Fairtrade sluit sy kantoor in SA stil-stil
Fairtrade, 'n internasionale onderneming wat in etieseproduksie spesialiseer, het sy Suid-Afrikaanse tak gesluit.
Fairtrade, die bekende handelsnaam vir etiese produksie, het sy kantoor in Suid-Afrika ná agt jaar gesluit, maar sê produkte wat onder dié etiket verkoop word, sal steeds in die land beskikbaar wees.
Suid-Afrika is die wêreld se grootste produsent van wyn onder die Fairtrade-etiket.
Sowat twee derdes van alle wyn wat onder die etiket verkoop word, word in Suid-Afrika geproduseer.
Die rede vir die kantoorsluiting is nie duidelik nie, maar daar word bespiegel dat die verkope van Fairtrade-produkte in Suid-Afrika nie so flink was soos wat gehoop is nie.
Die plaaslike Fairtrade-kantoor se doel was om die verkope van Fairtrade-produkte in Suider-Afrika te bevorder.
Giovanna Schmidt, hoof van mediaverhoudinge van Fairtrade in Bonn, Duitsland, verduidelik die rede vir die kantoorsluiting so: “Fairtrade Label South Africa (FLSA) is in 2009 gestig om die belange van boere en werkers in Suid-Afrika te dien. Oor die afgelope agt jaar het FLSA ’n belangrike rol in die toepassing en bevordering van Fairtrade-standaarde en die Fairtrade-handelsnaam in Suider-Afrika gespeel.”
Die besluit om die kantoor te sluit is eweneens geneem om “produsente, boere en werkers beter te bedien en die bewustheid van verbruikers oor die Fairtrade-etiket te versterk”.
Op die vraag of dit verband hou met die pap ekonomie in Suid-Afrika, sê sy net die besluit is gesamentlik deur die FLSA-belangegroepe geneem.
Sy sê die bestaande lisensiehouers is genooi om ’n nuwe lisensiekontrak met Fairtrade International, die sambreelorganisasie vir Fairtrade wêreldwyd, te sluit.
“Fairtrade International sal die lisensiehouers onder nuwe kontrakte bedien en sal verantwoordelik wees vir die vergunning vir die gebruik van die etiket in Suid-Afrika.”
Sy sê Fairtrade-produkte sal steeds in Suid-Afrika beskikbaar wees. “Ons ambisie is dat Fairtrade-verkope in die toekoms sal aanhou groei.”
Bronwyn Page-Shipp, streekbestuurder van Flocert, wat die sertifisering vir Fairtrade in Afrika en die Midde-Ooste uit Kaapstad doen, het intussen bevestig hul deure bly oop en sake gaan voort soos normaal.
Die organisasie is verantwoordelik vir die ouditering van produsente om seker te maak hulle kom Fairtrade se standaarde na.
Petrus Bosman, besturende direkteur van Bosman Wyne, een van die groot wynprodusente onder Fairtrade, sê dit beïnvloed nie verkope nie omdat feitlik alle wyn wat onder die handelsnaam geproduseer word, uitgevoer word.
“Dit is jammer vir Suid-Afrika, maar Fairtrade bly wêreldwyd groei. Maar dit is groot markte en ons ekonomie kan nie naastenby daarmee vergelyk word nie. Dit was dalk ’n bietjie ambisieus om ’n kantoor hier oop te maak.”
Page-Shipp sê ook Suid-Afrika is ’n baie klein mark vergeleke met die meer gevestigde markte vir sulke eties vervaardigde produkte oorsee.
“Ek was self teleurgesteld oor die sluiting van die kantoor, want dit wys dat daar iets is wat nie werk nie. In ’n land soos Suid-Afrika met al die negatiewe aandag wat ons kry oor die behandeling van ons werkers en die lig waarin sommige sensasiesoekende joernaliste ons wil plaas, is dit ’n jammerte,” het Maryna Calow, kommunikasiebestuurder van Wines of South Africa (Wosa), gesê.
Leán Terblanche, hoof van FLSA, kon nie vir kommentaar opgespoor word nie. Netwerk24
Suid-Afrika is die wêreld se grootste produsent van wyn onder die Fairtrade-etiket.
Sowat twee derdes van alle wyn wat onder die etiket verkoop word, word in Suid-Afrika geproduseer.
Die rede vir die kantoorsluiting is nie duidelik nie, maar daar word bespiegel dat die verkope van Fairtrade-produkte in Suid-Afrika nie so flink was soos wat gehoop is nie.
Die plaaslike Fairtrade-kantoor se doel was om die verkope van Fairtrade-produkte in Suider-Afrika te bevorder.
Giovanna Schmidt, hoof van mediaverhoudinge van Fairtrade in Bonn, Duitsland, verduidelik die rede vir die kantoorsluiting so: “Fairtrade Label South Africa (FLSA) is in 2009 gestig om die belange van boere en werkers in Suid-Afrika te dien. Oor die afgelope agt jaar het FLSA ’n belangrike rol in die toepassing en bevordering van Fairtrade-standaarde en die Fairtrade-handelsnaam in Suider-Afrika gespeel.”
Die besluit om die kantoor te sluit is eweneens geneem om “produsente, boere en werkers beter te bedien en die bewustheid van verbruikers oor die Fairtrade-etiket te versterk”.
Op die vraag of dit verband hou met die pap ekonomie in Suid-Afrika, sê sy net die besluit is gesamentlik deur die FLSA-belangegroepe geneem.
Sy sê die bestaande lisensiehouers is genooi om ’n nuwe lisensiekontrak met Fairtrade International, die sambreelorganisasie vir Fairtrade wêreldwyd, te sluit.
“Fairtrade International sal die lisensiehouers onder nuwe kontrakte bedien en sal verantwoordelik wees vir die vergunning vir die gebruik van die etiket in Suid-Afrika.”
Sy sê Fairtrade-produkte sal steeds in Suid-Afrika beskikbaar wees. “Ons ambisie is dat Fairtrade-verkope in die toekoms sal aanhou groei.”
Bronwyn Page-Shipp, streekbestuurder van Flocert, wat die sertifisering vir Fairtrade in Afrika en die Midde-Ooste uit Kaapstad doen, het intussen bevestig hul deure bly oop en sake gaan voort soos normaal.
Die organisasie is verantwoordelik vir die ouditering van produsente om seker te maak hulle kom Fairtrade se standaarde na.
Petrus Bosman, besturende direkteur van Bosman Wyne, een van die groot wynprodusente onder Fairtrade, sê dit beïnvloed nie verkope nie omdat feitlik alle wyn wat onder die handelsnaam geproduseer word, uitgevoer word.
“Dit is jammer vir Suid-Afrika, maar Fairtrade bly wêreldwyd groei. Maar dit is groot markte en ons ekonomie kan nie naastenby daarmee vergelyk word nie. Dit was dalk ’n bietjie ambisieus om ’n kantoor hier oop te maak.”
Page-Shipp sê ook Suid-Afrika is ’n baie klein mark vergeleke met die meer gevestigde markte vir sulke eties vervaardigde produkte oorsee.
“Ek was self teleurgesteld oor die sluiting van die kantoor, want dit wys dat daar iets is wat nie werk nie. In ’n land soos Suid-Afrika met al die negatiewe aandag wat ons kry oor die behandeling van ons werkers en die lig waarin sommige sensasiesoekende joernaliste ons wil plaas, is dit ’n jammerte,” het Maryna Calow, kommunikasiebestuurder van Wines of South Africa (Wosa), gesê.
Leán Terblanche, hoof van FLSA, kon nie vir kommentaar opgespoor word nie. Netwerk24
Kommentaar
Republikein
Geen kommentaar is op hierdie artikel gelaat nie