Bobby Sissing kry staatsbegrafnis

Boet Matthews – Khomasdal se geliefde seun Walter Bobby Sissing was nie net in Khomasdal bekend nie, maar het landwyd as politikus, sokkerfiguur en mense-mens harte gewen.Uit Staatshuis is die familie eergister ingelig dat “Uncle Bob” se begrafnis komende Maandag by die Pionierspark-begraafplaas “amptelike” status sal geniet.'n Deurrit by Ramblers-sportveld in Pionierspark word komende Saterdag gehou (15:00–17:00) waar familie, vriende en kennisse hul inskrywings in 'n boek van meegevoel kan maak, of blomme bring of enigiets wat hulle wil bydra. Sondag vanaf 11:00 word 'n gedenkdiens by die parlementstuin gehou.Sy begrafnis wat aanvanklik vir laas naweek beplan was, is onder meer uitgestel om te verseker dat een van sy dogters, Cynthia El-Kallawi, wat in Egipte woon, teenwoordig kan wees. Sy doodstyding op 79 jaar aan kanker het baie harte seergemaak en baie trane het gerol. Hy was enig in sy soort en het waarlik omgegee vir sy medemens. Sokkerspelers landwyd kan getuig wat Bobby Sissing vir hulle gedoen en beteken het. Sissing was by verskeie sokkerspanne betrokke soos Phantoms, Maritz, Atlanta Chiefs, Swansea, African Stars, Arsenal, Liverpool en Young Ones. Terselfdertyd in die agtergrond het sy vrou Anna ook stil-stil netbal aan die gang gesit met spanne soos Maritz Phantoms en Hibernians.Sy jongste seun Wasim met twee van sy vriende, Elton Job en Airofaan van Wyk, het die Namibiese sosiale sokkerliga op die been gebring en geadministreer. Wasim het sy eie span Amigos sokkerklub gestig met van sy vriende en gewese spanmaats met wie hy by Kingston United, Civics jeugspan en Young Ones gespeel het. Wasim het aan Republikein gesê: “My pa het baie dinge vir ons reggekry by die Khomasdal sportgrond. Sommige dae het dit gelyk asof ons nie die veld mag gebruik nie, dan het net een oproep van my pa gesorg dat ons toegelaat word om die bal rond te skop.“Tans is ons Khomasdal-liga weens Covid stopgesit, maar ek belowe dat die liga voortgesit sal word sodra alles tot normaal terugkeer. Dis 'n belofte wat ek aan my pa gemaak het terwyl hy op sy siekbed was.”Die uitvoerende komitee waarvan Wasim die voorsitter is, het belowe dat sodra die sokker hervat, sal hulle ook die Bobby Sissing Bekertoernooi op die been bring.David Fransman, oudspeler van Young Ones en Ramblers wat later vir Young Ones afgerig het, het aan die koerant gesê: “Toe ek nog op hoërskool was, het ons na Khomasdal sokkerveld wat nog in grondveld was gegaan en as kind met die grote Bobby Sissing kennis gemaak. Hy was altyd op daardie veld om sy liefde vir sokker uit te leef en aan ander oor te dra, veral aan ons jong generasie van daai tyd. “Later toe hy sy sokkerskoene ophang, het dit nie daar geëindig nie; dit was eintlik net die begin van 'n nuwe sokkergenerasie, veral in die Khomasdal gemeenskap. Daaruit het ontstaan Arsenal, vernoem na die span wat hy in die Engelse Premierliga ondersteun. So het Bobby sokker bevorder en ook die Khomasdal-sokkerfederasie gestig. “Daar is so baie om van Bobby Sissing te vertel. Hy het vir baie spelers van alle rasse die pad oopgemaak om selfs in Suid-Afrika te gaan speel. “Vir talle was dit 'n belewenis, want dit was hul eerste keer in Kaapstad. Of ons dit wil erken of nie, Bobby Sissing was 'n legende op sy eie. Mag sy siel in vrede rus en ons sal hom vir altyd onthou as 'n legende.”Die uittredende ombudsman, adv. John Walters, sê Sissing is 'n verdienstelike aanwysing vir 'n staatsbegrafnis.“Hoeveel sportmense wat vandag groot mense is, is onder sy hande deur? Ek onthou toe ek nog in die 1980's rugby gespeel het en voordat Western Suburbs sy eie terrein bekom het, moes ons soms by Uncle Bob smeek om die Khomasdal-veld te mag gebruik. Dan het hy eers beswaar gemaak oor die rugbyspanne wat sy veld so vertrap, maar uiteindelik het hy wel ingestem.“Ons almal moes jare gelede al sterker voorbrand gemaak het dat die Khomasdal-stadion amptelik na Bobby Sissing vernoem word. Dié erkenning sal sy nalatenskap vereer.”– republikein@ republikein.com.na

Bobby Sissing kry staatsbegrafnis

Kommentaar

Republikein 2025-07-03

Meld asseblief aan om kommentaar te lewer

Bobby Sissing kry staatsbegrafnis

Kommentaar

Republikein 2025-07-03

Meld asseblief aan om kommentaar te lewer

MELD AAN

Advertensie