Hallo, Mêggie, Herman en Arrie Warrie!

Jy moet onder ’n baie swaar klip bly of iewers op ’n plek in die boendoes sonder enige sein skuil as jy nie bewus is van Archie se pa en ma wat ’n middelvinger gewys het vir almal wat so lelik met hulle was nie. My eerste gedagte was “you go, Harry en Megs”, wel met baie empatie vir ouma Liesbet wat toe met die gebakte Yorkshire-poeding in haar skoot sit omdat haar kleinseun en sy Hollywood-eggenote meer wil wees as lintknippers en balkonstaners. Natuurlik is álles, veral volgens die geniepsige Britse media en stywelip publiek, Mêggie se skuld. Die kaal kol op Herman se agterkop is nie te wyte aan ’n gebrek aan foliensuur wat die erge uitval van hare veroorsaak nie, nee, dis oor dit Mêggie se geliefkoosde sitplekkie is. Herman wou nog linte knip en parades inspekteer en vliegtuie op die Buckingham-paleis se balkon saam met ouboet Willem en pa Charlie kyk en salueer, maar moeilike Mêggie sê jy kan net soveel keer saam met ouma Liesbet ten aanskoue van fotograwe en televisiekameras treinry en kerk toe gaan, dan is dit ook nie meer snaaks nie. Hoera vir Mêggie en Herman wat besluit het as hulle nie saam met ouma Liesbet wil Kersfees hou nie en eerder by ouma Doortjie in Kalifornië presente wil oopmaak, dan doen hulle dit. Dat hulle wil hê klein Arrie Warrie moet net ’n gewone seuntjie wees en kan tong uitsteek en fietsry in die straat en sy eerste skooldag en kys kan hê sonder om die volgende dag op die voorblad van ’n koerant of ’n betaalkanaal se hoofstorie te wees. Al is ouma Liesbet se bloed blou soos ’n bul en dra sy ’n kroon en duur handsakke wat altyd by haar hoed, rok en skoene pas, en al is Herman ’n prins met ’n uniform en was hy in ’n duur privaat skool ouer as sy oupa Flip, en al is een Mêggie by wyse van ’n trouring en die feit dat sy ook nou op die balkon langs skoonsus Katrien kan staan ’n hertogin, is hulle net ménse. Net soos ek en jy, sê Mêggie en Herman, en verdien hulle om ’n lewe te lei sonder die media wat veral venynig in Mêggie se rigting bly mik. Natuurlik aangevuur deur Mêggie se pôps TomTom wat nie skroom om sy dogter keer op keer uit te lewer aan juis die wolwe wat sy en Herman so van hul lywe wil weghou nie. Seriaas. Met ’n pôps soos TomTom gaan bly ek ook in een of ander miljardêr se herehuis iewers op ’n oewer met ’n veiligheidsheining en kameras. Nou weet ons almal hoekom ouma Doortjie se frons tussen die oë so diep bly kerf. Nie oor die fotograwe wat ná die koninklike katedraaltroue nou skielik agter ’n bos uitspring as sy soos elke Maandag vir die hoeveelste dekade skuins ná drie haar jogaklas oudergewoonte in die gemeenskapsaal drie blokke bywoon nie. Nee wat, daardie kerffronsie is oor skinderbek TomTom teen wie haar ouers haar toe al beslis moes gewaarsku het. Nut vir niks, sê Doortjie se kerffronsie.Mêggie en Herman en klein Arrie Warrie het verlede jaar so lekker by die bure anderkant die Oranje gekuier, wat beteken hulle kan mos nou net sowel hier by ons kom bly. Vir ’n feit is daar iewers ’n parlementslid wat ’n ekstra inkomste wil in uit sy omheinde hoëmuurhuis in Luxury Hill om die maandelikse paaiemente so bietjie af te bring, wat saam met die nuwe Range Rover ’n man (of vrou) lelik ná betaaldag kan wurg. Ampsmotors maak orals hul verskyning, van by Built It vir sement in die kattebak van die Mercedes oplaai tot by die visskoonmaakplek op Hentiesbaai. Beslis kan die sleutels met Mêggie en Herman gedeel word, ’n karstoeltjie vir Arrie Warrie sit ons sommer tjoef-tjaf in. Mêggie kan by die honderde sopkombuise die land vol gaan sop skep en met die kinders speel en siende dat Herman haar nou pimp vir voice overs kan sy mos help met stemwerk vir advertensies op die nasionale radio- en televisiediens. Vir Herman het ons olifante en renosters, en ek is seker die weermag sal glad nie omgee as hy so nou en dan op die paradegrond die troepe wil inspekteer nie. Jammer van die Namibiese dollar en die Britse pond, maar ’n voormalige prins en aktrise kan darem nou ook nie alles kry wat hul hart begeer nie. Of hoe.

Hallo, Mêggie, Herman en Arrie Warrie!

Kommentaar

Republikein 2025-07-04

Meld asseblief aan om kommentaar te lewer

Hallo, Mêggie, Herman en Arrie Warrie!

Kommentaar

Republikein 2025-07-04

Meld asseblief aan om kommentaar te lewer

MELD AAN

Advertensie