Ek dans die winter deur

Ek is versot op dans.

Maak nie saak wat die situasie is nie, sing en dans moet ek. Vir wat het ek die lippe en die lyf gekry? Om my lewe vol vreugde te maak, natuurlik.

As dit 'n droewige wysie het, moet dit gesing word en moet daar daarvolgens beweeg word, maar gee my 'n opgewonde ritme, dan roer ek van hierdie kant af daai kant toe.

Ek kan myself net indink hoe onsmaaklik die lewe kan raak vir party mense, maar ek dans by enige geleentheid wat ek kry en dit maak van my 'n lekker mens.

As jy die ritme het, het jy alles, en as jy die note óók het, is jy uitgesort!

Man, jy kan van enigiets 'n liedjie maak en dit singend of dansend aanpak.

Ek dink dis 'n lekker manier van leef.

Dis vreugde, en as dit gemeng word met die regte inhoud is dit 'n bonus!

Jy moet die regte veer vir elke geleentheid hê - dan maak die vere die voël, of miskien maak die voël die vere.

Moet jy getooi wees om erken te word of kan jy maar ook in jou verslete baadjie 'n bietjie vreugde in mense se lewens bring met 'n gesing en 'n gedans?

Miskien moet jy aanvaarbaar lyk as jy 'n impak wil maak, anders is jy nie op dieselfde vlak as die elites nie.

As ek voel dit raak herfs, kom 'n ritme in my los en ek weet daar is niks wat my kan keer nie - ek moet dans!

Soms is dit erg winter, dan voel

ek bietjie snaaks en ek wil dans

en van al die wêreld se sorge

en pyn ontsnap.

Dans is my passie en sing is my hartstog!

Ek hou daarvan om ander se gemoedere te lig as ek sien hulle's nie lekker nie.

Ek maak net 'n ritme los, dan kom hulle reg. Hoekom moet jy belas deur die lewe gaan?

As plan A nie werk nie, gaan vir plan B.

Daar's tog 'n oplossing vir alles.

Moenie onder die lewe gebuk gaan nie, dit is van korte duur en die mense wat weet, sê die lewe is 'n stage.

Wat ookal sy deuntjie is, hang van jou af. Maar op watter een jy ookal saamsing of dans, gaan net met die flow.

As hy stadig is, wals hom, 'n bietjie vinnig, jazz hom, en as hy 'n house beat gooi, dan moet jy hom vat met 'n house beat!

Moenie toelaat dat jou dag koud en grys verbygaan nie, maak hom mooi, man!

Kleur hom mooi in - niemand gaan hom vir jou mooimaak nie. Mense het almal hul eie goed om uit te sort.

Deur al die jare het ek myself mooi afgerig in verskeie deuntjies en danspassies, gooi gou een, dan wys ek jou!

As my oor iets vang, dan moet my lyf sê: “Nee, ek het gehoor.”

En dan moet dit in ritme omskep word. Stilstaan ken ek nie.

Ek het musiek in my lyf en dit moet 'n werkwoord word.

Ek dans en sing, ek worry nie, dís hoe lief ek vir die winter is!