Hou vas - hier kom Moody's se afgradering
Suid-Afrika se ekonomiese uitkomste vir die volgende paar maande sal deur “dade eerder as woorde” gevorm word, sê 'n kenner.
Vida Booysen - Suid-Afrikaners moet hulle staal dat die kredietgradeerder Moody's die buurland ook tot rommelstatus gaan afgradeer.
Malusi Gigaba, Suid-Afrika se nuwe minister van finansies, het die naweek laat deurskemer dat hy ná sy gesprek met Moody's in die VSA nie optimisties is oor die vooruitsigte dat dié agentskap – die enigste van die drie groot kredietgradeerders wat Suid-Afrika nog nie tot rommelstatus afgegradeer het nie – nié sy eweknieë se voorbeeld sal volg nie.
“Moody's het ons geen gerusstelling gegee nie en dus kan ons ook nie enige waarborge verskaf nie,” het Gigaba Saterdag in 'n onderhoud met ENCA gesê.
Gigaba het ook die wenkbroue laat lig deur sy omstrede raadgewer, prof. Chris Malikane, saam met hom Amerika toe te neem vir die paai-toer van beleggers en kredietgradeerders.
Malikane het onlangs 'n hoogs aanvegbare pleidooi vir die nasionalisering van Suid-Afrika se banke gedoen.
Gigaba het hom van dié uitsprake gedistansieer.
'n Foto van Malikane in Washington is die naweek op sosiale media in 'n twiet deur Mayihlome Tshwete, Gigaba se woordvoerder, geplaas.
In die twiet sê Tshwete dit is “op die laaste vergadering van die dag” by die Internasionale Monetêre Fonds (IMF) in Washington geneem.
Tshwete sê ook: “Ek het gedog ek sou die prof die leuens oor hom op Twitter wys.”
David Maynier, DA-LP, sê die indruk dat Malikane deur Gigaba “soos 'n skoolseun” in die openbaar tereggewys is en dat sy “dae getel is”, is net 'n front.
“Niks kan verder van die waarheid wees nie, want dit blyk nou Malikane het die minister vergesel . . .”
Hy meen ook Malikane se teenwoordigheid sal 'n groot rooi vlag vir internasionale finansiële instellings, beleggers en kredietgradeerders in die VSA wees.
Lagarde
Gigaba sou volgens die SAUK Sondag met Christine Lagarde, besturende direkteur van die IMF, vergader en het in 'n onderhoud gesê die fokus bly op “inklusiewe groei” sodat die land sy beleggersgraad-status kan herwin.
Die kanse is baie groot dat Moody's die ander twee kredietgraderingsagentskappe sal volg en Suid-Afrika afgradeer, sê prof. Raymond Parsons van die Noordwes-Universiteit se sakeskool.
“As jy Suid-Afrika se ekonomiese vooruitsigte in oënskou neem, is die koeël eintlik reeds deur die kerk, ongeag wat Moody's se besluit sou wees.”
Al wat die land nou kan doen, is om die skade aan die ekonomie van 'n “harde landing” ná rommelstatus te probeer beperk, sê Parsons.
As daar gekyk word na die uiteindelike impak op die koste van lenings vir sowel die staat as die private sektor, is dit die kombinasie van Standard & Poor's en Moody's se rommelgraderings, eerder as Fitch s'n, wat die grootste risiko vir Suid-Afrika op die internasionale effektemark skep, waarsku Parsons.
“Die Suid-Afrikaanse ekonomie word nou onvermydelik 'n ongeval van politieke binnegevegte op verskeie vlakke.”
Plaaslik begin die private sektor ook die negatiewe uitwerking van die afgradering voel.
Vrydag het die voedselreus Pioneer Foods bekend gemaak dat samesprekings oor 'n groot internasionale transaksie afgelas is “weens die onlangse afgradering van Suid-Afrika se staatskuld en die potensiaal vir bykomende afgraderings”.
Parsons sê Suid-Afrika se ekonomiese uitkomste vir die volgende paar maande sal deur “dade eerder as woorde” gevorm word.
“Die markte, beleggers en die graderingsagentskappe sal ekonomiese realiteit eerder as politieke retoriek beoordeel.” – Netwerk24
Malusi Gigaba, Suid-Afrika se nuwe minister van finansies, het die naweek laat deurskemer dat hy ná sy gesprek met Moody's in die VSA nie optimisties is oor die vooruitsigte dat dié agentskap – die enigste van die drie groot kredietgradeerders wat Suid-Afrika nog nie tot rommelstatus afgegradeer het nie – nié sy eweknieë se voorbeeld sal volg nie.
“Moody's het ons geen gerusstelling gegee nie en dus kan ons ook nie enige waarborge verskaf nie,” het Gigaba Saterdag in 'n onderhoud met ENCA gesê.
Gigaba het ook die wenkbroue laat lig deur sy omstrede raadgewer, prof. Chris Malikane, saam met hom Amerika toe te neem vir die paai-toer van beleggers en kredietgradeerders.
Malikane het onlangs 'n hoogs aanvegbare pleidooi vir die nasionalisering van Suid-Afrika se banke gedoen.
Gigaba het hom van dié uitsprake gedistansieer.
'n Foto van Malikane in Washington is die naweek op sosiale media in 'n twiet deur Mayihlome Tshwete, Gigaba se woordvoerder, geplaas.
In die twiet sê Tshwete dit is “op die laaste vergadering van die dag” by die Internasionale Monetêre Fonds (IMF) in Washington geneem.
Tshwete sê ook: “Ek het gedog ek sou die prof die leuens oor hom op Twitter wys.”
David Maynier, DA-LP, sê die indruk dat Malikane deur Gigaba “soos 'n skoolseun” in die openbaar tereggewys is en dat sy “dae getel is”, is net 'n front.
“Niks kan verder van die waarheid wees nie, want dit blyk nou Malikane het die minister vergesel . . .”
Hy meen ook Malikane se teenwoordigheid sal 'n groot rooi vlag vir internasionale finansiële instellings, beleggers en kredietgradeerders in die VSA wees.
Lagarde
Gigaba sou volgens die SAUK Sondag met Christine Lagarde, besturende direkteur van die IMF, vergader en het in 'n onderhoud gesê die fokus bly op “inklusiewe groei” sodat die land sy beleggersgraad-status kan herwin.
Die kanse is baie groot dat Moody's die ander twee kredietgraderingsagentskappe sal volg en Suid-Afrika afgradeer, sê prof. Raymond Parsons van die Noordwes-Universiteit se sakeskool.
“As jy Suid-Afrika se ekonomiese vooruitsigte in oënskou neem, is die koeël eintlik reeds deur die kerk, ongeag wat Moody's se besluit sou wees.”
Al wat die land nou kan doen, is om die skade aan die ekonomie van 'n “harde landing” ná rommelstatus te probeer beperk, sê Parsons.
As daar gekyk word na die uiteindelike impak op die koste van lenings vir sowel die staat as die private sektor, is dit die kombinasie van Standard & Poor's en Moody's se rommelgraderings, eerder as Fitch s'n, wat die grootste risiko vir Suid-Afrika op die internasionale effektemark skep, waarsku Parsons.
“Die Suid-Afrikaanse ekonomie word nou onvermydelik 'n ongeval van politieke binnegevegte op verskeie vlakke.”
Plaaslik begin die private sektor ook die negatiewe uitwerking van die afgradering voel.
Vrydag het die voedselreus Pioneer Foods bekend gemaak dat samesprekings oor 'n groot internasionale transaksie afgelas is “weens die onlangse afgradering van Suid-Afrika se staatskuld en die potensiaal vir bykomende afgraderings”.
Parsons sê Suid-Afrika se ekonomiese uitkomste vir die volgende paar maande sal deur “dade eerder as woorde” gevorm word.
“Die markte, beleggers en die graderingsagentskappe sal ekonomiese realiteit eerder as politieke retoriek beoordeel.” – Netwerk24
Kommentaar
Republikein
Geen kommentaar is op hierdie artikel gelaat nie