GFN bereik kruispad by jaarkongres

Andrew Poolman

’n Nuwe topbestuur sal by komende Saterdag se algemene jaarvergadering verkies word wat die Gimnastiekfederasie van Namibië (GFN) vorentoe moet neem.

Binnepolitiek en administratiewe probleme het die sport die afgelope jare voortdurend geteister, wat daartoe aanleiding gegee het dat die meerderheid uitvoerende bestuurslede van die GFN verlede jaar hul bedankings ingedien het. Dit was die tweede keer in onlangse jare dat die beheerliggam in só ’n krisis gedompel is.

Altesame 17 posisies op die uitvoerende bestuur moet gevul word by komende Saterdag se jaarvergadering wat om 09:00 by die Klippenberg Buiteklub op Karibib sal begin.

Die jaarvergadering word gekoördineer deur ’n tussentydse komitee wat deur die Namibiese Sportkommisie (NSC) en die Namibiese Nasionale Olimpiese Komitee (NNOK) saamgestel is, nadat laasgenoemde twee partye laas week ook tot ’n vergelyk gekom het oor die pad vorentoe.

Me. Petra Thorburn, wat die afgelope sowat 18 maande as die waarnemende president van die GFN gedien het, sê sy het gedurende 2018 haar bedanking ingedien omdat sy nie meer langer vir die voortdurende binnegevegte kans gesien het nie.

“Ná my bedanking het nog meer van die uitvoerende bestuur dieselfde gedoen.”

Thorburn sê sy is ’n voorstander dat die enigste werkbare toekomsplan is indien mense met ondervinding van sportadministrasie, maar sonder direkte bande met enige klub, die leisels van die GFN-topbestuur oorneem.

“Dit is menslike natuur dat betrokkenes deurentyd die motiewe van jou besluite in twyfel trek wanneer jy op die bestuur van beide jou klub en die GFN dien.

“Ek is ’n voorstander dat ons mense van buite inbring, wat bloot die regulasies toepas en nie uitsonderings maak of die reëls buig ten gunste van enige party nie.

“Ek stem saam met die minister (van sport, jeug en nasionale diens, mnr. Erastus Utoni) se bepaling dat nominasies vir uitvoerende posisies gemotiveer moet word met die persoon se agtergrond en vertoningsrekord in sportadministrasie.”

Thorburn het aangedui dat sy self nie belang stel om op die GFN-bestuur voort te gaan nie, maar eerder op die vooruitgang van haar Windhoekse klub, Crete, wil fokus.

Daar is 22 aktiewe gimnastiekklubs in die land wat vanaf Keetmanshoop in die suide tot Tsumeb in die noorde strek, het me. Joan Smit van die NNOK verlede week gesê.

Nog drie aansoeke van nuwe klubs vir affiliëring by die GFN moet ook nog oorweeg word, het sy gesê. Sommige klubs spesialiseer net in een dissipline van gimnastiek, terwyl ander twee of meer aanbied.

Gimnastiek kom dikwels ter sprake as ’n voorbeeld van die Sportkommissie se aandrang dat die riglyne van die Sportwet gevolg moet word en dat beheerliggame se konstitusies dienooreenkomstig op datum gebring word.

Spesifiek word verwys na die bepalings dat uitvoerende bestuurslede van nasionale beheerliggame nie langer as tien jaar posisies mag beklee nie, asook dat net Namibiese burgers verkiesbaar mag wees.

Hoewel sperdatums vroeër ter sprake was, is die koerant intussen ingelig dat benoemings vir die GFN-posisies selfs nog Saterdagoggend by die jaarkongres gedoen kan word.

Die vier lede van die koördinerende komitee kom nie vir uitvoerende poste in aanmerking nie, naamlik mee. Marja Woortman, Martie Opperman, Dione Dichtl en Tessa Rossouw.

By laas week se nuuskonferensie waar die NSC en die NNOK ’n openbare vredespyp gerook het, het die NNOK se sekretaris-generaal, mnr. Abner Xoagub, gesê dié twee nasionale beheerliggame het 28 sportkodes in gemeen en dat meer gereelde skakeling nodig is om moontlike misverstande uit die weg te ruim, tot voordeel van die land se atlete.