'Horingsmokkelaar' by Vioolsdrif-grenspos vas

Pleitooreenkoms met SA owerhede

28 July 2020 | Misdaad
Francoise Steynberg – 'n Man met dubbele burgerskap en twee identiteite wat met die rooftog van 33 renosterhorings uit 'n kluis in 'n huis op Outjo in September 2019 verbind word, is in Februarie by die Suid-Afrikaanse grenspos, Vioolsdrift, met twee renosterhorings vasgetrek.

Annanias Jeremia Amukwa Shikongo oftewel Thomas Francisco met die bynaam Chester, en twee Mosambiekers het glo probeer om die twee renosterhorings vanaf Suid-Afrika na Namibië te smokkel.

Shikongo is verlede jaar ná die opspraakwekkende renosterhoringdiefstal op Outjo in Namibië in hegtenis geneem. Die eienaar van 'n private lodge langs die Etosha Nasionale Park het sy renosters onthoring om stropery te voorkom en die horings in sy kluis geberg.

Tydens Shikongo se inhegtenisneming is 'n vuurwapen en ammunisie sonder die nodige lisensies by hom gevind. Hy het skuldig op hierdie klagte gepleit en 'n boete betaal.

Volgens die Namibiese polisie (Nampol) word vermoed dat Shikongo die vuurwapens en juwele wat ook uit die kluis van die renostereienaar gesteel is, in Suid-Afrika verkoop het.

Geen van die gesteelde goedere is teruggevind nie, maar die vermeende Angolese koper van die renosterhorings is in Maart vanjaar in hegtenis geneem.



BORGTOG VAN N$5 000

Shikongo is egter op 11 November in die Outjo-landdroshof op borgtog van N$5 000 vrygelaat.

Hy moes weer op 15 April in die landdroshof op Outjo verskyn, maar het nie opgedaag nie. 'n Lasbrief is vir sy inhegtenisneming uitgereik.

Ene mnr. Thomas Francisco is op 3 Februarie by Vioolsdrif deur die Suid-Afrikaanse polisiediens (SAPD) met twee renosterhorings in sy besit in hegtenis geneem.

Die hoof van die eenheid van be­skermde hulpbronne (PRU) van Nampol en die Blue Rhino-taakspan, komm. Barry de Klerk, het gister aan Republikein gesê Nampol het nou saam met die Valke van Suid-Afrika gewerk om die beskuldigde se identiteit vas te stel.

“Hy het beide Namibiese en Suid-Afrikaanse burgerskap, maar ver­skillende identiteite – Shikongo en Francisco.

“Nampol het op 7 Februarie inligting van die SAPD op Springbok ontvang dat 'n Suid-Afrikaanse burger, mnr. Thomas Francisco, en twee Mosambiekers in hegtenis geneem is. Francisco het sy Namibiese identiteit aan die SAPD ontken en was in besit van 'n geldige Suid-Afrikaanse paspoort en identiteitsdokument,” het De Klerk gesê.

“Nampol het destyds Shikongo se vingerafdrukke geneem toe hy in hegtenis geneem is, wat 'n skoon rekord van hom aangedui het. Die SAPD het Nampol met Francisco se vingerafdrukke voorsien wat positief met Shikongo s'n verbind is.

“Die foto van die Suid-Afrikaner, sy tatoeëermerke en letsels het ooreenkomste met die beskuldigde in die renosterdiefstalsaak van Outjo gehad,” het De Klerk verduidelik.

Groot ontevredenheid heers onder Namibiese private renostereienaars omdat Francisco 'n pleitooreenkoms op die klagte van die onwettige besit en vervoer van renosterhorings met die Suid-Afrikaanse owerhede bereik het.

Sy pleitooreenkoms behels 'n boete van R50 000 of 18 maande gevangenisstraf waarvan 24 maande vir drie jaar opgeskort is.

“Waarom is Shikongo in die eerste plek op borgtog van slegs N$5 000 vrygelaat?” vra 'n Namibiese renostereienaar.

Die eienaar van die 33 renosterhorings is net so onthuts en sê ligte strawwe soos hierdie sal geensins renosterstropers en -horingsmokkelaars ontmoedig nie.

“Dit maak ons en die owerhede moedeloos wat al die harde werk doen om wildmisdadigers vas te trek,” het hy aan Republikein gesê.

Francisco se Mosambiekse medebeskuldigdes sou gister weer in die hof op Springbok verskyn het.

- [email protected]

Soortgelyk

 

Covid-19: Verkiesings ‘kompleks, intens’

1 uur gelede | Politiek

Denver Kisting en Kristien Kruger – Die hoofkiesbeampte van die Verkiesingskommissie van Namibië (ECN), mnr. Theo Mujoro, sê om die plaaslike owerheid- en streekraadsverkiesings later...

Eina, jou doring

1 uur gelede | In beeld

Kristien Kruger het die foto van die geelvink wat op ’n doringdraad hardloop in haar tuin in Klein Windhoek geneem.

‘Kommerwekkende styging’ in Windhoek-gevalle

1 uur gelede | Gesondheid

Henriette Lamprecht – Die aantal Covid-19-gevalle in Windhoek is besig om vinnig te styg, ‘n situasie wat deur die minister van gesondheid en maatskaplike dienste,...

Sluit van howe in openbare belang- Dausab

1 uur gelede | Howe

Denver Kisting – Me. Yvonne Dausab, die minister van justisie, sê hoewel hofdienste, wat ’n integrale deel van geregtigheid vorm, beperk sal wees vanweë beskikbaarheid...

Weer vir 12 Augustus 2020

1 uur gelede | Weer

WEERWAAK: Koue toestande sal in die Suide voorkom. BINNELAND: Sonnig en matig in die Suide. Elders sal dit sonnig en warm tot baie warm wees....

Uitlewerings op ys weens virus

1 uur gelede | Misdaad

“Daar is individue van belang, wat vermoedelik in ons buurlande is; sommige is opgespoor en (ons) wag op die afhandeling van die vereiste administratiewe prosesse.”...

Eros se aanloopbaan opgeknap

1 uur gelede | Vervoer

Ronelle RademeyerOfskoon daar nie geld is vir omvattende rehabilitasie van die aanloopbaan by die ­Eros-lughawe in Windhoek, gaan tussentydse herstelwerk oor die volgende drie maande...

Trane loop nog steeds oor Frieda Ndatipo

1 uur gelede | Mense

Jana-Mari SmithSes jaar nadat die ­ongewapende protesteerder me. Frieda Ndatipo gedurende 'n geveg tussen die Swapo-strydkinders en die Namibiese polisie voor Swapo se hoofkantoor doodgeskiet...

Lesersfoto's 12 Augustus 2020

1 uur gelede | Lesersfoto's

Gelukkige varkie: “Dit is soos dit hoort,” sê Björn Basler. Familie: AK van Donkerhoek het die foto van die wilde perde by Aus geneem. Mooi:...