AB gaan Mzansi Superliga laat kook
Krieket
Christo Buchner
AB de Villiers se flitsende kolf gaan weer binnekort op Suid-Afrikaanse krieketvelde klap.
Die 34-jarige De Villiers is Maandag bevestig as die Suid-Afrikaanse ikoonspeler vir die Tshwane Spartans in die Mzansi Superliga (MSL), wat van 16 November tot 16 Desember beslis word. De Villiers se terugkeer sal juis in die openingswedstryd op 16 November op Nuweland in Kaapstad wees, wanneer die Tshwane Spartans die toernooi inlui teen die Cape Town Blitz.
Die teenwoordigheid van ongetwyfeld een van die beste spelers tot nog toe in die kort formaat van die spel, is ’n geweldige hupstoot vir hierdie toernooi, wie se ster nog nie té helder skyn in hierdie stadium nie en maar nog met ’n lou ontvangs gepaard gegaan het.
Om AB daar te hê, wie se kolf soos ’n towerstaf ingespan word, kan die situasie egter heeltemal verander. Hy sal gewis die groot lokaas wees in hierdie eerste MSL en daar sal geen groter naam as Abraham Benjamin de Villiers in dié maandlange toernooi wees nie.
Anders as met die nasionale spelers, wat van die kragmetings sal misloop omdat hulle nog in Australië sal wees, en ook van die internasionale ikoonspelers wat ook nie die hele tyd vir hul spanne gaan speel nie, sal De Villiers die volle toernooi vir die span van Centurion beskikbaar wees.
“AB se handelsmerk op sy eie sal groter wees as wat dié van enige van die spanne sal kan hê,” het Pierre Joubert, ’n voormalige kaptein van die Titans en een van die Tshwane Spartans se verteenwoordigers, gesê.
“Dit is vir ons ’n geweldige inspuiting om AB te kan hê. Hy sal feitlik op sy eie vol stadions verseker en hy gaan gewis ’n groot rol speel in die krieket wat ons sal opdis.
“Vir die toernooi in die geheel gaan AB se teenwoordigheid baie beteken. Om hom in hierdie eerste weergawe van die toernooi te hê, is ’n groot pluspunt vir die organiseerders en Krieket Suid-Afrika (KSA),” sê Joubert.
De Villiers se skok-aankondiging vroeër vanjaar dat hy internasionale krieket vaarwel toeroep, het ’n demper geplaas op die spel in die land en die vraag is allerweë gevra hoe jy sy verlies kan oorbrug. Om hom nou weer met daardie kanonkolf op plaaslike bodem te kan sien, is ’n vroeë Kersgeskenk vir Suid-Afrikaanse krieketondersteuners.
Sy eerste tuiswedstryd vir die Spartans op SuperSportpark in Centurion sal op Sondag, 25 November wees. Jacques Faul, wat die uitvoerende hoof van die Tshwane-span sal wees, sê De Villiers is omtrent so tradisioneel aan die omgewing van die span vir wie hy gaan speel soos braaivleis en brandewyn.
“Dit is belangrik dat die mense hier met AB kan identifiseer en hy met hulle. Dit is vir ons ’n hengse voorreg om hom in ons span te kan hê en ons sien geweldig uit daarna om hom weer hier in Centurion te sien kolf,” sê hy. – Netwerk24
AB de Villiers se flitsende kolf gaan weer binnekort op Suid-Afrikaanse krieketvelde klap.
Die 34-jarige De Villiers is Maandag bevestig as die Suid-Afrikaanse ikoonspeler vir die Tshwane Spartans in die Mzansi Superliga (MSL), wat van 16 November tot 16 Desember beslis word. De Villiers se terugkeer sal juis in die openingswedstryd op 16 November op Nuweland in Kaapstad wees, wanneer die Tshwane Spartans die toernooi inlui teen die Cape Town Blitz.
Die teenwoordigheid van ongetwyfeld een van die beste spelers tot nog toe in die kort formaat van die spel, is ’n geweldige hupstoot vir hierdie toernooi, wie se ster nog nie té helder skyn in hierdie stadium nie en maar nog met ’n lou ontvangs gepaard gegaan het.
Om AB daar te hê, wie se kolf soos ’n towerstaf ingespan word, kan die situasie egter heeltemal verander. Hy sal gewis die groot lokaas wees in hierdie eerste MSL en daar sal geen groter naam as Abraham Benjamin de Villiers in dié maandlange toernooi wees nie.
Anders as met die nasionale spelers, wat van die kragmetings sal misloop omdat hulle nog in Australië sal wees, en ook van die internasionale ikoonspelers wat ook nie die hele tyd vir hul spanne gaan speel nie, sal De Villiers die volle toernooi vir die span van Centurion beskikbaar wees.
“AB se handelsmerk op sy eie sal groter wees as wat dié van enige van die spanne sal kan hê,” het Pierre Joubert, ’n voormalige kaptein van die Titans en een van die Tshwane Spartans se verteenwoordigers, gesê.
“Dit is vir ons ’n geweldige inspuiting om AB te kan hê. Hy sal feitlik op sy eie vol stadions verseker en hy gaan gewis ’n groot rol speel in die krieket wat ons sal opdis.
“Vir die toernooi in die geheel gaan AB se teenwoordigheid baie beteken. Om hom in hierdie eerste weergawe van die toernooi te hê, is ’n groot pluspunt vir die organiseerders en Krieket Suid-Afrika (KSA),” sê Joubert.
De Villiers se skok-aankondiging vroeër vanjaar dat hy internasionale krieket vaarwel toeroep, het ’n demper geplaas op die spel in die land en die vraag is allerweë gevra hoe jy sy verlies kan oorbrug. Om hom nou weer met daardie kanonkolf op plaaslike bodem te kan sien, is ’n vroeë Kersgeskenk vir Suid-Afrikaanse krieketondersteuners.
Sy eerste tuiswedstryd vir die Spartans op SuperSportpark in Centurion sal op Sondag, 25 November wees. Jacques Faul, wat die uitvoerende hoof van die Tshwane-span sal wees, sê De Villiers is omtrent so tradisioneel aan die omgewing van die span vir wie hy gaan speel soos braaivleis en brandewyn.
“Dit is belangrik dat die mense hier met AB kan identifiseer en hy met hulle. Dit is vir ons ’n hengse voorreg om hom in ons span te kan hê en ons sien geweldig uit daarna om hom weer hier in Centurion te sien kolf,” sê hy. – Netwerk24
Kommentaar
Republikein
Geen kommentaar is op hierdie artikel gelaat nie