Groter, beter Hosea Kutako

Augetto Graig - Die Internasionale Lughawe Hosea Kutako kry binnekort sy nuwe baadjie.Die amptelike sooispitseremonie van die projek is gister gehou. Bykans N$250 miljoen se opgraderings en uitbreidings van die tans beknopte geriewe skop na verwagting volgende week af. Die kopseer veroorsaak deur lang rye by die land se grootste lughawe is dus amper verby.Die adjunk- eerste minister en minister van internasionale betrekkinge en samewerking, me. Netumbo Nandi-Ndaitwah, het gister se geleentheid behartig. Dit was in haar hoedanigheid as voorsitter van die spesiale kabinetskomitee wat laat in 2018 gestig is om dringend na die vergroting van die lughawe om te sien.Die regering, by wyse van die ministerie van werke en vervoer, sal N$155 miljoen beskibaar stel, volgens die Namibië Lughawensmaatskappy (NAC) se raadsvoorsitter, dr. Leake Hangala. Nog N$95 miljoen sal dié staatsonderneming verantwoordelik vir die land se lughawens self bydra, het hy gesê. Hangala het klem gelê op die toename in besoekers na die internasionale lughawe, veral sedert 2016 toe meer buitelandse lugrederye Hosea Kutako begin gebruik het. “In 2018 was die totale aantal passasiers wat deur die Hosea Kutako-lughawe beweeg het, op meer as een miljoen geskat. Ons verwag dit sal op die trant voortduur, wat tot verdere opeenhopings kan lei,” het hy gesê.Dié situasie het groot druk op die beskikbare geriewe geplaas, en die nood om die lughawe uit te brei het dringend geraak, het Hangala gesê. Volgens hom is die doelwit om die lughawe se kapasiteit te verdubbel om die toename in besoekers tot 2030 te akkommodeer. Die aantal aankomstoonbanke sal van 14 tot 18 vermeerder word, veiligheidspunte van drie tot vyf, en immigrasietoonbanke vir vertrekkende passasiers van drie tot sewe, elk deur twee beamptes beman. Die vertreksaal word uitgebrei, asook die bestaande eindpuntgeboue wat 'n splinternuwe aankomsaal sal huisves. Sewentien immigrasietoonbanke sal daar gevestig word, aansienlik meer as die agt wat nou in gebruik is. Die bagasiesaal word ook opgegradeer, met drie nuwe bagasievervoerbande wat vragte van drie groot vliegtuie op 'n slag kan hanteer. Die huidige twee kan saam die bagasie van net een groot vliegtuig vervoer.Die historiese ou eindpuntgeboue kry ook nuwe lewe nadat dit tot onlangs slegs tydens besoeke van belangrike persone en spesiale geleenthede gebruik is. Dit sal nou vir plaaslike vlugte opgeknap word, het die NAC se woordvoerder, mnr. Dan Kamati, bevestig.Die uitvoerende hoof van die NAC, mnr. Bisey /Uirab, het gesê dié lank uitstaande belegging sal Hosea Kutako ophef tot die hoogste vlakke van die internasionale lughawe-ervaring. Hy sê die maatskappy verwag werknemers en alle ander diensverskaffers by die lughawe moet ook hul dienslewering verbeter om te verseker besoekers verlaat die lughawe “met die beste ervaring”. Die boukontrak is aan die Nexus-groep toegeken. Dié plaaslike bou- en siviele konstruksiegroep het 'n jaarlikse omset van N$500 miljoen en meer as 700 werknemers, volgens hul webwerf. Hangala het hulle aangemoedig om teen September 2020 die werk klaar te hê. Nandi-Ndaitwah het bygevoeg “dit sal 'n ramp wees as julle laat is”.- augetto@republikein.com.na

Groter, beter Hosea Kutako

Kommentaar

Republikein 2025-07-04

Meld asseblief aan om kommentaar te lewer

Groter, beter Hosea Kutako

Kommentaar

Republikein 2025-07-04

Meld asseblief aan om kommentaar te lewer

MELD AAN

Advertensie