Job se geduld met Chinese op

Augetto Graig - Die sekretaris-generaal van die grootste vakbond in die land, die Nasionale Unie van Namibiese Werkers (NUNW), en die leier van die Regstellende Herposisioneringsbeweging (AR) het Dinsdag daarop aangedring dat Chinese in die land Namibiërs met respek behandel.

Mnre. Job Muniaro en Job Amupanda het hulself sterk hieroor uitgespreek.

In sy nuusverklaring oor Werkersdagvieringe op 1 Mei het Muniaro na die onlangse skietvoorval in die Kavango-Oosstreek verwys.

“Ons veroordeel hierdie barbaarse optrede. China het die doodstraf, maar nou kom hulle hierheen en is nie bang om dood te maak nie. Werkers het nie die reg om by die werk tee te praat nie. Praat en jy kry ’n koeël. Dit is duiwels. Hierdie probleem met die Chinese sal nie end kry as ons hulle nie uit die land kry nie,” het hy gesê.

“Dié is Namibië. Namibië is vir Namibiërs. Wat de hel gaan aan, kamerade? Die meerderheid is Chinese staatsondernemings wat geen respek vir Namibiërs toon nie. Die werkers van hierdie land is siek en sat,” het die NUNW-leier gesê.

Amupanda het terselfdertyd ’n amptelike brief aan China se ambassadeur in Namibië, mnr. Zhang Yiming, gerig.

Die brief is ook aan die adjunk- eerste minister en minister van internasionale betrekkinge en samewerking, me. Netumbo Nandi-Ndaitwah, gerig.

Die AR-leier beskuldig die ambassadeur van oneerbiedige optrede die afgelope drie jaar en noem verskeie voorbeelde daarvan.

Amupanda sê die ambassadeur se reaksie op die skietvoorval waartydens ’n 32-jarige Namibiër na bewering deur sy Chinese werkgewer doodgeskiet is, was onsensitief.

Hy skryf: “Jou arrogante, onsensitiewe en neerhalende optrede sal nie langer geduld word nie.

“Ons waardeer nie en keur nie jou gedrag in ons land goed nie.”

Volgens staatsmedia het Yiming die dorpie Andara, waar die skietvoorval plaasgevind het, vandeesweek besoek.

Hy het die familie van die oorledene en ander inwoners glo aangemoedig om kalm te bly en geregtigheid te laat geskied.

Die ambassadeur het ’n beroep op mense gedoen om aanvalle, inbrake en plundery te vermy.

“Die Chinese ambassade in Namibië betreur Woensdag se misdaadvoorval in Divundu in die Kavango-Oosstreek, waartydens ’n Namibiër vermoor is,” het Yiming volgens die staatsmedia in sy toespraak gesê.

“Ons wil graag ons medelye teenoor die oorledene uitspreek, en ons opregte simpatie met die bedroefde familie betoon,” het hy gesê.

Afgesien van ontevredenheid met Chinese in Namibië het Muniaro hom ook uitgespreek oor die regering se onlangse besluit om mediesefondsbydraes te verhoog.

Volgens hom is die besluit sonder beraadslaging of behoorlike kommunikasie geneem en moet dit onmiddellik herroep word.

Verder dring die vakbond aan dat die regering 50% van alle myne besit, het Muniaro gesê.

“Dit is die enigste manier waarop die land van die dapperes ’n volhoubare ekonomie met sy eie hulpbronne kan verseker,” het hy gesê.

Werkersdag sal vanjaar op 1 Mei by die Katutura-sportvelde in Windhoek gevier word, asook op Walvisbaai en Lüderitz.