Brand vernietig nege huise in Mondesa

Adolf Kaure - Verskeie families is dakloos gelaat nadat 'n brand Vrydagmiddag nege huise by die enkelkwartiere van die Mondesa-woonbuurt op Swakopmund vernietig het.

Volgens hoofinsp. Daniel Gurirab van die Namibiese polisie (Nampol) het die brand tussen 12:00 en 13:00 na bewering by een van die huise naby die Moshitila-woonstelle begin en na die ander huise in die erf versprei.

“Die vuur het al nege huise tot op die grond afgebrand. Nampol en die Swakopmundse brandweer was op die toneel en het die brand geblus,” het hy gesê.

“Niemand se lewe is geëis nie en daar was geen ernstige beserings nie. Die huise en al die besittings binne is vernietig.”

Gurirab het bygevoeg dat die oorsaak van die brand nog onbekend is.

“Dit word vermoed dat die eienaar van een van die huise vergeet het om sy stoof af te skakel toe die hele dorp 'n kragonderbreking vroeg Vrydagoggend gehad het. Dit kan dalk die oorsaak van die brand wees,” het hy gesê.

Gurirab het 'n beroep op die publiek gedoen om skenkings aan die slagoffers van die brand te maak.

“Ek glo die eienaars van die huise sal dit opreg waardeer as iemand hulle kan help om hul lewe te herbou,” het Gurirab gesê.