Joe Madisia maak hart oop oor donker wolk

Denver Kisting – “Ek is geskok en my hart is aan skerwe en vir seker ook dié van talle jonk en oud in Namibië.”Só sê die vermaarde visuele kunstenaar Joseph (Joe) Madisia, oor die gruvonds verlede week in ’n vlak graf by Walvisbaai – vermoedelik dié van die verdwene me. Shannon Wasserfall (21).Madisia is die grootoom van die 28-jarige me. Azaan Madisia.Sy is verlede Woensdag op dié hawedorp in hegtenis geneem en het Vrydagmiddag op aanklag van moord en dwarsboming van die gereg in die Walvisbaai-landdroshof verskyn.In reaksie op navrae van Republikein het Joseph Madisia hom Sondag tot Facebook gewend om sy hart uit te stort oor die tragedie wat Namibiërs tot in hul fondamente geskud het.‘VERENIG IN GEBED’In die eerste plek, lui Madisia se plasing, wil hy sy medelye betoon met Wasserfall se geliefdes. “Ek is geskok en het steeds geen woorde nie. Mag God ons harte kalmeer. Daar is ’n donker wolk wat hier op Mariental oor my hang en ook oor die Madisia-familie op Walvisbaai. Ek wil hulle (die Wasserfall-familie) net vra om kalm te bly en laat ons in gebed verenig bly.”Hy doen voorts ’n beroep op almal “om alles in die hande van die almagtige God te los, want geen ouer in hierdie wêreld weet wat ons kinders elke uur van elke dag maak nie. Kom ons bid vir ons seuns en dogters.”Madisia sê hy is nie by magte om kommentaar te lewer oor wat na bewering gebeur het en uiteindelik tot Azaan se inhegtenisneming gelei het nie, omdat hy “geen benul het wat ontvou het nie. Derhalwe het ek geen woorde nie behalwe om te sê ja, die meisie Azaan is deel van my Madisia-familie; dus my kleinkind in die familie. Ek is baie jammer – vir almal se pyn; in albei families.”Azaan Madisia bly in aanhouding en moet weer op 7 Desember vanjaar in die hof verskyn.Komm. Moritz !Naruseb, die polisie se hoof van strafondersoeke, het vroeër gesê meer inhegtenisnemings word verwag.’n Tweede persoon is Donderdag vir ondervraging ingeneem, maar is op dieselfde dag weer vrygelaat, het hy by navraag bevestig.Die afgelope naweek het hy bevestig die polisieondersoek duur voort en in dié stadium is nog net een mens weens die tragedie aangekeer en voor die hof gedaag.Wasserfall het in April vanjaar spoorloos verdwyn.Ofskoon die oorskot wat verlede week in die vlak graf gevind is vermoedelik hare is, moet ’n forensiese ondersoek dit beslissend bepaal.!Naruseb het verlede week op ’n nuuskonferensie in die hoofstad gesê hy kan nie in dié stadium ’n aanduiding gee van hoe lank dit sal duur vir dié proses om afgehandel te word nie.Die gruvonds en die vlaag geslagsgegronde geweld waaronder Namibië gebuk gaan, het sedert Donderdag tot verskeie betogings oraloor die land gelei. - denver@republikein.com.na

Joe Madisia maak hart oop oor donker wolk

Kommentaar

Republikein 2025-07-02

Meld asseblief aan om kommentaar te lewer

Joe Madisia maak hart oop oor donker wolk

Kommentaar

Republikein 2025-07-02

Meld asseblief aan om kommentaar te lewer

MELD AAN

Advertensie