Invalshoek – Geflous deur Covid-19?
Rudi Koekemoer – Ek was ‘n entoesiastiese rugbyspeler op my dag, maar was nie juis bekend vir my ratsheid nie.
Ek het op skool as loskopstut en by Maties as flank uitgedraf. Dit was altyd ‘n euforiese oomblik wanneer ek die bal in die hande kry en die opposisie se verdedigingslinie kon aanval. Vir ‘n oomblik was ek in volle beheer en was 29 ander spelers se oë op my gevestig om te sien wat ek met die bal kon doen.
Ek onthou ‘n spesifieke wedstryd tussen Huis Marais en Dagbreek toe ek die bal op die kwartlyn ontvang en die doellyn aangeval het. Die buitesenter en vleuel was ongemerk en ek gee toe ‘n lang aangee na die vleuel. Ons was op die voorvoet en daar was geen tekort aan selfvertroue nie.
Dagbreek se talentvolle binnesenter het egter van nêrens gekom, die bal soos ‘n ryp vrug uit die lug gepluk, ‘n systap uitgevoer, soos ‘n warm mes deur botter deur ons agterlyn gesny en ‘n drie onder die pale gaan druk.
Sulke tyd voel dit mos vir ‘n voorspeler of sy bene soos ‘n koeksister knoop. Dit laat jou voëlverskrik rondtas soos wanneer ‘n donderbuis by jou voete ontplof en jou vir ‘n oomblik disoriënteer.
Die meeste mense ervaar die afgelope twee maande soortgelyke gevoelens. Jaarplanne en toekomsdrome is oornag onderskep deur onvoorsiene omstandighede.
Soggens verg dit twee koppies moerkoffie om te probeer beplan vir die dag wat voorlê, om nie eens te praat oor die dag van môre nie.
Verlede week het ek een oggend besluit om nie oudergewoonte die televisie aan te skakel en deur die nuuskanale te blaai nie. My tweede koppie koffie in die hand, het ek die stilte op die balkon geniet, nagedink oor die tyd voor Covid-19 en probeer antisipeer hoe ons die opposisie in die toekoms kan uitoorlê.
Vóór die pandemie het hoofopskrifte in die media, hier en internasionaal, dikwels gehandel oor groot korrupsieskandale waarby vooraanstaande mense geïmpliseer is. Byna daagliks het die een of ander bedrog ter waarde van miljarde op die lappe gekom.
Namibië was reeds geruime tyd in ‘n resessie gewikkel. Meer as een bedryf, soos konstruksie, was klaar op die knieë.
Ons skuldlas en die moontlike toekomstige impak daarvan was gereeld onder die vergrootglas. Werkloosheid, armoede en verskeie maatskaplike vraagstukke was hoog op die agenda met spesialiste wat aangestel is om oplossings te vind.
Daar was ook bekommernis oor die uitwyk van professionele mense na ander lande en die impak daarvan op gespesialiseerde dienste. Om die waarheid te sê, die land was in ‘n hoek gedryf, maar ondersoeke, die uitwissing van korrupsie en die vind van oplossings vir al hierdie uitdagings het aandag geniet.
Covid-19 het egter die bal onderskep en ‘n systap van formaat uitgevoer, wat leierskap gedisoriënteerd gelaat het. Alle fokus is nou op die pandemie.
Is die aandag sodoende afgelei van ander belangrike vraagstukke? Soos verskeie sensitiewe korrupsiesake.
Die afgelope weke en maande is sekere besluite blykbaar in isolasie geneem, sonder om die impak op die ekonomie en ‘n magdom maatskaplike faktore in ag te neem.
Ons gaan ‘n bitter sterk, vinnige vleuel nodig hê om die binnesenter in te haal voor hy die bal tussen die pale neersit.
Ek het op skool as loskopstut en by Maties as flank uitgedraf. Dit was altyd ‘n euforiese oomblik wanneer ek die bal in die hande kry en die opposisie se verdedigingslinie kon aanval. Vir ‘n oomblik was ek in volle beheer en was 29 ander spelers se oë op my gevestig om te sien wat ek met die bal kon doen.
Ek onthou ‘n spesifieke wedstryd tussen Huis Marais en Dagbreek toe ek die bal op die kwartlyn ontvang en die doellyn aangeval het. Die buitesenter en vleuel was ongemerk en ek gee toe ‘n lang aangee na die vleuel. Ons was op die voorvoet en daar was geen tekort aan selfvertroue nie.
Dagbreek se talentvolle binnesenter het egter van nêrens gekom, die bal soos ‘n ryp vrug uit die lug gepluk, ‘n systap uitgevoer, soos ‘n warm mes deur botter deur ons agterlyn gesny en ‘n drie onder die pale gaan druk.
Sulke tyd voel dit mos vir ‘n voorspeler of sy bene soos ‘n koeksister knoop. Dit laat jou voëlverskrik rondtas soos wanneer ‘n donderbuis by jou voete ontplof en jou vir ‘n oomblik disoriënteer.
Die meeste mense ervaar die afgelope twee maande soortgelyke gevoelens. Jaarplanne en toekomsdrome is oornag onderskep deur onvoorsiene omstandighede.
Soggens verg dit twee koppies moerkoffie om te probeer beplan vir die dag wat voorlê, om nie eens te praat oor die dag van môre nie.
Verlede week het ek een oggend besluit om nie oudergewoonte die televisie aan te skakel en deur die nuuskanale te blaai nie. My tweede koppie koffie in die hand, het ek die stilte op die balkon geniet, nagedink oor die tyd voor Covid-19 en probeer antisipeer hoe ons die opposisie in die toekoms kan uitoorlê.
Vóór die pandemie het hoofopskrifte in die media, hier en internasionaal, dikwels gehandel oor groot korrupsieskandale waarby vooraanstaande mense geïmpliseer is. Byna daagliks het die een of ander bedrog ter waarde van miljarde op die lappe gekom.
Namibië was reeds geruime tyd in ‘n resessie gewikkel. Meer as een bedryf, soos konstruksie, was klaar op die knieë.
Ons skuldlas en die moontlike toekomstige impak daarvan was gereeld onder die vergrootglas. Werkloosheid, armoede en verskeie maatskaplike vraagstukke was hoog op die agenda met spesialiste wat aangestel is om oplossings te vind.
Daar was ook bekommernis oor die uitwyk van professionele mense na ander lande en die impak daarvan op gespesialiseerde dienste. Om die waarheid te sê, die land was in ‘n hoek gedryf, maar ondersoeke, die uitwissing van korrupsie en die vind van oplossings vir al hierdie uitdagings het aandag geniet.
Covid-19 het egter die bal onderskep en ‘n systap van formaat uitgevoer, wat leierskap gedisoriënteerd gelaat het. Alle fokus is nou op die pandemie.
Is die aandag sodoende afgelei van ander belangrike vraagstukke? Soos verskeie sensitiewe korrupsiesake.
Die afgelope weke en maande is sekere besluite blykbaar in isolasie geneem, sonder om die impak op die ekonomie en ‘n magdom maatskaplike faktore in ag te neem.
Ons gaan ‘n bitter sterk, vinnige vleuel nodig hê om die binnesenter in te haal voor hy die bal tussen die pale neersit.
Kommentaar
Republikein
Geen kommentaar is op hierdie artikel gelaat nie