Kaasmaker bring kopers tot by haar voorstoep

Padstalle van Namibië

30 September 2020 | Byvoegsels
Ronelle Rademeyer - Nadat Inge Geldenhuys (65) jare lank Saterdag na Saterdag vanaf haar kleinhoewe by Wilhelmstal Windhoek toe gery het om haar groot verskeidenheid tuisgemaakte kase op die Bio-Markt te verkoop, het sy op ’n dag besluit genoeg is genoeg. Vir dié ryery sien sy nie langer kans nie.

Sy bedink toe ’n vindingryke plan om potensiële kopers tot by haar voorstoep te bring. Dit was om ’n padstal en koffiewinkel te begin.

Kwetu Shop & Coffee Shop het in Desember 2019 sy deure geopen toe die vakansieseisoen in volle gang was en die een voertuig na die ander stilgehou het om te kyk wat dit bied.

Inge se kleinhoewe is aan die teenoorgestelde kant van die Okahandja-Karibib-pad as die baie bekende Wilhelmstal Padstal geleë wat reeds jare lank ‘n gewilde stilhouplek vir motoriste is wat tussen Windhoek en die kus onderweg is.

Sy en haar man, Frans, het sowat 15 jaar gelede begin om papegaaie te teel – die soorte eg aan Afrika, maar ook digby 20 verskillende eksotiese papegaaisoorte van oraloor die wêreld.

Frans is in 2017 oorlede en sedertdien bedryf sy die kleinhoewe met sy verskillende kleinskaalse boerderye alleen.

“My man het altyd wildsvleis verwerk en biltong, droëwors, rookvleis en salami’s gemaak en ek het ’n troppie Switserse melkbokke en ’n paar Jersey-koeie wat gemelk word sodat ek kaas kan maak. Ná sy dood het ek met die vleisverwerking voortgegaan.”

Inge het in Noord-Duitsland grootgeword (sy was ’n nooi Seichter), maar omdat sy in ’n Afrikaanse familie ingetrou het, het sy self ook die kuns bemeester om biltong en droëwors te maak.

Haar opleiding as jong vrou in landbou-ingenieurswese in Duitsland het haar goed toegerus om ook ander landbouprodukte soos rou melk vir waardetoevoeging te verwerk – vandaar die kaasmakery.

Sy het oor die jare mete verskillende kase eksperimenteer en vervaardig omtrent 30 verskillende soorte kase. Harde kase, sagte kase, verouderde kase soos bloukaas – noem maar op. Inge maak dit.

Die bokke lewer maksimum so 20 liter melk per dag in optimale produksie en word met die hand gemelk. Die Jersey-koeie word met masjiene gemelk en die opbrengs is sowat 70 liter per dag.

Inge vertel sy pasteuriseer nie die melk nie, want dit bring mee dat die kaas minder geurig is.

Vir voer plant sy lusern en verbou ook groente en kruie in die groot tuin op die kleinhoewe.

Omdat die vleisverwerking en kaasmakery haar baie besig hou, koop sy die fyngebak vir die padstal by ’n bakster op Omaruru aan. So ook die ingelegde produkte wat by die padstal te koop is.

Die leerhandsakke wat sy aanhou, kom van ’n vrou op Hentiesbaai, vertel Inge. Die wolserpe en ander breiwerk is egter haar handewerk. Die wol koop sy by ’n boer in die omgewing wat alpakas aanhou. “Ek het nege spinwiele en spin die wol self,” vertel Inge.

Tussen al haar take deur, bak sy koek vir die koffiewinkel en maak ook die lekkerste pasteie en quiche.

Die koekresepte wat sy gebruik, was haar ouma se beproefde resepte.

Inge kook ook turksvy- en suurlemoenstroop en maak gemmerbier. Dit kan daar geniet word, of vir wegneem gekoop word.

'n Skaars delikatesse wat 'n mens nie sommer raakloop nie, is ingelegde kwarteleiers. Sy verkoop ook kwateleiers in houers van ses elk.

‘n Groot trekpleister is die geurige koffie van varsgemaalde bone wat sy bedien.

By Kwetu kan jy op die stoep aansit, of by een van die tafels onder die groot bome ontspan terwyl jou bestelling voorberei word.

Daar is ’n klouterraam en speelplek waar kinders kan baljaar terwyl ma en pa asem skep.

Mense wat Inge wil kontak, kan haar bel by 081 242 5037.

Soortgelyk

 

Geingob onder skoot oor ‘wit’ opmerkings

10 ure gelede | Politiek

Denver Kisting – Die leier van die amptelike opposisie, mnr. McHenry Venaani, sê wat pres. Hage Geingob die afgelope naweek oor wit mense kwytgeraak het,...

Verskeie daaglikse vlugte binnekort na SA

10 ure gelede | Vervoer

Ronelle Rademeyer – FlyWestair en Airlink, die private Namibiese en Suid-Afrikaanse rederye, het tot reisigers se redding gekom en gaan die leemte aan direkte, geskeduleerde...

Skone Lira bemark Namibië

10 ure gelede | Toerisme

Die Suid-Afrikaanse sangeres Lira, wat die inperking in Namibië deurgebring en uitgebreide verkenningsreise in die land onderneem het, is deur die Federasie van Namibiese Toerismeverenigings...

Weer vir 19 Oktober

10 ure gelede | Weer

BINNELAND: Gedeeltelik bewolk en bloedig warm in die Ooste. Elders sal die sonnig wees en baie warm tot bloedig wees. KUS: Gedeeltelik bewolk en koel...

Verdagte panga-rowers in hegtenis

10 ure gelede | Misdaad

Kristien KrugerVolgens ’n Namibiese polisieverslag is sewe mans in hegtenis geneem in verband met ’n aantal gewapende rooftogte in Windhoek.Die mans het hulself glo die...

Massavrekte van robwelpies ondersoek

10 ure gelede | Omgewing

Elvira Hattingh – ’n Ondersoekspan het begin om ongewone vrektes onder Kaapse pelsrobbe te ondersoek nadat klaarblyklik duisende wyfies vanjaar hul welpies teen die Namibiese...

Vier ton vis by Swakoppoort gekonfiskeer

10 ure gelede | Misdaad

Ronelle Rademeyer en Kristien Kruger – Sowat vier ton gedroogte vis en groot hoeveelhede visnettte en vislyn, asook die vlotte wat gebruik is om dit...

Stigma rondom Covid-19 neem af

10 ure gelede | Gesondheid

Jana-Mari Smith – Die normalisering van Covid-19 die afgelope jaar het veroorsaak dat stigmatisering weens die coronavirus besig is om af te neem, maar kenners...

Duitsland steun nasionale parke

10 ure gelede | Omgewing

Francoise SteynbergNóg 'n mylpaal is vir omgewingsbewaring behaal met die Duitse regering deur KfW wat sedert 2006 sowat N$1,4 miljard (75,5 euro) in Namibiese nasionale...