Covid-19: Wat is die regte syfers?

As Namibiërs is ons dankbaar vir alle maatreëls wat ons regering dusver getref het om die verspreiding van die coronavirus in ons land hok te slaan.
Ons grootste dank gaan ook aan alle beamptes en individue wat in die voorste loopgrawe teen die pandemie veg.
Vandag, 9 April 2020, het Republikein egter ook verskeie vrae aan ons owerhede, spesifiek die ministerie van gesondheid en maatskaplike dienste (MoHSS).
Die vrae broei reeds sedert Maandag en bly grootliks onbeantwoord ondanks etlike daaglikse nuuskonferensies.
In sy hoofartikel van vandag voer The Namibian ook aan vertragings in die deel van statistiek met die publiek kweek ‘n “duisternis” waarin Covid-19 self en gepaardgaande vrese en mites net kan gedy. Ons deel die mening.
Gistermiddag toe die vraag gestel is presies hoeveel gesondheidswerkers is onder selfkwarantyn geplaas, was die amptelike antwoord “a few”. “Enkele” of ‘n paar? Volgens Republikein se inligting staan die syfer op meer as 20.
Ons plaas ook die volgende op rekord:
• Die meeste data wat dusver hierdie week herhalend aan Jan en San Alleman gekommunikeer is, is vervat in ‘n verslag wat reeds om 23:00 op Saterdag 4 April 2020 deur die MOHSS en WHO saamgestel is.
• Indien geen nuwe gevalle die afgelope vier dae bevestig nie, is dit inderdaad verblydende nuus. Volgens ‘n nuwe verslag, vir Maandag 6 April, wat enkele minute gelede ontvang is, is dit steeds die geval.
• Ongelukkig is inligting oor toetse in die land skraps en selfs weersprekend. Volgens die verslag hierbo was 362 monsters reeds Saterdag na laboratoriums gestuur. Die verslag vir 6 April meld ‘n syfer van 385.
Vroeër die week is vermeld alleen NIP het al meer as 380 toetse uitgevoer.
Vandag het die agbare minister, dr. Kalumbi Shangula, op skrif gesê 333 monsters is getoets.
• Volgens dr. Shangula kan meer as 90 monsters elke dag plaaslik getoets word. Hy sê sowat 30 monsters word tans daagliks getoets. Dit beteken sowat 120 nuwe toetse is sedert Sondag gedoen? Of 90, indien ‘n mens vanaf Maandag tel. Die toetssom moet dus op meer as 400 staan?
Republikein beskou almal se samewerking en positiewe insette as noodsaaklik, maar as deel van die media is dit ook ons plig om verwarrende teenstrydighede uit te wys.
Data moet daagliks op ‘n standaardwyse aangekondig word. Dit sluit in:
Toetsdata
Syfers oor persone onder kwarantyn (selfkwarantyn en opgelegte kwarantyn) en in isolasie
Geriewe vir Covid-19
Stand van toerusting
. . . en meer.
Inligting is een van die belangrikste wapens teen Covid-19. Akkurate, tydige statistiek is ‘n integrale deel hiervan.
Ons sal ons owerhede se onverwylde aandag en reaksie waardeer.