Gebruik jóú talente ten volle

Adolf Kaure – Ons het almal talente – hetsy geneties of deur ons onderskeie omgewings aangeleer. Die samelewing het egter sommige laat glo dít wat hulle het, is nie goed genoeg nie.

Eerstens voel ek mense se persepsie van onderrig is effens verwronge. Baie ouers glo dat almal akademies begaafd moet wees en goed in wiskunde, fisiese wetenskap en biologie moet presteer. Dié perspektief kan egter as tonnelvisie – wat uit ’n subjektiewe verwysingspunt kom – beskou word.

Ek glo elke individu is anders – nie net as dit kom by persoonlikheid nie, maar ook oor hoe hul breine gevorm is. Sommige mense is meer analities, terwyl ander kunstig is. Alhoewel dié twee op ’n sekere punt oorvleuel, dink ons samelewing sukses word bepaal deur hoe goed jy op skool presteer in die meer tradisioneel akademiese vakke wat ek vroeër genoem het.

Gevolglik word mense wat begaafd is in tegniese vakke as onderpresteerders of “stadig” bestempel, terwyl hulle genetiese samestelling net anders is.

Daar word neergesien op vakke soos kuns, kunsvlyt en loodgieterswerk – wat kwansuis vir “stadige kinders” is. Ek is egter bly die Namibiese regering het by die res van die wêreld ingeskakel deur tegniese beroepsopleiding ’n prioriteit te maak – soos beveel deur die ministerie van hoër onderwys.

Ek sê dit omdat ons nie almal dokters en wetenskaplikes kan wees nie. Om nié een van hulle te wees nie, maak nie van jou ’n mislukking nie.

Kuns is oral waar jy kyk. Kunstenaars is diegene wat vorendag kom met die idees wat lei tot die argitektuur van die beste ontwerpte geboue. Hier op Swakopmund, omring deur van die beste argitektuur in Namibië, kan ek kuns waardeer. Ons behoort nie die belangrikheid van ’n loopbaan te meet aan die salaris wat die persoon verdien nie, maar die verskil waardeer wat talent in ons samelewing maak.

Christine Mboma en Beatrice Masilingi is waarskynlik as dromers beskou voordat hulle Namibië met hul heldedade by die Olimpiese Spele op die wêreldverhoog geplaas het. Hierdie ongelooflike mylpaal is net moontlik omdat hulle hul talente gebruik en hoop gee aan almal wat hopeloos voel in die nasleep van die Covid-19-pandemie.

Hopelik kan dié voorbeeld almal inspireer om dapper aan hul drome vas te klou en hul talente te gebruik om die hoop wat in ons samelewing nodig is, aan te wakker deur ’n dryfveer vir verandering te wees – verandering wat ander kan inspireer.