Republikein Newspaper

Henriette Lamprecht - ’n Chinese maatskappy het die Teenkorrupsiekommissie (ACC) hof toe gesleep oor ’n vraghouer met meer as N$8 miljoen se medisyne waarop beslag gelê is.

Volgens Lick Hang Engineering is hy die wettige eienaar van die medisyne en is hy nie betrokke by ’n dispuut wat die aanvanklike koper van die medisyne, NM Medical, met plaaslike owerhede het nie.

Ook het NM Medical glo nooit vir die medisyne betaal wat volgens die maatskappy ’n kort rakleeftyd het en in sekere omstandighede gestoor moet word nie. Lick Hang Engineering het intussen ’n nuwe koper buite Namibiese grense gekry wat volgens die maatskappy ook nie onverwyld kan wag om dit in ontvangs te neem nie.

Die maatskappy dagvaar buiten die ACC ook NM Medical, die aanklaer-generaal, die kommissaris van doeane en aksyns, sowel as die Namibiese Medisynebeheerraad.

Lick Hang Engineering het op 25 Mei verlede jaar ’n kooptransaksie met NM Medical aangegaan vir die aankoop van medisyne wat die maatskappy se eiendom sou bly totdat die uitstaande N$8,2 miljoen (US$539,760) betaal is.

Op 30 September verlede jaar het NM Medical egter laat weet hy het om menslikheidsredes aansoek om ’n klaringsertifikaat gedoen om die betrokke medisyne in te voer, maar die sertifikaat is nie uitgereik nie.

NM Medical het Lick Hang Engineering vervolgens ingelig om die medisyne eerder elders buite Namibië of aan ander kliënte in die land af te lewer. In reaksie hierop het Lick Hang Engineering op 3 Oktober 2018 NM Medical skriftelik laat weet die medisyne is steeds sy eiendom en die maatskappy is nie vir verdere verskeping verantwoordelik weens die probleme wat NM Medical ervaar nie.

Die feit dat die medisyne wat vir NM Medical geoormerk was steeds die eiendom van Lick Hang Engineering bly, is ook in Desember verlede jaar deur die maatskappy se prokureur aan die kommissaris van doeane en aksyns bevestig.

Volgens hofstukke het NM Medical met die kommissaris van doeane en aksyns (die vyfde respondent) en die Namibiese Medisynebeheerraad (die sesde respondent) beraadslaag en is dit aan “alles en almal” duidelik gemaak die medisyne behoort steeds aan Lick Hang Engineering omdat NM Medical nie voldoende gelisensieer was nie.

NM Medical sou ook nie probeer om die voorraad in Namibië in te bring tot voldoende goedkeuring van die toepaslike owerhede in Namibië daarvoor gegee is nie. Lick Hang Engineering het gevolglik stappe gedoen om die voorraad na ’n aankoper in Kenia te vervoer.

Lick Hang Engineering het volgens die hofstukke reëlings begin tref om die medisyne van Namibië af na die koper uit te voer ná hy ’n koper vir die hele besending in die eerste week van Augustus gekry het.

’n Stokkie is hiervoor gesteek toe die Teenkorrupsiekommissie (ACC) op 13 Augustus op die houer met medisyne beslag gelê het ná ’n lasbrief om dit te deursoek deur die landdros op Walvisbaai uitgereik is.

Lick Hang Engineering se verweer is dat die lasbrief “wesenlik gebrekkig” is en onder meer nie sê wat die aard van die ACC se ondersoek is nie.

Ook word daar nie gesê wat die “redelike vermoede” was wat tot die lasbrief en die behoefte aan die “deursoek van en beslaglegging op” die vraghouer gelei het nie.

Volgens die hofstukke beweer die verklaring deur die ACC bloot daar is nie aan die openbare verkrygingswet en beleidsrigtings en prosedures voldoen nie.

Bewerings word ook nie gestaaf dat korrupsie plaasgevind het of gaan plaasvind nie.

[email protected]