Aansoeke vir geldelike steun aan studente open

Augetto Graig – Namibiërs kan vanaf vandag aanlyn aansoek doen vir finansiële hulp om studies aan te pak en hul kwalifikasies uit te brei.Die Namibiese finansiële hulpfonds vir studente (NSFAF) se aansoektydperk is vanaf 6 Januarie tot 16 Maart 2021. Volgens die fonds se waarnemende uitvoerende hoofbeampte, mnr. Kennedy Kandume, word sowat 15 000 nuwe NSFAF-begunstigdes vanjaar verwag.Saam met tot 27 000 studente wat reeds in vorige jare as begunstigdes geregistreer is, is voorsiening gemaak om omtrent 40 000 Namibiërs vanjaar ’n studiegeleentheid te bied.Hy erken dat daar steeds uitstaande skuld in terme van klasgelde vir 2020 bestaan, “maar dit is nie veel nie.“In 2020 het die tesourie werklik goed ons toelae vrygestel en ons kon fakture betaal soos dit ontvang word,” het hy gesê. Vir die 2020-2021 finansiële jaar is N$1,262 miljard aan die NSFAF toegeken en teen einde Oktober het die tesourie reeds N$1 miljard vrygestel, volgens die fonds se webwerf.Oor studente geraak deur vertraagde uitbetaling sê hy: “Die paar gevalle is meestal vanweë laat uitreiking van fakture deur die betrokke instansies, of studente met kwessies met vertraagde heraktivering, nadat hulle ’n vak gedruip het. Dit veroorsaak vertragings in uitbetaling,” het hy gesê.Ander redes vir vertragings is skuld vir ander koste as klasgeld, asook studente wat lank neem om hul Bank Windhoek-bankkaarte af te haal, sê hy. “Dit is nie baie studente nie.”Kandume het ook die nuutste oor NSFAF se ingryping ter bevordering van aanlynonderrig gedeel en sê die nuwe skootrekenaars sal teen Februarie beskikbaar wees. Die internettoestelle wat die NSFAF deur TN Mobile bekom, is al sedert September beskikbaar.“Die aanvanklike tender is gekanselleer en ons moes die tender heropen, maar vir minder eenhede.Die tender is sedertdien aan vier maatskappye toegeken, maar weens Covid-19-vertragings – selfs in die vervaardiging van skootrekenaars – verwag ons aflewering in Februarie,” het hy gesê.“Met die styging in Covid-19-gevalle is die skootrekenaar en die internettoestel die regte roete vir studies aanlyn. Neem hierdie geleentheid om gehalte teen halfprys te kry. Handelsmerke soos HP en Lenovo is gekies om te voorsien dat die skootrekenaar met spesifieke toepassings opgegradeer kan word, soos byvoorbeeld vir studies in ingenieurswese,” sê Kandume.Die aanlynstelsel vir aansoeke is in November opgegradeer en Kandume sê dit is nou makliker om te gebruik.Gevra of die fonds gerat vir ’n toename in aansoeke is, sê hy die regering het die afgelope vyf jaar ’n beleid toegepas om niemand wat in aanmerking kom, weg te wys nie.Om in aanmerking te kom, moet Namibiese studente kan bewys dat hulle vir 2021 by ’n hoëronderwysinstansie aanvaar is.Diegene jonger as 28 moet kan bewys dat hul ouers nie hul verdere studies kan bekostig nie, terwyl aansoekers ouer as 28 hul eie en hul eggenoot se inkomste of werkloosheid moet bewys.Aansoekers ouer as 23 kan slegs by Unam, NUST of Namcol gefinansier word en voorkeur vir nagraadse studies word in spesifieke onderwerpe toegepas.– augetto@republikein.com.na

Aansoeke vir geldelike steun aan studente open

Kommentaar

Republikein 2025-07-02

Meld asseblief aan om kommentaar te lewer

Aansoeke vir geldelike steun aan studente open

Kommentaar

Republikein 2025-07-02

Meld asseblief aan om kommentaar te lewer

MELD AAN

Advertensie