CoW baklei teen beslaglegging

Voertuie gekonfiskeer

13 December 2019 | Regering
Denver Kisting – Die Windhoekse munisipaliteit (CoW) baklei tans verbete teen ’n beweerde beslagleggingsbevel wat poog om van hul vaste bates te konfiskeer.

Veertien superintendente verbonde aan die stadspolisie het onlangs glo dié bevel bekom om meer as N$6 miljoen se beweerde agterstallige betalings van CoW te verhaal.

Hulle beweer in dokumente dié geld kom hulle toe omdat die munisipaliteit glo vir lank versuim het om hulle ingevolge hul bygewerkte posgraderings te vergoed.

Die plaaslike owerheid het by monde van sy woordvoerder, mnr. Harold Akwenye, gesê die aantygings oor uitstaande betalings is bog.

Hy sê hulle wag tans op ’n antwoord oor die weg vorentoe nadat hulle die beweerde bevel teengestaan het.

In ’n beëdigde verklaring sê senior superintendent Gerry Shikesho egter die 14 se eis van N$6 391 604 is reg bereken.

Hy wat Shikesho is, het dit glo op hulle versoek nagegaan en bevestig.

Republikein het verneem die stadspolisieamptenare reken dié geld kom hulle terugwerkend toe gebaseer op bygewerkte posskale – glo deur hul hoof, mnr. Abraham Kanime, beding.

Maar, sê Akwenye, CoW skuld die mense geen sent nie.

Sou die beslagleggingslasbrief wederregtelik bekom gewees het, sal hulle alle nodige stappe doen om dit te beveg, sê Akwenye.

Hulle betwis die geldigheid van die bevel, sê hy. “Ons probleem is die bevel is nie reg uitgereik nie.”

’n Aanvanklike dokument het glo geen eisbedrag bevat nie. Dié dokument is glo na bewering in ’n latere stadium “verkeerdelik gewysig” waarna die N$6 miljoen aangebring is. “Daar is baie wat agter geslote deure gebeur wat jy nie nou sal verstaan nie,” sê ’n onberispelike bron.

Die bron sê voorts: “Goed is nie reg gedoen nie. Hoekom is die voertuie waarop beslag gelê is, nog nie verkoop nie? Want daar is tegniese punte.”

In dié stadium is daar glo nog net op twee voertuie beslag gelê – een GTI en een van Kanime se spogmotors.

’n Fortuner en ’n Mercedes-Benz is na wat verneem word aan hom toegeken. Dit is onduidelik op watter van dié twee voertuie beslag gelê is.

Volgens Akwenye het die balju glo nog ander voertuie in hul visier.

In ’n brief wat vroeër vandeesmaand uitgereik is, gee mnr. Penda ya Otto, ’n senior arbeidsinspekteur, die balju opdrag om op CoW-bates beslag te lê om die beweerde skuld te verhaal.

Kanime, wat glo agter die posgraderings is, het gister gesê hy is nie by magte om kommentaar te lewer nie. “Jy sien, daardie is salariskwessies en dit is die kwessies waarop ek nie kommentaaar mag lewer nie.”

Hy het gesê hy is bewus van die beslagleggings, wat een van sy ampsvoertuie insluit. “Dis nie regtig myne nie. Dit behoort alles aan die stad.”

Volgens die stadspolisiehoof maak hy tans van sy eie private vervoer gebruik.

Kanime het alle navrae na die kantoor van die uitvoerende hoof, mnr. Robert Kahimise, verwys.

Dit is nie die eerste keer dat dié twee mans koppe stamp nie.

’n Vorige rusie het na bewering daartoe gelei dat Kanime vir meer as ’n jaar geskors is.

Sy skorsing is vroeër vanjaar ná 14 maande, waartydens hy sy salaris ontvang het, opgehef.

Die jongste eise kom te midde van reuseverlies wat CoW ly.

Republikein het vroeër berig vir die boekjaar geëindig Junie 2018 het CoW ’n verlies van ’n kortkop duskant ’n miljard gely – meer as N$814,4 miljoen.

Dié bedrag is bykans N$300 000 meer as die vorige tydperk se verlies van N$565,6 miljoen.

Dít kom nadat Windhoek se uitgawes vir daardie finansiële jaar N$4 711 070 was teenoor sy inkomste van N$3 896,6 miljoen.

- [email protected]

Soortgelyk

 

Bank en depot sal nie sluit nie, sê Peya

27th of May 10:43 | Regering

Denver Kisting – Die minister van inligting en kommunikasietegnologie, dr. Peya Mushelenga (foto, Nampa), sê mnr. Knowledge Ipinge, raadslid van die Walvisbaai- stedelike kiesafdeling, het...

Namibië het nou 22 bevestigde Covid-19-gevalle

27th of May 10:35 | Gesondheid

Namibië se jongste bevestigde geval van Covid-19, geval nr. 22, is in 'n kritieke toestand en gekoppel aan 'n ventilator in 'n intensiewesorgeenheid aan die...

B-dag: Maak of breek

10 ure gelede | Regering

Jo-Maré Duddy – Dolleë staatskoffers eerder as hemelhoë besteding is waarskynlik finansminister Iipumbu Shiimi se grootste uitdaging wanneer hy vanmiddag Namibië se moeilikste begroting sedert...

Stigma jeens lorriedrywers kwel

10 ure gelede | Vervoer

Ronelle Rademeyer en Francoise Steynberg – Lorriedrywers wat Namibië van noodsaaklike lewensmiddele voorsien en seker maak produkte bly op winkelrakke, bevind hulle terselfdertyd aan die...

‘Hongerpandemie’ lê vir wêreld op loer

10 ure gelede | Byvoegsels

Ronelle RademeyerDie wêreld se ekonome en beleidmakers twyfel nie meer daaraan dat die wêreldekonomie weens die Covid-19-krisis in ’n resessie gedompel gaan word nie. Trouens,...

Weer vir 27 Mei 2020

10 ure gelede | Weer

BINNELAND: Koud aanvanklik, maar andersins gedeeltelik bewolk en matig in die Suide. Elders sal dit gedeeltelik bewolk en matig tot warm wees.KUS: Gedeeltelik bewolk en...

Polisie lê beslag op sestig bokse vol drank

10 ure gelede | Misdaad

Francoise Steynberg – Die Namibiese polisie het Maandag knap ná middernag in Pionierspark op 60 bokse drank beslag gelê.Drie verdagtes is in hegtenis geneem, het...

Chaos toe jonges op vulstasie afpyl

10 ure gelede | Ongelukke

Drie jong mans wie se name in dié stadium onbekend is, het op 23 Mei om 01:00 'n ongeluk by die Total-vulstasie in Outjo veroorsaak...

Stappe by Covid-drywer se stoppe

10 ure gelede | Gesondheid

Leandrea Louw en Denver Kisting – 'n Handelsbank op Walvisbaai wat 'n Covid-19-geval onlangs besoek het, sê hulle het die personeel van daardie dag vervang...