Debat oor aanstellings uitgestel

Brigitte Weidlich – Die Nasionale Vergadering kom vandag opnuut byeen om oor die heraanstelling van die hoofde van die Teenkorrupsiekommissie (ACC) en die aanstelling van nuwe verkiesingskommissarisse te besin.

Die president het 'n spesiale sitting vir die doel byeengeroep. Gister se vergadering het egter net 25 minute geduur.

Die opposisie het beswaar gemaak dat hulle nie genoegsame kennis ontvang het nie en nie oor alle dokumentasie beskik om die belangrike besluite te neem nie.

Eerste minister Saara Kuugongelwa-Amadhila het die huis versoek om mnr. Paulus Noa, direkteur van die ACC, en me. Erna van der Merwa, adjunkdirekteur, se termyne met vyf jaar te verleng. Stemme van teenstand het dadelik uit die opposisiebanke opgeklink.

Mnr. Ignatius Shixwameni van die All People's Party (APP) het gesê lede het nie die proklomasie of ondersteunende dokumentasie ontvang nie. Die Popular Democratic Movement (PDM) se me. Elma Dienda het bygevoeg dat lede nie al die kandidate se getuigskrifte kon lees nie, hoewel per Whats­App belowe is die dokumentasie sou beskikbaar wees.

Volgens mnr. Mike Kavekotora is dit nie die eerste keer dat dit gebeur nie.

Me. Elsie Nghikembua, mnr. Joram Rukambe and dr. Emmarentia Leonard word as nuwe verkiesingskommissarisse aanbeveel.