Besware dat wetsontwerp deur vir geweld ooplaat

Veldtog vir #EqualProtectionNamibia

29 March 2021 | Regering
Jana-Mari Smith – Die ministerie van justisie is onder druk om 'n gewysigde wetsontwerp op huishoudelike geweld aan te pas om vir alle ­slagoffers van gesinsgeweld beskerming te bied, ongeag die geslag van hul huweliksmaat.

'n Klagskrif wat vir alle ­Namibiërs gelyke toegang tot geregtigheid en ­beskerming teen gewelddadige ­eggenote eis, het begin met die beplanning van betogings wat ­volgende maand sal plaasvind.

Die klagskrif, getiteld #EqualProtectionNamibia, eis dat die regering die uitdrukking “van verskillende ­geslagte” moet verwyder in die ­wets­ontwerp op die bekamping van gesinsgeweld wat verlede maand deur die minister van justisie, me. Yvonne Dausab, aan die parlement voorgelê is.

Me. Florence /Khaxas van die Y-Fem Namibian Trust het gesê ­benewens die klagskrif, beplan die organiseerders ook vreedsame ­optogte in Windhoek en op Walvis­baai, Gobabis en Keetmanshoop.

“Ons doen 'n beroep op ­Namibiërs om hul lewenservarings te deel oor waarom dit belangrik is dat die ­taalgebruik van die wysigingswets­ontwerp op die bekamping van ­gesinsgeweld verander moet word, aangesien dit tans die Grondwet oortree,” het /Khaxas gesê.

Sy benadruk die gebrek aan gelyke beskerming vir paartjies van ­dieselfde geslag is in 2016 deur die ­Verenigde Nasies se Menseregte­kommissie ­aangevoer. Die destydse kommissie het beklemtoon dat verhoudings van ­dieselfde geslag by die gewysigde wet ingesluit moet word.

Kort nadat Dausab die wetsontwerp op 18 Februarie by die parlement ingedien het, het 'n herrie ontstaan oor die diskriminasie van die wetsontwerp op individue in ­verhoudings met persone van dieselfde geslag.

Deur die frase “van verskillende ­geslagte” in te sluit, word diesulkes van beskerming deur die wetsontwerp uitgesluit.


ONGRONDWETLIK

“Ongeag individuele parle­mentslede se houding teenoor verhoudings van dieselfde geslag, is dit skokkend dat die parlement nie die wet teen huishoudelike geweld wil uitbrei sodat dit ook egpare van ­dieselfde geslag beskerm nie,” het me. Dianne Hubbard van die Legal ­Assistance Centre (LAC) destyds gesê.

Hubbard sê die eenvoudige stap om die frase te verwyder, sal beskerming vir almal verseker.

Sy het ook benadruk die LAC ondersteun die wysigingswetsontwerp in die algemeen, maar was geskok dat “die parlement nie die beskerming van die wet wil uitbrei sodat dit ook egpare van dieselfde geslag insluit nie”.

Hubbard het bygevoeg die ­parlement se standpunt teen LGBTQ moet geen invloed op die aanpassing van die wetsontwerp hê nie.

“Sommiges meen die aanpassing sal geen invloed op huwelike van ­dieselfde geslag hê nie, aangesien die wet getroude en ongetroude mense insluit.”

Die frase kom slegs voor ten opsigte van romantiese verhoudings en persone wat saamwoon. Niks aan die huwelik sou verander nie. Die saak moet dus nie eens kontroversieel wees nie.”

Hubbard het benadruk die ­weiering om beskerming ingevolge die ­gewysigde wet uit te brei tot mense in verhoudings met dieselfde geslag, ondermyn die grondwetlike beginsel dat alle mense gelyk voor die wet is.

“Die wet soos dit nou staan, dui daarop dat sommige mense meer ­beskermd teen geweld as ander is. Dit is waarom ek glo dit is ongrondwetlik.”


GEEN KOMMENTAAR

Tot op hede wou die ministerie van justisie nie kommentaar lewer op die kritiek en kommer oor die ­in­herente diskriminasie teen die LGBTI-­gemeenskap in die wets­ontwerp nie.

By die indiening van die wetsontwerp het Dausab gesê huishoudelike geweld en diskriminasie van vroue en kinders het 'n ­kommerwekkende vlak bereik.

“Die Grondwet ­waarborg nie net die gelykheid van alle mense, ongeag hul geslag, voor die wet nie, maar maak ook voorsiening vir vryheid van ­diskriminasie,” het sy benadruk

In April 2019, toe sy voorsitter van die Kommissie vir Regshervorming en -ontwikkeling (LRDC) was, het Dausab gepraat oor die tekortkominge van Namibië se wetgewende ­raamwerke met betrekking tot gelyke regte ingevolge die wet vir LGBTI-plus-­gemeenskappe in Namibië.

Tydens 'n rondetafelgesprek aangebied deur die kantoor van die ­ombudsman oor seksuele ­oriëntasie en geslagsidentiteit, het sy gesê daar is “skreiende uitsluitings” in die ­wetgewende raamwerk van die land wat voldoende waarborge beperk om die LGBTI-gemeenskap te beskerm.

Sy het gewaarsku “die afwesigheid van beskerming” maak die LGBTI-gemeenskap kwesbaar vir diskriminasie, viktimisering en verguising.

[email protected]

Soortgelyk

 

Hoërskool Rehoboth gesluit tot ná Paasnaweek

53 minute gelede | Onderwys

Hoërskool Rehoboth is vanaf vandag tot Dinsdag 6 April gesluit. Volgens die bestuur van die skool sal dié tyd gebruik word om die skoolperseel deeglik...

Robberts bly in aanhouding

11 ure gelede | Howe

Erwin Leuschner – Die 36-jarige mnr. Daniel (Danie) Robberts bly in aanhouding nadat hy na bewering sy vriend, mnr. Thomas Frederick (Frikkie) van Schalkwyk (69),...

Inentings: Namibiërs wag en kyk

11 ure gelede | Gesondheid

Henriette Lamprecht – ’n Wag-en-kyk-benadering en voorkeur vir spesifieke entstowwe is van die redes vir die trae reaksie tot die ministerie van gesondheid en maatskaplike...

Living a purposeful life

11 ure gelede | Mense

Rivaldo Kavanga“I would advise the youth to relentlessly go after whatever they desire unlimited. In pursuit of long-term gains and not short term rather.” Ndakondja...

Weer vir 30 Maart 2021

11 ure gelede | Weer

BINNELAND: Gedeeltelik bewolk en warm in die verre suide en die Zambezi-streek. Elders gedeeltelik bewolk en warm met verspreide donderbuie. Wyd verspreide donderbuie in die...

Huishoudelike geweld gedy in Kavango-Wes

11 ure gelede | Misdaad

Die naweek is drie sake van huishoudelike geweld in die Kavango-Wesstreek by die polisie aanhangig gemaak. Vrydag om 05:00 het ’n 36-jarige man in die...

Running for those who can’t

11 ure gelede | Skole

In honour of cerebral palsy awareness month and as part of a school project, four learners from Windhoek Afrikaanse Privaatskool ran with children, parents and...

Windhoek kry eie ekonomiese plan

11 ure gelede | Regering

Augetto Graig – Die burgemeester van Windhoek, dr. Job Amupanda, sê die regering moenie terugstaan sodat die private sektor die nasie tot werkskepping en ekonomiese...

Ending the double shift system at schools

11 ure gelede | Onderwys

Rivaldo KavangaBet-el Primary School on Friday, 26 March 2021 received three classroom blocks and a storeroom from The Craton Foundation. The classrooms were donated to...