‘Geen personeel betrokke by stropery’

Francoise Steynberg Die ministerie van die omgewing, bosbou en toerisme het bevestig dat geen van sy personeel by wildstropery betrokke was nie en stropery het in nasionale parke afgeneem. Die woordvoerder, mnr. Romeo Muyunda, sê volgens die ondersoek na die vuurwapens wat in die Etosha Nasionale Park gekonfiskeer en vir ballistiese toetse gestuur is, is geen personeellid aan enige stroperysaak verbind nie. Die hoof van die Blue Rhino-taakspan, komm. Barry de Klerk, het dit aan Republikein bevestig."Geen van die vuurwapens wat vir ballistiese toetse gestuur is, kon positief met 'n personeellid van die ministerie verbind word nie," het hy gesê.Muyunda het bygevoeg “as daar so ’n geval is, sal ons stappe doen en strafregtelike klagte teen ’n personeellid aanhangig maak”.Wat stropery in nasionale parke betref, is volgens die ministerie slegs 38 van die 81 gestroopte renosters in 2018 in parke gestroop met 43 buite parke. “In 2019 is 21 renosters in parke gestroop teenoor die 31 buite parke. In 2020 is 13 renosters binne en 18 buite parke gestroop,” het Muyunda gesê.Hy sê tot dusver vanjaar is slegs een renoster buite ’n nasionale park gestroop en geen binne parke nie.“Die Namibiese weermag (NDF) en polisie is in ons nasionale parke waar ’n afname in stropery waargeneem word.” Die woordvoerder sê wat olifantstropery betref, is aanvanklik erg in nasionale parke, veral Bwabwata Nasionale Park gestroop, “maar weens ingrypings van die NDF, polisie en die ministerie, het dit aansienlik afgeneem.” Volgens die ministerie se statistieke is 101 olifante in 2016, waarvan die meerderheid in Bwabwata, gestroop. “In 2020 is slegs 11 olifante gestroop – 5 daarvan in Bwabwata.” VELDBRANDEVolgens die ministerie het veldbrande wat in parke gewoed het nie veel skade aangerig nie, “behalwe ’n brand in 2011 wat twee renosters in Etosha geëis het”. Muyunda sê in die “beheerde, bestuurde veldbrand” verlede jaar in Etosha het geen renosters gevrek nie. “Dit was ’n goeie brand en die weiding het in daardie gebiede, veral met die huidige goeie reën, verbeter.”Hy sê alhoewel daar kommer heers oor die impak van die droogte op die renosterbevolking in die Kunenestreek, het die situasie in dié streek ook met die onlangs reën verbeter. “Namibië het steeds ’n gesonde renosterbevolking wat aanhou groei. Ons moet almal ’n rol in die bewaring van ons renosters speel,” is Muyunda se mening. Hy sê die ministerie gaan vanjaar ’n nuwe bewaring- en bestuurstrategieë vir die bewaring van wit- en swartrenosters, asook olifante, van stapel stuur. - francoise@republikein.com.na

‘Geen personeel betrokke by stropery’

Kommentaar

Republikein 2025-07-04

Meld asseblief aan om kommentaar te lewer

‘Geen personeel betrokke by stropery’

Kommentaar

Republikein 2025-07-04

Meld asseblief aan om kommentaar te lewer

MELD AAN

Advertensie