragting, kan die gevolge rampspoedig wees, het die prokureur gewaarsku.

In sy navorsing kon hy geen saak vind waarin sewe staatsgetuies se weergawes bykans woordeliks ooreengestem het nie, het Namandje gesê.

Hy het veral uitgevaar teen die ondersoekbeampte, mnr. Phellem Masule, wat vantevore in ’n ander geding in die spervuur was.

Namandje sê omdat daar toe geen stappe teen Masule gedoen is nie, kon dié ondersoekbeampte “sy hande op my kliënt kry”.

Die staat het gister hul slotbetoë in die saak afgehandel, terwyl dié van die verdediging na verwagting vandag sal voortduur.

Himarwa se man, die boer en sakeman mnr. Ghenno Himarwa, was oudergewoonte weer gister by die hof om haar te ondersteun.

Me. Margaret Mensah-Williams, die voorsitter van die Nasionale Raad, en mnr. Theo Jankowski, die eertydse uitvoerende hoof van die Rehoboth-dorpsraad, was ook in die stampvol openbare galery.

Hanse-Himarwa het gister in die beskuldigdebank oor haar welstand aan lede van die media gesê dit gaan “piekfyn”.

Sy was uitgevat in ’n oorwegend geel tabberd, swart skoene en ’n swart handsak.

Soortgelyk

 

Verbod op vakleerlinge in staatsdiens opgehef

4 ure gelede | Regering

Die verbod op die plasing van vakleerlinge in die staatsdiens word op 1 Junie vanjaar opgehef, het die eerste minister, me. Saara Kuugongelwa-Amadhila, vandag in...

Staat vra hof om minister skuldig te bevind

8 ure gelede | Howe

Adjunk-aanklaer-generaal Ed Marondedze het vroeër vandag vir regter Christie Liebenberg gevra om vir me. Katrina Hanse-Himarwa skuldig te bevind aan korrupsie.Dít kom nadat die staat...

Brian Finch privaat gegroet

10 ure gelede | Kuns en vermaak

Die musieklegende Brian Finch, wat vroeër vandeesweek sy stryd teen kanker verloor het, gaan tydens ’n private seremonie ter ruste gelê word. Volgens ’n plaaslike...

NSFAF beperk finansiering

11 ure gelede | Onderwys

Die Finansiële Hulpfonds vir Namibiese Studente (NSFAF) sal eerskomende Vrydag ’n lys van 2 925 nuwe begunstigdes beskikbaar stel. Die byna 3 000 gelukkiges word...

Eis van miljoene ná miskraam

23 ure gelede | Howe

Ronelle Rademeyer - ‘n Vrou wat aanvoer sy het ‘n miskraam gehad nadat sy drie dae lank sonder kos en water in die polisieselle by...

Kuns tussen die wingerde

23 ure gelede | Byvoegsels

Ronelle Rademeyer - “Ek glo ’n goeie skildery ontstaan wanneer ’n bietjie talent en ’n groot klomp passie op die skilderdoek ontmoet.”Dit is hoe die...

Twee Namibiërs in SA hof oor diamante

23 ure gelede | Howe

Francoise Steynberg - Twee Namibiese mans het gister in die Bellville-landdroshof in Kaapstad in verband met die onwettige besit van 27 ongeslypte diamante verskyn. Mnr....

Namibiër vertolk hoofrol in Fiela se kind

23 ure gelede | In beeld

Die Namibiese aktrise Zenobia Kloppers het die hoofrol in die fliek Fiela se kind losgeslaan. Zenobia, wat Fiela Komoetie sal speel, is ’n bekende aktrise...

Live for the moments, not the milestones

23 ure gelede | Mense

Mariselle StofbergCarla van Zyl is the top medical student from the class of 2018 at the University of Namibia (Unam). This motivated, driven and passionate...