Republikein Newspaper

Die eerste Covid-19-verwante sterfte is volgens die minister van gesondheid en maatskaplike dienste, dr. Kalumbi Shangula in Windhoek aangemeld. Volgens Shangula is die 41-jarige man Maandag met Covid-19-verwante simptome in die Katutura-hospitaal in die hoofstad opgeneem. Hy het ook ander chroniese mediese toestande gehad en is met sy opname getoets. Volgens Shangula is hy Dinsdag in die hospitaal oorlede en het sy toetsuitslae gewys het hy positief vir die siekte getoets. Dit bring die aantal sterftes op 10 te staan.

Volgens die minister is 66 nuwe gevalle van Covid-19 aangemeld waarvan 47 gevalle in Walvisbaai, vyf in Swakopmund en 14 in Windhoek is. Uit die 66 gevalle is 45 mans en 21 vroue. Die ouderdomme wissel van ses tot 88-jaar. Dit bring die totaal vir die land op 2 052 gevalle.

Die gevalle in Windhoek is soos volg:
- 'n 29-jarige man met geen kontak met 'n bevestigde geval of reisgeskiedenis nie. Hy is in plaaslike hospitaal opgeneem.
- 'n 36-jarige vrou en 'n kontak van 'n bevestigde geval.
- 'n 49-jarige man met geen kontak of reisgeskiedenis wat getoets is voordat hy 'n chirurgiese prosedure in 'n plaaslike hospitaal moes ondergaan.
-'n 12-jarige meisie en kontak van 'n bevestigde geval.
- 'n 42-jarige vrou wat van Windhoek na Gibeon en terug gereis het en 'n begrafnis op Gobabis bygewoon het.
-'n 38-jarige man wat van Windhoek na Otapi en terug gereis het.
- 'n 31-jarige man van die militêre basis in Suiderhof.
- 'n 35-jarige manlike taxibestuurder.
-'n 38-jarige vrou wat na Etosha en terug gereis het.
- 'n 34-jarige man met geen kontak met 'n bevestigde geval wat tussen Angola en Namibië gereis het en tans in Oshikango in isolasie is. Volgens Shangula word die besonderhede van die res van die gevalle nog versamel.

Intussen het 60 mense ten volle herstel en wel 58 in Walvisbaai en twee op Oshakati. Dit bring die totaal op 164 te staan. Tot op hede is 25 625 weefselmonsters getoets en is 1 587 mense tans in kwarantyngeriewe in die land.