90% minder mense in sommige sentrums

20 May 2020 | Sakenuus
Nellie Brand-Jonker



Besoekersgetalle by winkelsentrums waar laerinkomstegroepe hul inkopies doen, het in April met 90% gedaal.

Growthpoint, die grootste eiendomsbeleggingsgroep op die JSE, het in 'n handelsverklaring die impak van die nasionale staat van inperking op sy huurinkomste uitgewys.

Hulle meen dit is omdat dié verbruikers op openbare vervoer staatmaak.

In al sy winkelsentrums was besoekergetalle omtrent 50% tot 60% van wat dit gewoonlik in April is.

Winkelsentrums in woonbuurte het beter gevaar omdat mense in dié tyd verkies om naby hul huise inkopies te doen en nie ver na winkelsentrums te ry nie.

Van die drie kommersiële eiendomsektore in Suid-Afrika, is kleinhandel die ergste geraak deur die uitwerking van die vlak 5-inperking.

Net 47% van rekeninge wat uitgestuur is, is in April deur kleinhandelaars betaal en in Mei net 54%.

Die groep sê die bystand wat hy aan sy huurders gegee het, het onder­skeidelik R38,6 miljoen en R26,3 miljoen in die twee maande beloop.

Hulle het in April R1 miljard se rekeninge aan sy eiendomsektore uitgestuur en R735,4 miljoen of 71% daarvan is betaal.

In Mei is rekeninge van R951,6 miljoen uitgestuur en 70% of R665 miljoen is betaal.

Kleinhandelaars het in April die minste van die huur betaal wat moes betaal word, en hospitale die minste in Mei.

Van die R25,9 miljoen se rekeninge wat uitgestuur is aan hospitale wat by hom huur, is net R13,5 miljoen betaal.

“Die fakture wat uitgestuur word aan huurders en wat betaal word, bly veranderlik omdat daar daagliks nog versoeke om verligting ontvang word.”

Sy kleinhandelportefeulje se blootstelling aan genoteerde winkelgroepe wat nienoodsaaklike produkte verkoop, is 27% en winkels wat noodsaaklike produkte verkoop en kon handel dryf, 22%.

Verder is 18% van die winkelruimte in sy winkelsentrums verhuur aan middelslag- tot groot ongenoteerde winkelgroepe wat nienoodsaaklike produkte verkoop en 16% wat noodsaaklike produkte verkoop en gedeeltelik oop was.

Sedert Mei, toe die vlak 4-inperking in werking getree het, kon meer winkels begin handel dryf. Dit sluit in dié wat winterklere en skoene verkoop, skryfbehoeftes, beddegoed, sekere skoonheidsprodukte, rekenaars, selfone, hardeware en kantoortoerusting.

Growthpoint is deel van die Property Industry- (PI) groep wat tydens die staat van inperking gestig is om kleinhandelaars met hul huur te help.



V&A WATERFRONT

Die V&A Waterfront in Kaapstad is wesenlik deur Covid-19 geraak omdat twee derdes van sy netto inkomste van die kleinhandel- en hotelsektor kom.

Albei die sektore is baie afhanklik van buitelandse toerisme wat die helfte van winkels se verkope en tot 80% van hotelle se besoekers bydra.

Growthpoint besit 'n groot belang in die winkelsentrum.

Die betalings van die twee sektore was in April en Mei baie laag en het die hele sentrum se betaling verlaag tot 50% van die fakture wat uitgestuur is.

“Internasionale toerisme sal waarskynlik lank neem om terug te keer. Suid-Afrikaners sal ongetwyfeld baie armer uit die krisis kom, gegewe baie afleggings, geen bonusse en salarisse nie.

'n Vinnige herstel in plaaslike toerisme is onwaarskynlik.”

In April is R19 miljoen se afslag op huur en in Mei R7 miljoen se afslag op huur vir huurders in die winkelsentrum gegee.

Dié syfers is nie by bogenoemde afslag aan die kleinhandelsektor ingesluit nie.



VERLIGTING

Volgens die maatskappy is huurverligting aan 1 494 klein ondernemings verskaf waarvan 694 erg benadeel is deur die inperking en 800 matig geraak is.

“Ons is nog besig om die huur te finaliseer vir alle ander middelslag-, groot en genoteerde kleinhandelhuurders vir April. Dit kan nog 'n impak op Mei hê as 'n ooreenkoms bereik word.”

Die aanbod van die vyf genoteerde klerewinkelgroepe om net 20% van munisipale belasting te betaal en 'n deel van hul huur in April, is verwerp en die regering is nou genader om te bemiddel.

“Vordering word gemaak met die onderhandeling met vier van die vyf kleinhandelaars. Ons verwag invorderings van kleinhandelaars gaan begin verbeter wanneer hulle hul huur begin betaal.”

Growthpoint glo die goeie gehalte en uiteenlopende aard van sy portefeulje van eiendomme saam met versigtige kontantvloeibestuur en hoe sterk sy balansstaat is, sal die maatskappy tydens die krisis help.

“Hoewel meer bedrywighede toegelaat is op vlak 4, maak die onsekerheid en maatreëls van die regering in elke vlak van die inperking dit onmoontlik om die volle impak op die onderneming te bepaal.”

Die groep gaan op 22 Junie weer terugvoer gee oor die impak op sy resultate.



EDCON

Die Edcon-groep wat Edgars en Jet besit, het einde April in vrywillige sakeredding gegaan.

Growthpoint se blootstelling aan Edcon is 88 000 vierkante meter waarvan Jet omtrent 20 000 vierkante meter is.

“As daar belangstelling is van 'n party om Jet te koop, of ander dele van die onderneming, sal dit 'n positiewe uitslag vir ons blootstelling hê.”

“Ten opsigte van die Edgars-winkels in sy winkelsentrums ondersoek Growthpoint opsies om die ruimte te onderverdeel en 'n tweede supermark as ankerhuurder bekend te stel waar moontlik, maar dit is 'n duur oefening.”

Volgens Growthpoint het die hele eiendomsbedryf intussen 'n aanbod van die sakereddingspraktisyn gekry om in die komende maande net huur te betaal gegrond op die omset van die winkels.

Growhtpoint sê die aanbod word nog oorweeg. - Netwerk24

Soortgelyk

 

Covid-19: 5de nuwe geval binne 4 dae

5 ure gelede | Gesondheid

‘n Vragmotorbestuurder in Walvisbaai het gister positief vir Covid-19 getoets.Dit is die vyfde positiewe geval sedert Woensdag. Al die persone was in kwarantyn.Persone waarmee die...

‘80% van skole gereed’

2 dae gelede | Onderwys

Henriette Lamprecht – Sowat 80% van die 1 920 staatskole oraloor in die land is gereed om leerlinge volgens verpligte gesondheidsregulasies te ontvang wanneer hulle...

Nog leerlingdokters wag om uitgeplaas te word

2 dae gelede | Gesondheid

Henriette Lamprecht – Meer as 100 leerlingdokters wag glo reeds maande om vir internskappe by staatshospitale oraloor in die land uitgeplaas word. Die 166 leerlingdokters...

Stadspolisie van hardhandigheid beskuldig

2 dae gelede | Misdaad

Denver Kisting – ’n Inwoner van Groot Aub, mnr. Richard Davids, voer aan ’n beampte van die stadspolisie, waarnemende sersant Erwen Katiti, het hom Dinsdaglaatmiddag...

Weer vir 22 Mei 2020

2 dae gelede | Weer

BINNELAND: Gedeeltleik bewolk en warm in die streke van ||Kharas en Hardap. Elders sal dit sonnig en warm tot baie warm wees.KUS: Gedeeltelik bewolk en...

‘Vervoer van drank nie ’n misdaad’

2 dae gelede | Misdaad

Francoise SteynbergDie blote vervoer van drank is nie ’n misdaad nie en kan nie as redelike gronde gebruik word vir agterdog van die koop of...

Vroue in kwarantyn toets positief vir Covid-19

2 dae gelede | Gesondheid

Henriette Lamprecht – Twee vroue het in kwarantyn positief vir Covid-19 getoets. Dit bring Namibië se totaal bevestigde Covid-19-gevalle op 18 te staan. Volgens die...

Ebikes: vinnig, goedkoop en groen

2 dae gelede | Mense

Tanja Bause Nie te veel besighede kan sê dat hulle in die Covid-19-tyd so goed aangepas het dat hulle nuwe werknemers moes aanstel nie. Ebikes4Africa...

Market Watch Covid page - snippets

2 dae gelede | Gesondheid

The Namibia Football Association (NFA) executive committee has yet to decide what to do with funds it expects to receive from the Federation of International...