Chinese bouverslag in die spervuur

Beduidende data- en inligtinggapings

23 June 2020 | Infrastruktuur
Jana-Mari Smith



'n Konserwatiewe Amerikaanse verslag wat Na­mi­bië as die land met die meeste Chinese re­geringsgeboue in Afrika aangewys het, is deur 'n Namibiese feitekontroleprojek as misleidend en gebrekkig beskryf.

Die verslag getiteld ­“Government buildings in Africa are a likely vector for Chinese spying” is op 20 Mei deur die Amerikaanse Erfenisstigting uitgereik. Hiervolgens is 25 van Namibië se regeringsgeboue deur Chinese konstruksiemaatskappye opgerig, die hoogste getal in Afrika.

Die verslag waarsku Chinese maatskappye kan hierdie geboue vir spioe­nasie in Afrika gebruik.

Volgens die verslag is Angola tweede op die lys met 15 regeringsgeboue wat deur Chinese firmas opgerig is, terwyl 11 sulke geboue elk in Ekwato­riaal-Guinee, Ghana en Uganda opgerig is.

Die Namibia Fact Check (NFC)-projek wys daarop dat hoewel die Erfenisstigting se verslag sorg vir “boeiende leesstof met oortuigende argumente, is daar beduidende data- en inligtinggapings en gehalteprobleme wat die boodskap ondermyn”.

Hoewel die NFC nie direk die spioenasiewaarskuwings in die verslag aanspreek nie, waarsku hulle die foute daarin werp 'n skadu van twyfel oor die akkuraatheid van die verslag.

Hulle beskryf dit as 'n “hoogs ­bespiegelende verslag wat versigtig benader en aangehaal moet word”.

Die NFC kom tot die gevolgtrekking dat die verslag op plekke “kortsigtig en vol foute” is.

Verder blyk daar 'n beduidende ondertelling in die aantal Chinees-­geboude regeringsgeboue in Afrika en Namibië te wees, en van die inligting is “bloot onakkuraat”.

Die feitekontrolebeamp­tes het “ernstige gapings in die data en inligting” ontdek deur bloot die ­Namibiese data in die verslag na te gaan.

Die NFC beskryf dié ­stigting as 'n “deel van die Amerikaanse ­Republikeinse politiek wat die ideale van die Amerikaanse Trump-­administrasie sterk ondersteun en beïnvloed.”

Die stigting het boonop 'n kardinale rol in die ­oprigting van binne­landse en buitelandse beleide onder president Donald Trump gespeel.

“Hierdie verslag blyk ter ondersteuning te wees van die ­Trump-administrasie se pogings om China op die wêreldtoneel in toom te hou namate die verhouding tussen die twee lande agteruitgaan te midde van ineenstortende bilaterale handels­bande en 'n blaamspel oor die Covid-19-pandemie.”



MAKLIKE TOEGANG

Die verslag is geskoei op die waarskuwing dat Chinese ondernemings wettiglik verplig is om die Chinese Kommunistiese Party (CCP) te help om intelligensie oraloor die wêreld in te samel, en die CCP se “twee dekade lange betrokkenheid in Afrika het dit ­waar­skynlik toegelaat en uitgebrei”.

Deur uitgebreide bouprojekte en opknappings­projekte in Afrika is toegang tot inligting in minstens 186 regeringsgeboue vergemaklik, lui een van die sleutelgevolgtrekkings in die verslag.

Behalwe vir die geboue, waarsku die verslag ook teen die probleem wat Amerikaanse intelligensie tans in die gesig staar – dat meer as 70% van die 4G-telekommuni­kasienetwerke in Afrika deur Huawei gebou is, en dat Huawei nou voortgaan met uitgebreide planne om 5G-netwerke in Afrika, ook in Namibië, op te rig.

Een van die onakkuraat­hede in die verslag is die waarskynlike ondertelling van Chinese geboue, nie net in Namibië nie, maar oor die hele vasteland.

“Aansienlik meer Namibiese regeringsgeboue as die 25 wat in die verslag gelys is, is deur Chinese maatskappye opgerig,” het die beamptes bevind.

Namibiërs het ook op aanlyn platforms daarop gewys, wat tot vrae oor die aantal Chinese regeringsgeboue in Afrika gelei het.

Die data in die verslag is in sekere gevalle ongetwyfeld onwaar, byvoorbeeld die insluiting van die ­Swapo-party se hoofkwartier as 'n regeringsgebou.

Die verslag reken Nami­bië is waarskynlik gelys as die land met die meeste ­Chinees-geboude regeringsgeboue as gevolg van aanlyn data, in ver­gelyking met ander lande waar data minder ­toeganklik is.

Volgens die data wat deur die ­China-Africa ­Research Initiative (Cari) gepubliseer is by die Johns Hopkins School of Advanced International Studies, is Namibië ver onder ander Afrikalande in terme van konstruksieverwante inkomste van Chinese maatskappye.

Die Cari-verslag het bevind in 2018 het die bruto jaarlikse ­inkomste van Chinese onder­nemings se ingenieurs- en konstruksieprojekte in Afrika US$48,84 miljard beloop.

Hiervolgens is die top­vyflande in Afrika, in terme van Chinese ingenieurs- en bouprojekte, Algerië, Angola, Kenia, Nigerië en Ethiopië.

Sedert die bekendstelling van die verslag het Namibiërs hul menings op sosiale media gelug.

Die skynbare vooroordeel van die ­Namibiese regering in terme van die ­indiensneming van Chinese ondernemings of gesamentlike ­projekte met dié ondernemings vir konstruksiewerk, tot nadeel van plaaslike maatskappye, het onder kritiek deurgeloop.

Onder die 25 geboue wat in die Erfenisstigting se verslag gelys word, tel die hoofkantoor van die ­­ouditeur-generaal, die ­direktoraat vir burgerlugvaart se gebou, verskeie stads- en streekraadsgeboue, ondernemingsgeboue in staatsbesit en landdrosgeboue.

[email protected]

Soortgelyk

 

Geingob onder skoot oor ‘wit’ opmerkings

11 ure gelede | Politiek

Denver Kisting – Die leier van die amptelike opposisie, mnr. McHenry Venaani, sê wat pres. Hage Geingob die afgelope naweek oor wit mense kwytgeraak het,...

Verskeie daaglikse vlugte binnekort na SA

11 ure gelede | Vervoer

Ronelle Rademeyer – FlyWestair en Airlink, die private Namibiese en Suid-Afrikaanse rederye, het tot reisigers se redding gekom en gaan die leemte aan direkte, geskeduleerde...

Skone Lira bemark Namibië

11 ure gelede | Toerisme

Die Suid-Afrikaanse sangeres Lira, wat die inperking in Namibië deurgebring en uitgebreide verkenningsreise in die land onderneem het, is deur die Federasie van Namibiese Toerismeverenigings...

Weer vir 19 Oktober

11 ure gelede | Weer

BINNELAND: Gedeeltelik bewolk en bloedig warm in die Ooste. Elders sal die sonnig wees en baie warm tot bloedig wees. KUS: Gedeeltelik bewolk en koel...

Verdagte panga-rowers in hegtenis

11 ure gelede | Misdaad

Kristien KrugerVolgens ’n Namibiese polisieverslag is sewe mans in hegtenis geneem in verband met ’n aantal gewapende rooftogte in Windhoek.Die mans het hulself glo die...

Massavrekte van robwelpies ondersoek

11 ure gelede | Omgewing

Elvira Hattingh – ’n Ondersoekspan het begin om ongewone vrektes onder Kaapse pelsrobbe te ondersoek nadat klaarblyklik duisende wyfies vanjaar hul welpies teen die Namibiese...

Vier ton vis by Swakoppoort gekonfiskeer

11 ure gelede | Misdaad

Ronelle Rademeyer en Kristien Kruger – Sowat vier ton gedroogte vis en groot hoeveelhede visnettte en vislyn, asook die vlotte wat gebruik is om dit...

Stigma rondom Covid-19 neem af

11 ure gelede | Gesondheid

Jana-Mari Smith – Die normalisering van Covid-19 die afgelope jaar het veroorsaak dat stigmatisering weens die coronavirus besig is om af te neem, maar kenners...

Duitsland steun nasionale parke

11 ure gelede | Omgewing

Francoise SteynbergNóg 'n mylpaal is vir omgewingsbewaring behaal met die Duitse regering deur KfW wat sedert 2006 sowat N$1,4 miljard (75,5 euro) in Namibiese nasionale...