Japie loer by Staatshuis in

Ronelle Rademeyer - Namibië se geliefde dr. Japie van Zyl het gisteroggend gaan oë wys by Staatshuis waar hy pres. Hage Geingob tydens sy kort kuiertjie oor Nasa se jongste Mars-projek ingelig het.Van Zyl, die boorling van Outjo wat direkteur is van sonnestelselverkenning by Nasa se Straalaandrywingslaboratorium (JPL) in Pasadena, Kalifornië, sê die InSight-sending is vas op koers na die Rooi Planeet.Die InSight-sending is op 5 Mei gelanseer en die hoëtegnologie verkenningstuig sal op 26 November, ná sy ruimtereis van meer as 400 miljoen km, daar land.Van Zyl het gister ’n T-hemp soos die een wat die JPL-spanlede die dag met die lansering gedra het, aan Geingob geskenk en in ligte luim geskerts die president is nou een van hulle. Hy het ook vir hom en die presidentsvrou, me. Monica Geingos, Nasa-pette gegee “om die son weg te hou” wanneer hulle op Swakopmund uitspan.Daarna het hy verduidelik met die nuwe Mars-projek hoop wetenskaplikes om een van die tergendste vrae oor dié planeet op te los. Dit is naamlik of Mars eens op ’n tyd ook ’n vloeibare kern, en dus ’n magneetveld, gehad het wat die atmosfeer beskerm. Hy sê die aarde se vloeibare kern help met die dinamo-effek wat die magneetveld opwek. “Mars het nie ’n magneetveld nie, maar as die teorieë reg is, moes Mars dit ook gehad het. Dit kan wees dat Mars se kern mettertyd solied geword het. Met hierdie sending gaan ons probeer vasstel hoekom Mars nie sy magneetveld kon behou nie,” het hy vertel.Geingob het gesê die Namibiese nasie is trots op Van Zyl en dankbaar dat hy altyd na Namibië terugkeer om sy kennis hier te deel. Hy het gesê in sy geval kan daar nie gepraat word van ‘n brain drain wat behels dat kennis vir die land verlore is nie, maar van ‘n brain gain omdat hy dit gereeld met sy eertydse landgenote kom deel.Van Zyl sal juis tydens sy kort besoek aan die land weer verskeie skole besoek. Hy gee ook vanaand ’n openbare lesing by die Namibië Universiteit vir Wetenskap en Tegnologie (Nust).Dié naweek vlieg hy Kaap toe om Maandag by sy alma mater, die Universiteit Stellenbosch, ’n lesing te gee. Op ’n vraag van Geingob oor wat hy in sy voorlesings aan jongmense sê, het Van Zyl geantwoord hy vertel hulle dat wetenskaplikes elke dag nog iets nuuts oor die wonders van die heelal leer.Hy vertel hulle ook dat deur hard te werk, hulle dieselfde hoogtes as hy kan bereik.

Japie loer by Staatshuis in

Kommentaar

Republikein 2025-07-02

Meld asseblief aan om kommentaar te lewer

Japie loer by Staatshuis in

Kommentaar

Republikein 2025-07-02

Meld asseblief aan om kommentaar te lewer

MELD AAN

Advertensie