Egpaar se stryd om in Namibië te bly

Saak in hooggeregshof se hande

09 June 2021 | Howe
Jana-Mari Smith – Die Delgado-Lühl-gesin veg verbete om nié in ballingskap gedwing te word nie en het die hooggeregshof om hulp genader om 'n appèlverhoor te bespoedig wat andersins jare kan voortsleep.

Verlede week het mnr. Phillip Lühl, 'n Namibiër, se man, mnr. Guillermo Delgado, 'n aansoek by die hooggeregshof ingedien waarin hy gevra het dat die appèlverhoor teen die immigrasie-owerhede se afkeuring van sy verblyfstatus, bespoedig sal word.

Die plaaslike owerhede se weiering om domisilie aan Delgado te verleen en die egpaar se regstryd om Namibiese burger­skap vir hul drie kinders te verkry, het aanleiding gegee tot vyf afsonderlike regsgedinge wat die afgelope 18 maande aanhangig gemaak is.

Hul stryd om as gesin in Namibië te bly, het al in die land se hoogste howe gedraai en lig gewerp op die unieke hindernisse wat LGBTQ-mense en -gesinne in Namibië in die gesig staar, wat weer wêreldwyd kritiek uitgelok het.

Met Delgado se huidige werkspermit wat einde vandeesmaand verval, en sonder 'n waarborg vir 'n hernuwing, benadruk hulle dat sy vermoë om in Namibië te bly en voortaan sy gesin te onderhou, afhang van 'n finale besluit oor sy verblyfstatus. Dié beslissing is nou in die hooggeregs­hof se hande.



MOEILIKE BESLUIT

“Ons het 'n besluit wat ons as gesin moet maak. Bly ons in Namibië, wat sedert 2011 ons tuiste is, maar waar ons nie welkom is nie en waar ons waarskynlik voortgesette teistering en diskriminasie op grond van ons seksuele oriëntasie sal moet verdra?” lui Delgado se beëdigde verklaring.

Die tweede opsie is om “oor te gee en die verweerders (ministerie van binnelandse sake, immigrasie, veiligheid en sekuriteit) toe te laat om ons as gesin, waar onder Phillip, 'n Namibiër, en ons kinders, Namibiese burgers op grond van herkoms, uit die land en effektief in ballingskap te dwing.”

Sonder 'n geldige werks­permit of wettige verblyfstatus, sal die gesin noodgedwonge Namibië moet verlaat om bymekaar te bly, sê Delgado.

“Sonder die bevestiging dat ek domisilie in hierdie land het, is ek oorgelaat aan die genade van die ministerie van binnelandse sake – wat reeds vyandigheid teenoor my en my gesin getoon het,” sê hy verder.

Om die land te verlaat, sal in wese beteken “dat 'n Namibiese burger uit sy eie land gedwing word oor sy seksuele oriëntasie, wat strydig met die Namibiese Grondwet is,” benadruk hy.

Hy waarsku om die land te verlaat, sal in die hande van immigrasie-owerhede speel en 'n nadelige uitwerking op sy en sy kinders se regsake hê.

“Ek erken dat die vermoë om die land te verlaat ons in 'n bevoorregte posisie plaas, as mens in ag neem hoeveel mense nie kan weggaan om diskriminasie op grond van hul seksuele oriëntasie te ontsnap nie,” voeg Delgado by.



DUIDELIKHEID

Die appèlaansoek is in Maart by die hooggeregs­hof ingedien.

Dít volg nadat Delgado se aansoek om die regering se weiering van sy aansoek om domisilie of permanente verblyf in Namibië tersyde te stel, deur hoërhofregter Thomas Masuku van die hand gewys is.

“Die enigste manier om ons konfliksituasie op te los, sover ek kan sien, is om die appèl vinnig te laat verhoor en uitspraak te kry oor die kwessie van domisiliestatus,” skryf Delgado.

Die twee is sedert 2008 'n paartjie en het in 2011 na Namibië verhuis.

Hulle is in Desember 2014 in Suid-Afrika getroud en hul seun, Yona, is in Maart 2019 gebore.

Die regering se ontkenning van hul huwelikstatus en weiering van hul aansoeke om burgerskap vir hul drie kinders, het die afgelope paar maande internasionaal onder skoot gekom.

Namibiese regskenners het daarop gewys dat buitelanders wat buite die land met Namibiërs getroud is, outomaties verblyfreg kry.

Daarbenewens sou die kwessie van burgerskap (op grond van herkoms) vir die drie kinders – almal deur surrogaat­skap gebore en in besit van Suid-Afrikaanse ­geboortesertifikate waarin hul ouers as Lühl en Delgado geïdentifiseer word – waarskynlik nie 'n soortgelyke uitdaging

vir heteroseksuele paartjies in Namibië gestel het nie.

- [email protected]

Soortgelyk

 

27 sterftes, 1 649 nuwe gevalle

22 ure gelede | Gesondheid

Die sterftesyfer skiet met nog 27 - nege in Rehoboth, agt in Windhoek, drie in Keetmanshoop, twee in Walvisbaai en een elk in onderskeidelik Karasburg,...

Mental well-being suits us all

2 dae gelede | Mense

DR JOHN STEYTLERMental health is a subject which we are only starting to scratch the surface of in Namibia and it is not talked about...

Diva of finesse and fitness

2 dae gelede | Mense

Jeanette DiergaardtLiezel Ndjaronguru, a 32-year-old businesswoman, allows fitness enthusiasts to bring their best attitude to the table when working out. In 2013 the owner of...

Bonifatius Kantori Paulino is the Managing Director at Alexander...

2 dae gelede | Mense

Wetumwene Shikage Since Paulino joined Alexander Forbes, he spent some time to familiarise himself with the areas of responsibility of the position of...

Streng vereistes vir gebruik van blitstoetse

2 dae gelede | Gesondheid

Henriette Lamprecht – Die Namibiese Medisynebeheerraad (NMRC) het opgedateerde regulasievereistes vir die verkoop, verspreiding en gebruik van antigen-blitstoetse vrygestel.Die NMRC sê antigeen diagnostiese blitstoetse (Ag-RDT’s)...

Sterftes neem sesvoudig toe

2 dae gelede | Gesondheid

Henriette Lamprecht – Die Covid-sterftes vir Namibië het bykans sesvoudig die afgelope ses maande toegeneem – vanaf 16 sterftes per week in Desember verlede jaar...

'Woestynpsalm' nou in pylvak

2 dae gelede | Byvoegsels

Bosman Films, 'n jong produksiemaatskappy in die Namibiese filmbedryf, het opgewonde aangekondig dat produksie vir hulle eerste film, Woestynpsalm, onlangs afgehandel is. Woestynpsalm is 'n...

High-flyer Samantha Geyser soared to customer service executive at...

2 dae gelede | Mense

Staff reporterSamantha Geyser dreamed of becoming a pilot when she was a young girl. She admired Amelia Earhart for her achievement of being the first...

Gweri Vintage Collection – the brand that keeps on...

2 dae gelede | Mense

Zulu Boy sets the trend for creativity Created by Namibians for international consumption The Gweri Vintage Collection is a brand focused on providing exclusive and...