Gazza sê askies

Henriette Lamprecht – “Ek is werklik jammer.”

Lazarus Shiimi, beter bekend as die gewilde Namibiese musikant Gazza, het in ’n verklaring sy opregte spyt uitgespreek oor ’n “smaaklose en onverskillige” grap gemik op sy vroulike aanhangers wat hy Saterdag tydens die #081every1Fest in Windhoek gemaak het.

Gazza het gespot “ek wil met almal trou” en het die wens uitgespreek dat hy ’n Moslem was.

“Nie net was die grap in swak smaak en onnodig nie, maar dit het ook die Moslem-gemeenskap in Namibië seergemaak en aanstoot gegee,” sê Gazza in ’n verklaring.

Volgens hom is hy trots daarop dat hy behalwe ’n musikant ook ’n rolmodel is en iemand wat voortdurend aan nasiebou werk.

“Tydens die vertoning was ek oorweldig deur die liefde en ondersteuning van Namibiërs wat my vir baie jare op hul skouers gedra het. Die opmerking het te midde dié opwinding gekom om ’n grap met my vroulike aanhangers te maak.”

Dit moet egter nie as ’n verskoning dien nie, omdat hy “van beter moes geweet het”.

“Ons leef in ’n tyd waarin ons dikwels met haatspraak, onverdraagsaamheid en afknouery gekonfronteer word. Dit is daarom ons morele verantwoordelikheid as mense om mekaar voortdurend verdraagsaamheid, empatie en waagmoed te leer. Slegs dan kan ons in ’n samelewing leef wat menswaardigheid respekteer en as veilige plek vir alle mense dien. Grappe en aanmerkings wat mense seermaak, het geen plek in ons samelewing nie.”

Volgens Gazza het hy die afgelope jare die ondersteuning van Namibiërs van alle godsdienste en stamme geniet.

“As onvolmaakte mense moet ons onsself altyd dophou en giftige gedrag voortdurend afleer.”