Republikein Newspaper

Henriette Lamprecht – ’n Bejaarde Windhoekse vrou met onderliggende longprobleme en ernstig siek aan Covid-19, is noodgedwonge per ambulans na ’n hospitaal op Rundu vervoer, nadat dit te donker was vir ’n vliegtuig om met ’n noodvlug op dié dorp se aanloopbaan te land. Die 70-jarige vrou was reeds op suurstof.
Die aanloopbaan by Rundu het nie landingsligte nie, wat vliegtuie noop om net in daglig te land.
GESKARREL
’n Beskikbare bed in die hoofstad is reeds vanaf Maandag vir die vrou gesoek. Volgens ’n familielid was sy in so ’n mate van suurstof afhanklik dat sy nie daarvan afgehaal kon word nie. “Die oomblik wat dit probeer is, het haar suurstofvlakke geval,” het sy gesê. Daar is selfs by die Robert Mugabe-kliniek in die hoofstad aangeklop vir hulp, maar hulle kon haar ook nie akkommodeer nie.
“’n Oop bed was by ’n hospitaal op Swakopmund beskikbaar, maar hulle het nie die nodige toerusting gehad om ’n Covid-pasiënt te behandel nie.”
’n Bed is uiteindelik in ’n hospitaal op Rundu gevind en die besluit is geneem om die bejaarde vrou per noodvlug weens die aard van haar toestand te vervoer. Volgens die familielid was dit egter reeds donker en weens ’n gebrek aan landingsligte is besluit om haar eerder per ambulans te vervoer – 586 kilometer.
Die familielid het gesê sy het in die vroeë oggendure op die dorp aangekom en haar toestand is stabiel.

GOBABIS ’n BRANDPUNT
Intussen is Gobabis veral hard deur die pandemie getref, met die eienaar van Spar, mnr. Pierre Venter, wat aan Covid oorlede is. Uit die 84 werknemers by dié winkel, het 29 positief getoets. Ook ’n pastoor en die eienaar van ’n slaghuis op die dorp is ernstig
siek.
Die ministerie van binnelandse sake, immigrasie, veiligheid en sekuriteit het intussen in ’n verklaring laat weet die kantoor op die dorp is ook weens Covid-gevalle onder personeel tydelik gesluit.
Die Omahekestreek bestaan net uit een gesondheidsdistrik, Gobabis, en vrygestelde data oor gevalle sluit alle ander dorpe en nedersettings in die streek in. Tot op hede is 1 608 in die streek aangemeld.
In die laaste sewe dae tot Dinsdag 8 Junie is 232 nuwe gevalle aangeteken, ’n styging van 17%.
Gemeet oor sewe dae word 33 gevalle per dag aangeteken; dieselfde as op Swakopmund. Gobabis het nou die derde meeste gevalle in die land ná Windhoek (gemiddeld 295 per dag) en Rehoboth (46).
Tot op hede is Gobabis se 34 sterftes, ofte wel 2,1% van positiewe gevalle, die hoogste koers in die land naas Otjozondjupa, op 2,2%.
Mense word as sterftes gelys in die streek waar hulle gesterf het en nie waar hulle aanvanklik positief getoets het nie. Omaheke was teen Dinsdag ook met 477 die streek met die meeste persone wat in staatsgoedgekeurde kwarantyngeriewe gehuisves word.
In die streek is oor die sewe dae tot Dinsdag 736 persone in kwarantyn opgeneem en 588 ontslaan. Dit sluit persone uit wat tuis kwarantyn toepas.
– [email protected]