Hoop vir Belinda
’n Operasie in die buiteland kan ’n verlamde vrou moontlik weer die gebruik van haar hand en arm teruggee.
Henriette Lamprecht – Meer as 20 jaar ná ’n motorongeluk haar totaal verlam gelaat het, kan ’n vrou van Otjiwarongo danksy ’n gesofistikeerde operasie in die buiteland moontlik die gebruik van haar arm en hand herwin.
Belinda Vermeulen kan niks self doen nie en is afhanklik van helpers om haar daagliks te versorg. Die tendon- of senuwee-oordrag wat in Australië gedoen word, is nou ’n flikkering van hoop wat kan help dat sy die gebruik van haar arm en hand terugkry.
“Dalk nie volle vingergebruik nie,” sê Belinda “maar ek sal my duim en wysvinger kan gebruik om onder meer te skryf.”
Die tendonoordrag is wanneer ’n tendon van ’n werkende spier (skenkerspier) herlei word na die tendon van ’n verlamde spier of been naby ’n gewrig in ’n poging om funksie te herstel.
Bewegings wat herstel kan word, sluit in om jou elmboog reguit te maak en om jou vingers om ’n voorwerp te kan sluit om dit vas te hou.
Belinda se pad strek so ver terug as 1994 met haar verlowing aan Frans Holtzhausen met wie sy in Desember daardie jaar in die huwelik sou tree.
In September 1997 het sy en Frans as paartjie ’n pos by ’n lodge in die Zambezi aanvaar. In ’n tragiese verloop van omstandighede is Frans op 2 Oktober, sy verjaarsdag, dood ná hy deur krokodille gevang is.
“Ek was gebreek en is dadelik terug huis toe (in Windhoek). Alles was te veel en ek het nie gecope nie,” vertel Belinda.
In Januarie 1998 het die kerk waaraan Belinda in daardie stadium behoort het, die Emmanuel-gemeente in Windhoek, ’n sendingjaar onder die vaandel van “Anazoa” (om weer te leef) begin. Belinda het aangesluit en in Junie 1998 is sy deel van ’n groep wat aan ’n uitreikaksie in Swaziland sou deelneem.
Op 27 Junie 1998 op pad Swaziland toe het die bakkie waarin Belinda ’n passasier was, in Botswana gerol.
Haar C4- tot C7-nekwerwels is vergruis en op 25-jarige ouderdom is sy toe van die nek af ondertoe verlam.
Die gebruik van haar een arm is beperk en sy kan glad nie haar vingers gebruik nie.
Dit het haar hele lewe verander, sê Belinda. Sy het haar vaste inkomste verloor, nie tot ’n mediese fonds behoort nie en het by haar ouers gaan bly.
“My ma het my tot my pa se dood in 2007 versorg. Ek kan tot vandag niks self doen nie. Alles moet vir my gedoen word – bad, aantrek, eet, drink en op die bed getel word. Ek het geen privaatheid nie.”
Ook as sy met vakansie gaan, moet Belinda iemand saamneem wat haar kan help.
Sedert November 2007 en danksy die finansiële ondersteuning van die Belinda Vermeulen-trust wat as mediese fonds dien, kan sy ’n woonstel huur en het sy drie vroue wat in skofte werk om haar fisiek by te staan.
“Ek leef op geloof, maar ek sukkel maar finansieel.”
Belinda het van dr. Natasha van Zyl wat senuwee-oordragte in Australië doen, te hore gekom.
“Dit kan my help om arm- en handgebruik terug te kry. Dalk nie die volle gebruik van my vingers nie, maar ek sal my duim en wysvinger kan gebruik. Ek sal beslis ’n hele paar goed met inoefening en die hulp van fisioterapie self kan doen.”
Die Belinda Vermeulen-trust dek nie haar en haar versorger se reis- en verblyfkostes nie.
Volgens Van Zyl beloop die prosedure vir beide haar arms sowat A$150 000 (Australiese dollar).
Vir bydraes tot die Belinda Vermeulen-trust en meer inligting oor die prosedure kan Belinda by 081 297 8177 of [email protected] gekontak word.
– [email protected]
Belinda Vermeulen kan niks self doen nie en is afhanklik van helpers om haar daagliks te versorg. Die tendon- of senuwee-oordrag wat in Australië gedoen word, is nou ’n flikkering van hoop wat kan help dat sy die gebruik van haar arm en hand terugkry.
“Dalk nie volle vingergebruik nie,” sê Belinda “maar ek sal my duim en wysvinger kan gebruik om onder meer te skryf.”
Die tendonoordrag is wanneer ’n tendon van ’n werkende spier (skenkerspier) herlei word na die tendon van ’n verlamde spier of been naby ’n gewrig in ’n poging om funksie te herstel.
Bewegings wat herstel kan word, sluit in om jou elmboog reguit te maak en om jou vingers om ’n voorwerp te kan sluit om dit vas te hou.
Belinda se pad strek so ver terug as 1994 met haar verlowing aan Frans Holtzhausen met wie sy in Desember daardie jaar in die huwelik sou tree.
In September 1997 het sy en Frans as paartjie ’n pos by ’n lodge in die Zambezi aanvaar. In ’n tragiese verloop van omstandighede is Frans op 2 Oktober, sy verjaarsdag, dood ná hy deur krokodille gevang is.
“Ek was gebreek en is dadelik terug huis toe (in Windhoek). Alles was te veel en ek het nie gecope nie,” vertel Belinda.
In Januarie 1998 het die kerk waaraan Belinda in daardie stadium behoort het, die Emmanuel-gemeente in Windhoek, ’n sendingjaar onder die vaandel van “Anazoa” (om weer te leef) begin. Belinda het aangesluit en in Junie 1998 is sy deel van ’n groep wat aan ’n uitreikaksie in Swaziland sou deelneem.
Op 27 Junie 1998 op pad Swaziland toe het die bakkie waarin Belinda ’n passasier was, in Botswana gerol.
Haar C4- tot C7-nekwerwels is vergruis en op 25-jarige ouderdom is sy toe van die nek af ondertoe verlam.
Die gebruik van haar een arm is beperk en sy kan glad nie haar vingers gebruik nie.
Dit het haar hele lewe verander, sê Belinda. Sy het haar vaste inkomste verloor, nie tot ’n mediese fonds behoort nie en het by haar ouers gaan bly.
“My ma het my tot my pa se dood in 2007 versorg. Ek kan tot vandag niks self doen nie. Alles moet vir my gedoen word – bad, aantrek, eet, drink en op die bed getel word. Ek het geen privaatheid nie.”
Ook as sy met vakansie gaan, moet Belinda iemand saamneem wat haar kan help.
Sedert November 2007 en danksy die finansiële ondersteuning van die Belinda Vermeulen-trust wat as mediese fonds dien, kan sy ’n woonstel huur en het sy drie vroue wat in skofte werk om haar fisiek by te staan.
“Ek leef op geloof, maar ek sukkel maar finansieel.”
Belinda het van dr. Natasha van Zyl wat senuwee-oordragte in Australië doen, te hore gekom.
“Dit kan my help om arm- en handgebruik terug te kry. Dalk nie die volle gebruik van my vingers nie, maar ek sal my duim en wysvinger kan gebruik. Ek sal beslis ’n hele paar goed met inoefening en die hulp van fisioterapie self kan doen.”
Die Belinda Vermeulen-trust dek nie haar en haar versorger se reis- en verblyfkostes nie.
Volgens Van Zyl beloop die prosedure vir beide haar arms sowat A$150 000 (Australiese dollar).
Vir bydraes tot die Belinda Vermeulen-trust en meer inligting oor die prosedure kan Belinda by 081 297 8177 of [email protected] gekontak word.
– [email protected]
Kommentaar
Republikein
Geen kommentaar is op hierdie artikel gelaat nie