Erasmus se Maties op koers in Varsity-reeks
Die gewese kaptein van die Namibiese junior span geniet die leiersrol vir sy universiteitspan.
Andrew Poolman
As kaptein van Maties se eerste krieketspan is die Namibiese kolwer Gerhard Erasmus oorgehaal om sy span na sukses in die Varsity-bekertoernooi op Potchefstroom te lei.
Moeder Natuur het die afgelope naweek die laaste sê in die openingsronde gehad toe reënweer verhinder het dat enige spel in drie van die wedstryde moontlik was.
Een daarvan was die Universiteit van Stellenbosch se ontmoeting teen die Universiteit van die Wes-Kaap. Drie ligapunte is gevolglik aan elke span toegeken, asook vir die uitgereënde Tuks versus Pukke en UJ teen Madibaz.
Maties het gistermiddag egter terug op koers gekom met ’n oorwinning van agt paaltjies teen die Universiteit van Kaapstad, wat 134 as teiken gestel het.
Kaptein Erasmus was op 23 nie uit nie en het met sy 13de bal die wenlopie geslaan. Sy laaste vier balle was ’n ses, ’n leë bal en twee viere.
“Die Varsity Cup is ’n baie lekker toernooi van T20-wedstryde waarvan sommiges op SuperSport vertoon word. Met nog twee jaar oor van my studies sal ek graag een so toernooi vir my universiteit wil wen,” het Erasmus voor die begin van die toernooi aan Republikein gesê.
Die 23-jarige Jason Davidson, naatbouler vir die Nelson Mandela Metropolitaanse Universiteit (algemeen bekend as die Madibaz) is die enigste ander Namibiër wat in die toernooi betrokke is.
Wedstryde in die Varsitybeker word nog elke dag vandeesweek gespeel, voordat die halfeindstryde Saterdagoggend en die eindstryd later daardie aand beslis word.
Tuks is op soek na sy derde triomf in die derde bestaansjaar van die toernooi – maar het gisteroggend ’n skoknederlaag met agt paaltjies teen die UWK gely.
• Tydens die Nuwejaarstoets op Nuweland het Erasmus die eer te beurt geval om genooi te word om as een van die gasheerspan se ekstra veldwerkers gereed te wees. Suid-Afrika het Sri Lanka met 282 lopies verinneweer, met die snelbouler Kagiso Rabada (4/56 en 6/77) die speler van die wedstryd.
Erasmus was regstreeks by al die opwarmsessies vir veldwerk betrokke en al is hy gereeld rondgestuur om koeldrankies, handskoene of tegniese boodskappe aan te dra nie, was dit vir hom ’n gedenkwaardige geleentheid.
“Ek was met vakansie by die Oranjerivier saam met Jean Bredenkamp wat vir Boland speel. Die Proteas se bestuurder het toe Boland se afrigter, Johan Louw, gekontak om twee veldwerkers vir hom aan te stuur. Ek was die gelukkige een wat toe saam met Jean kon gaan.
“Die stelsels waarmee die Proteas se span bedryf word, is baie professioneel. Dit was baie werd om op te let hoe hulle met hul verrigtinge te werk gaan en hoe kalm hulle is,” sê hy.
Die 21-jarige Erasmus is ’n voormalige kaptein van die Namibiese span wat by die o.19 Wêreldbekertoernooi in aksie was. Hy het sy eersterangse debuut reeds in September 2011 gemaak.
Onlangs het hy die hoogste kolftelling nóg deur ’n Namibiër in die Sunfoil provinsiale driedagreeks behaal toe hy 192 teen KwaZulu-Natal Binneland op Walvisbaai geslaan het.
As kaptein van Maties se eerste krieketspan is die Namibiese kolwer Gerhard Erasmus oorgehaal om sy span na sukses in die Varsity-bekertoernooi op Potchefstroom te lei.
Moeder Natuur het die afgelope naweek die laaste sê in die openingsronde gehad toe reënweer verhinder het dat enige spel in drie van die wedstryde moontlik was.
Een daarvan was die Universiteit van Stellenbosch se ontmoeting teen die Universiteit van die Wes-Kaap. Drie ligapunte is gevolglik aan elke span toegeken, asook vir die uitgereënde Tuks versus Pukke en UJ teen Madibaz.
Maties het gistermiddag egter terug op koers gekom met ’n oorwinning van agt paaltjies teen die Universiteit van Kaapstad, wat 134 as teiken gestel het.
Kaptein Erasmus was op 23 nie uit nie en het met sy 13de bal die wenlopie geslaan. Sy laaste vier balle was ’n ses, ’n leë bal en twee viere.
“Die Varsity Cup is ’n baie lekker toernooi van T20-wedstryde waarvan sommiges op SuperSport vertoon word. Met nog twee jaar oor van my studies sal ek graag een so toernooi vir my universiteit wil wen,” het Erasmus voor die begin van die toernooi aan Republikein gesê.
Die 23-jarige Jason Davidson, naatbouler vir die Nelson Mandela Metropolitaanse Universiteit (algemeen bekend as die Madibaz) is die enigste ander Namibiër wat in die toernooi betrokke is.
Wedstryde in die Varsitybeker word nog elke dag vandeesweek gespeel, voordat die halfeindstryde Saterdagoggend en die eindstryd later daardie aand beslis word.
Tuks is op soek na sy derde triomf in die derde bestaansjaar van die toernooi – maar het gisteroggend ’n skoknederlaag met agt paaltjies teen die UWK gely.
• Tydens die Nuwejaarstoets op Nuweland het Erasmus die eer te beurt geval om genooi te word om as een van die gasheerspan se ekstra veldwerkers gereed te wees. Suid-Afrika het Sri Lanka met 282 lopies verinneweer, met die snelbouler Kagiso Rabada (4/56 en 6/77) die speler van die wedstryd.
Erasmus was regstreeks by al die opwarmsessies vir veldwerk betrokke en al is hy gereeld rondgestuur om koeldrankies, handskoene of tegniese boodskappe aan te dra nie, was dit vir hom ’n gedenkwaardige geleentheid.
“Ek was met vakansie by die Oranjerivier saam met Jean Bredenkamp wat vir Boland speel. Die Proteas se bestuurder het toe Boland se afrigter, Johan Louw, gekontak om twee veldwerkers vir hom aan te stuur. Ek was die gelukkige een wat toe saam met Jean kon gaan.
“Die stelsels waarmee die Proteas se span bedryf word, is baie professioneel. Dit was baie werd om op te let hoe hulle met hul verrigtinge te werk gaan en hoe kalm hulle is,” sê hy.
Die 21-jarige Erasmus is ’n voormalige kaptein van die Namibiese span wat by die o.19 Wêreldbekertoernooi in aksie was. Hy het sy eersterangse debuut reeds in September 2011 gemaak.
Onlangs het hy die hoogste kolftelling nóg deur ’n Namibiër in die Sunfoil provinsiale driedagreeks behaal toe hy 192 teen KwaZulu-Natal Binneland op Walvisbaai geslaan het.
Kommentaar
Republikein
Geen kommentaar is op hierdie artikel gelaat nie