Elfjarige kry kans op ’n nuwe lewe

Tanja Bause – Die elfjarige Meunae Katjitundu wat 147 kilogram weeg, se lewe sal binnekort handomkeer verander.Sy woon saam met haar ouers in die Goreangab- informele nedersetting in Windhoek en het ’n aanbod gekry om na ‘n plaas buite Maltahöhe te trek waar sy hulp met die beheer van haar metaboliese sindroom en gewig sal ontvang.Volgens haar ma, Diethelma Kaveta, het Meunae met geboorte 3,5 kg geweeg wat ’n normale gewig vir ’n kind is.“Drie maande later was dit egter ’n ander storie en het sy 10,3 kg geweeg. Die dokters het gesê ons moet ophou om vetterige kos vir haar te gee. Op nege maande het sy 19 kg geweeg en kon ons haar nie meer optel en dra nie. Dis toe ons besef daar is iets fout.”Haar pa, Cecil Katjitundum, se werkgewer het vir hom en Meunae op ’n medies fonds geplaas en hulle het na ’n dieetkundige gegaan.“Die man het ’n kwotasie gegee van hoeveel dit per maand vir gesonde kos vir my dogter sou kos, maar dit was net té veel. Dit was buite ons bereik. Ons het ’n kookboek oor gesonde kos en gesonde leefstyl gekoop, maar weer eens kon ons dit glad nie bekostig nie. Die gesonde kos is ’n probleem. Ons is beide werkloos en kan pap bekostig en dis nie goed vir haar nie. “As ons gesonde kos vir haar koop dan eet ek en my vrou nie.”Volgens hom wil hulle eers probeer om haar gewig met gesonde kos onder beheer te bring voordat hulle aan bariatriese chirurgie dink.Dis hier waar Susanne Berchtold van die Childrens Camp Namibia haar opwagting maak.Sy het in die begin van die jaar met die “We do special” onder die Children’s Camp Namibia begin.“We do omdat ons doen en aktief is en special omdat ons vir kinders en jong mense met spesiale behoeftes opleiding wil gee. Ons is op die plaas Gamis sowat 80 km noord van Maltahöhe.”“Ek het die video gesien wat twee jaar gelede van Meunae geneem is en nie besef dis al so oud nie. Maar toe ek dit sien, het ek geweet ek wil ’n aanbod aan haar en haar ouers maak om plaas toe trek. Ons sal dan vir Meunae help om haar gewig met gesonde kos en die regte kos te beheer. Ek is doodseker ons sal in ’n jaar ’n groot verskil kan maak. “Beide haar ouers sal by ons in diens geneem word en verdien sodoende ‘n inkomste. Ek self het twee jaar terug ’n algehele leefstylverandering gemaak en 50 kg verloor. Ek weet ek kan vir haar help.” Meunae sal voorlopig tuisonderrig en beroepsopleiding ontvang.“Ons wil vir die mense wat nou min of geen hoop op werk het nie, vir twee of drie jaar beroepsopleiding in verskillende gebiede soos landbou, kleinvee, kombuis en huishouding, metaalwerk, skrynwerk en rekenaarkunde bied.”Ná Berchtold se aanbod, het die trane vrylik gevloei.“Vanaand sal ons nie kan slaap nie. Dié is soos ’n nuwe kans; veral na die laaste jaar waar ek my werk weens Covid-19 verloor het. Ek het dit nie sien kom toe ek vanoggend opgestaan het nie. Ons hoef nie hieroor te dink nie; ons sal teen die einde van die maand reg wees om te trek. Jy laat ons trane loop,” het Cecil gesê.Volgens hom het hulle nie ’n spoeltoilet of lopende water in hul sinkhuis nie, wat hulle lewe baie moeilik maak veral met Meunae wat sukkel om te loop en vinnig moeg raak.“Ons kan haar ook nooit alleen by die huis los nie, omdat die mans hier dink sy is 20 jaar oud. Sy is net 11 en ’n kind ongeag hoe sy lyk. Ek is so bang hulle sal iets aan haar doen en haar misbruik. Ek wil net ’n veilige en normale lewe vir my kind hê. Ek sal nou trek as dit is wat sy wil hê,” het hy gesê.Meunae kon haar opgewondenheid nie wegsteek nie.“My drome is om eendag iemand te wees en ek wil graag ’n prokureur word. Ek wil ook hê dat beide my ouers ’n goeie werk kry en nou het hulle werk gekry. Ek sal hulp en gesonde kos kry. Ek kan nie tot die einde van die maand wag nie; ek wil môre trek.” - tanja@republikein.com.naFOTO’s Tanja BauseDie elfjarige Meunae Katjitundu saam met haar pa Cecil en haar ma Diethelma.

Elfjarige kry kans op ’n nuwe lewe

Kommentaar

Republikein 2022-05-17

Meld asseblief aan om kommentaar te lewer

Elfjarige kry kans op ’n nuwe lewe

Kommentaar

Republikein 2022-05-17

Meld asseblief aan om kommentaar te lewer

MELD AAN