Entrepreneurs: Hier is die geleenthede vir 2017

Klein ondernemings het klippe gekou in 2016, maar in 2017 is daar sektore waar slim entrepreneurs 'n kans kan aangryp.

Tegnologie, kommunikasie en onderwys is groeisektore wat vanjaar dopgehou moet word, sê Christo Botes, woordvoerder van die 2017 Entrepreneur van die Jaar-kompetisie wat Business Partners en Sanlam aanbied.

“Dis nie net in sektore wat tradisioneel goed presteer in Suid-Afrika, soos toerisme, waar die geleenthede lê nie. Daar is besliste moontlikhede in ander minder tradisionele sektore met hope potensiaal vir entrepreneurs.”

Telekommunikasie is een van die sektore wat deesdae gedy, sê Botes.

“Daar gebeur op die oomblik baie in die telekommunikasiesektor met die nasionale uitbreiding van die veseloptiesenetwerk wat gedryf word deur die groeiende gebruik van toepassings wat bandwydte vereis.”

Dit het 'n magdom sakegeleenthede geskep – van die gebruik van kabels tot tegniese steundienste, sê Botes.

“Soos wat internetspoed toeneem, sien ons die integrasie van tegnologie, kommunikasie en vermaak om 'n hele nuwe bedryf te vorm wat die afgelope ruk werklik in Suid-Afrika veld gewen het en wat 'n groot groeipunt in die sektor verteenwoordig.”

Nog 'n bedryf wat groot potensiaal vir entrepreneurs bied, is die private onderwyssektor, volgens Botes.

“Internasionaal toon statistiek dat ongeveer 10% van alle skole privaat bedryf word. In Suid-Afrika is daar ongeveer 26 000 skole waarvan net sowat 1 600 privaat bedryf word.”

Daar is tans kapasiteit in die mark vir 'n verdere 1 000 private skole om binne die volgende paar jaar te open, meen Botes.

Hy voeg by dat die plaaslike vraag na private onderwys aan die groei is en daar is ook 'n toename in die getal entrepreneurs wat in hierdie veld inbeweeg.

“Benewens die feit dat dit 'n gebied is wat groot potensiaal vir winsgewendheid toon, is die onderwyssektor ook aantreklik wat maatskaplike en ekonomiese faktore betref. Ons land het 'n reusetekort aan mense met die regte vaardighede en dit kan net doeltreffend gepak word as gehalteonderwys meer geredelik beskikbaar is.”

Botes glo ook dat 2017 die jaar sal wees wanneer die sukkelende mynbou- en landbousektore 'n mate van herstel kan toon.

“Aan die einde van 2016 was daar 'n paar aanduidings dat die mynbousektor begin terugkom in die prentjie soos wat hulpbronpryse stabiliseer en, in sommige gevalle, selfs styg.”

Wat landbouvooruitsigte betref, word daar beter reënval voorspel vir die res van die somerseisoen en dit sal 'n welkome verandering wees vir 'n sektor wat in 2016 van sy droogste weerstoestande tot op hede beleef het, sê Botes.

Vir entrepreneurs wat in 2017 graag hul drome wil verwesenlik, het hy die volgende raad: “Eerstens, bly positief en moenie moed verloor nie. Moenie toelaat dat jou drome vertrap word omdat toestande uitdagend is nie.”

Dan raai hy nuwelinge ook aan om die leiding van gesoute entrepreneurs op te soek.

“Hulle kan jou help om nie dieselfde foute te begaan nie.”

Laastens moet enigeen wat 'n nuwe onderneming wil begin, sy huiswerk deeglik doen.

“Doen 'n noulettendheidsondersoek, maar moenie wag vir iemand anders om die ys te breek nie – dit raak al hoe moeiliker hoe meer mense 'n nuwe sektor betree.”

- Netwerk24