Fees van stories voor die vuur

12 July 2019 | Kuns en vermaak
By vanjaar se Windhoek Woordfees van 3 tot 10 Augustus kom stories oudergewoonte aan die bod en kan feesgangers uitsien na die skreeusnaakse staaltjies van drie van Namibië se voorste vertellers.

Die Windhoekse bourekenaar, Dawie Prinsloo, het reeds by twee vorige feeste die gehoor laat skater. Sy storiematers vanjaar is die skrywer en joernalis Lloyd Zandberg en die bekende en geliefde afslaer, Frans Steyn, wat die landbougemeenskap reeds die afgelope 25 jaar by veilings met sy kwinkslae vermaak.

Piet Heyns is soos elke vorige jaar weer die storiemeester en sal op gevatte wyse sorg die storievertellers hou nie terug nie en dis hulle bestes op.

DIE VERTELLERS

Frans het as een van tien kinders grootgeword in ‘n huis van stories en grappe. Reeds in sy weermagdae was hy die een wat die manne moes laat lag. Hy was op baie troues seremoniemeester en het by al wat byeenkoms is al as aankondiger opgetree: van babaskoue tot skoue en stampkarwedrenne. Hy is ook al 12 jaar lank die aankondiger by die Namibiese Saalperdkampioenskappe en het al verskeie kere aan die Windhoek-karnaval (Wika) se Internasionale Aand deelgeneem .

Nadat hy in 2018 ‘n oudisie by MultiChoice gedoen het om stories te vertel, word hy genooi as storieverteller na die Oppiestoep-program wat op kykNET uitgesaai word.

‘n Vinnige grap of storie het deel geword van sy werk as afslaer en hy geniet dit om groot storievertellers se aksente en maniertjies na te maak.

Lloyd Zandberg is in 1991 in Windhoek se nonnehuis gebore. Sy biografie lees só: "Hy is ’n Libra, wat beteken hy hou nie van kamp, Wimpy, wiskunde, rosyntjies of glashonde nie. Hy is korter as sy pa, mollig, en het ’n ongeskikte baard. Direk na sy geboorte het hy, sy ma en broer Kaap toe getrek op soek na emerald-gras. Toe hulle dit nie kry nie, het hy besluit om maar skool te loop.

“In die Kaap skryf hy sy matriek by die Hoërskool Durbanville en kry net-net te min punte om iets te gaan studeer wat BMW’s, strandhuise en leerbanke kan koop. Met die genade van iewers word hy aanvaar om fotografie by CityVarsity te studeer.

“Hy werk vir ’n tyd lank as kommersiële fotograaf en was deel van verskeie uitstallings. Na 22 jaar keer hy terug na Namibië, waar hy vir die koerante rubrieke skryf en in die aande waiter by ’n Duitse restaurant. Naweke neem Lloyd foto’s van wilde diere en mooi tannies wat lelik sit.”

Lloyd het in 2017 sy debuut- kortverhalebundel, Per Ongeluk (Tafelberg), gepubliseer en het dié uitgewer se topverkoperlys vir debuut- Afrikaanse kortverhale gehaal. Sy tweede boek verskyn in 2019. In 2018 verskyn hy op die gewilde Oppiestoep, en sal later vanjaar weer op dié gewilde storievertelprogram te sien wees.

Dawie, ‘n gebore en getoë Windhoeker, het van jongs af ‘n waardering gehad vir goed wat snaaks is, hetsy gepraat, geskryf of geteken. Al kon hy bitter selde sy skoolwerk onthou, het hy darem ‘n redelike vermoë gehad om ‘n grap of twee in sy grysstof vas te lê.

In 2015 vra die mense wat die Wika organiseer hom om ‘n stukkie te doen vir hulle Internationale Aand. Hy doen so goed met sy stories dat hy in die volgende jare weer gevra word om deel te neem en brei ook sy deelname uit na die kus se karnaval, beter bekend as Küska.

Dawie sê geen ander taal laat hom so uitdruk en kleef aan ‘n mens soos Afrikaans nie, maak nie saak watter aksent saam met jou in die wiegie neergelê is nie. Hy is veral meesterlik met die namaak van aksente en sy kostelike storie oor die Afrikaner en die Duitser wat tussen die rakke by Maerua Spar aan die gesels raak, bly ‘n treffer.

Die Storievuus vind plaas op Saterdag 3 Augustus om 18:00 in die Operahuis by die Village Vierkant in Lilliencronstraat.

Die kaartjies kos N$130. Skoliere, studente en pensionarisse betaal N$110. Wyn sal bedien word.
Vir meer oor die Windhoek Woordfees, besoek www.windhoekwoordfees.com.

Soortgelyk

 

Gróót dag by ECN

9 ure gelede | Regering

Die Verkiesingskommissie van Namibië (ECN) hou vandag 'n openbare sitting by sy hoofkantoor in Windhoek waartydens die bevestigde lys van politieke partye en presidensiële...

A force to be reckoned with

19 ure gelede | Mense

Evany van Wyk Eleven years ago Charmaine Davids decided to create a one-stop shop for all human resources (HR) services and today she is...

Energy-efficiency key to fight climate change

19 ure gelede | Mense

Ruan BestbierThe Bank of Namibia report on Namibia’s second quarter performance found that fuel imports significantly contributed to the decline in the country’s current account....

Sarah Diouf Beyoncé se Afrika-ontwerper

19 ure gelede | Kuns en vermaak

Kollig voorbladfoto

Swapo swig voor ECN-druk

19 ure gelede | Politiek

Denver Kisting – Sestien uit die 17 van Swapo-lede wat volgens ’n interpretasie van die kieswet – en die Grondwet – verbied word om as...

Man gesels uit hospitaalbed oor Outjo-aanval

19 ure gelede | Misdaad

Elvira Hattingh - “Kyk, as ‘n koeël my nie kan onderkry nie, gaan niks nie. “Ek is positief, maar hartseer dat iemand so iets kon...

Smooth operator

19 ure gelede | Mense

Michelline Nawatises Zaskia Joubert has been part of the Sanlam family for more than five years. She joined the company immediately after the successful completion...

Let’s get fiscal

19 ure gelede | Mense

Michelline NawatisesAstrid Jacobi is a born and bred Namibian. She went to school in Windhoek and completed her bachelor’s and honours degrees in accounting at...

Going for it

19 ure gelede | Mense

Wisdom is a girl’s best friendEvany van Wyk In her current role as Bank Windhoek’s communication practitioner for electronic and new media, Veno Mbuende has...